Medvedyev Qarabağda rus sülhməramlılarını yerləşdirmək istəyir "Kreml Ermənistanın azacıq da olsa müstəqil siyasət yürütməsinə imkan vermək istəyində deyil" Rusiya prezidenti Dmitri Medvedyevi oktyabrın 20-21-də İrəvana səfəri zamanı xoşagəlməz sürprizlə qarşılaşa bilər. Bu barədə məlumatı Rusiyanın hakimiyyətə yaxın "geopolitika.ru" analitik informasiya saytı yayıb. Xəbərdə deyilir ki, Rusiya prezidenti Dmitri Medvedyevin Ermənistan silahlı qüvvələrinin Dağlıq Qarabağdakı hissələrinin rus sülhməramlılarla əvəzlənməsi barədə gizli təklifi Ermənistan prezidenti Serj Sərkisyanı qorxuya salıb. Xəbərdə o da bildirilir ki, Serj Sərkisyan Ağ Evlə təcili siyasi məsləhətləşmələrə başlayıb. Yeri gəlmişkən, Ermənistanın baş naziri Tiqran Sərkisyanın ABŞ dövlət departamentinin rəhbəri Kondoliza Raysla Nyu-York danışıqları da təsadüfi sayılmamalıdır. "geopolitika.ru" onu da yazıb ki, "son vaxtlar Ermənistan mətbuatında Rusiyanın Qafqazdakı imicini ləkələyən məlumatlar da yayılır. Tural Səfər zamanı təxribatların da olması istisna deyil". Saytın məlumatına görə, Rusiya Federal Müdafiə Xidməti İrəvanda Rusiya prezidentinin qorunması üçün presendentsiz tədbirlər görüb. Qeyd edək ki, bu xidmətin əməkdaşları prezidenti yalnız fövqəladə səfərlər zamanı, məsələn, planetin "qaynar nöqtələri"nə səfərlərdə müşayiət edir. Politoloq Rauf Mirqədirov Qafqazda yaranmış vəziyyətin Rusiyanı regionda fəal siyasət yürütməyə sövq etdiyini bildirdi: "Bu baxımdan Dmitri Medvedyevin Ermənistana səfərində elə bir təəccüblü hal yoxdur. Ermənistan Cənubi Qafqazda Kremlin yeganə forpostu kimi qiymətləndirilir. Yəni Gürcüstan artıq Rusiya üçün tamamilə itirilib. İki ölkə arısında münasibətlərin hətta normal diplomatik məcraya yönələcəyini proqnozlaşdırmaq çox çətindir. Ona görə ruslar bədnam qonşularımızdan "bərk tutmağa" başlayıblar". Onun sözlərinə görə, bu səfərdə Dmitri Medvedyev Dağlıq Qarabağ münaqişəsinin həlli istiqamətində hansısa deklorativ təşəbbüslə də çıxış edə bilər. Yəni bu təşəbbüs heç də həmin münaqişənin kardinal həllinə yönəlməyəcək. Çünki bu cür həll Kremlin maraqlarına cavab vermir. Amma hansısa ilkin addımlar atmaq, görüntü yaratmaq naminə qarşılıqlı münasibətlərdə hərbi gücdən yararlanmamaq haqda sazişlə çıxış etmək kimi siyasi gedişlər ola bilər. Belə addımlar Moskvanın maraqlarına cavab verir və bu ölkənin sülhməramlı məqsədlərini nümayiş etdirməyə imkan yaradır: "Amma Dmitri Medvedyevin İrəvana səfərində Ermənistan silahlı qüvvələrinin Rusiya sülhməramlıları ilə əvəzlənməsi məsələsini qoyacağı inandırıcı görünmür. Bunun üçün ilk növbədə Azərbaycandan razılıq almaq lazımdır ki, Dağlıq Qarabağ və onun ətrafı beynəlxalq hüquq normalarına görə Azərbaycanın ərazisidir. Orada hər hansı bir xarici hərbi qüvvələrin yerləşdirilməsi üçün rəsmi Bakının razılığı lazımdır. Əgər şimal qonşumuzu bu məsələni yalnız Ermənistan ilə həll edib öz sülhməramlılarını işğal olunmuş torpaqlarımızda yerləşdirməyə cəhd göstərərsə, bu, Kremlin birbaşa olaraq Ermənistanla Azərbaycan arasındakı münaqişəyə cəlb edilməsi demək olar. Belə addım faktiki olaraq Azərbaycana qarşı hərbi təcavüz kimi də qiymətləndiriləcək. Moskva indiki geosiyasi vəziyyətdə belə addım atmaz. Digər tərəfdən, Azərbaycan Gürcüstanın timsalında Rusiyanın sülhməramlılarından necə istifadə etdiyini gördü. Ona görə də rəsmi Bakı buna razılıq verməz". Ermənistana qarşı Rusiya mətbuatında bir qədər soyuq münasibətin formalaşmasını İrəvan daxilindəki müəyyən proseslərlə bağlayan ekspert Rusiyanın Gürcüstana təcavüzünün region ölkələrində çox ciddi qorxu yaratdığını söylədi: "Bu qorxu ondan ibarətdir ki, Kreml anoloji addımları digər region ölkələrinə qarşı da ata bilər və səbəb kimi istənilən bəhanə gətirilər. Yəni bu gün Gürcüstan hansısa siyasətində Rusiyanı razı salmırdı. Sabah Azərbaycan bu ölkəni narazı edə, gələcəkdə isə Ermənistanın siyasəti rusların marağına cavab verməyə bilər. İrəvan siyasi elitası dərk edir ki, Rusiyayla həddindən artıq sıx əməkdaşlıq nəticə etibarı ilə Ermənistanın dövlət müstəqilliyinin itirilməsinə gətirib çıxara bilər. Artıq Rusiyadan uzaqlaşma meylləri də güclənməyə başlayıb. Sözsüz ki, bu, Moskvada müəyyən bir qıcıqlanma yaradır və bu tip informasiyaların hakimiyyətə yaxın saytlarda yerləşməsinə səbəb olur. Yəni Kremlin siyasətini həyata keçirən rus mətbuatı artıq Ermənistana qarşı aqressiya göstərməyə başlayıb. Bu heç də sırf olaraq İrəvanın Moskvanın Qafqaz siyasətində fəal fiqur kimi oynamaması ilə bağlı deyil. Rusiya mətbuatı rus siyasətinin əsl üzünü göstərən sxemdir və aqressiya isə Kremlin hələ də ermənilərin azacıq da olsa müstəqil siyasət yürütməsinə imkan vermək istəyində olmamasıyla bağlıdır". xalqcebhesi