İlham Əliyev qalib gəldi MSK seçkinin ilkin nəticələrini açıqlayıb Azərbaycanda keçirilən prezident seçkilərində seçicilərin böyük əksəriyyəti konstutuion hüquqlarını gerçəkləşdiriblər. Gecə saat 01:50 radələrində Mərkəzi Seçki Komissiyası seçkinin ilkin nəticələri ilə bağlı rəsmi açıqlama verib. MSK sədri Məzahir Pənahov bildirib ki, seçkilər ruh yüksəkliyi ilə keçirilib və seçki fəallığı ilkin olaraq 75,65 faizə bərabər olub. Seçkilərin yerli və beynəlxalq müşahidəçilər tərəfindən izləndiyini qeyd edən M.Pənahov bildirib ki, gün ərzində rəhbərlik etdiyi quruma çox ciddi əhəmiyyət kəsb edən müraciət daxil olmayıb. Seçkinin ilkin nəticələrini elan edən M.Pənahov deyib ki, 5359 məntənin 3727-dən MSK-nın İnformasiya Mərkəzinə pratokollar daxil olub. Bu isə ümumi məntəqələrin 70 faizini təşkil edir: "İlkin nəticələr aşağıdakı kimidir: Əliyev İlham Heydər oğlu 2 milyon 329 min 625 səslə seçicilərin 89.04 faiz səsini qazanaraq birinci yerdədir. Ağazadə İqbal Feyruz oğlu 72 min 870 səslə seçicilərin 2.78 faiz səsini qazanaraq ikinci yerdədir. Mustafayev Fazil Qəzənfər oğlu 62 min 908 səslə seçicilərin 2.40 faiz səsini qazanaraq üçüncü yerdədir. Həsənquliyev Qüdrət Müzəffər oğlu 58 min 196 səslə seçicilərin 2.22 faiz səsini qazanaraq dördüncü yerdədir. Əlibəyli Qulamhüseyn Surxay oğlu 57 min 69 səslə seçicilərin 2.18 faiz səsini qazanaraq beşinci yerdədir. Əliyev Fuad Ağası oğlu 19 min 571 səslə seçicilərin 0.75 faiz səsini qazanaraq altıncı yerdədir. Nəhayət Hacıyev Hafiz Ələmdar oğlu 16 min 156 səslə 0.62 faiz səs toplayıb və yeddinci yerdədir". Protokolların MSK-ya gəlməkdə davam etdiyini bildirən MSK sədri deyib ki, yaxın vaxtlarda bütün məntəqələrdə protokollar quruma daxil olacaq və məlumatlar ictimaiyyətə çatdırılacaq. Qeyd edək ki, Mərkəzi Seçki Komissiyası seçkinin gedişi ilə bağlı gün ərzində beş dəfə rəsmi məlumat verilib. Əvvəlcə saat 10:00-a qədər olan məlumatı diqqətə çatdıran "Seçkilər" İnformasiya Mərkəzinin direktoru Ramil Hüseynov bildirib ki, bu saata qədər ölkə üzrə 686 727 nəfər səsvermədə iştirak edib. Bu, seçicilərin 14,1 faizi deməkdir. Ən yüksək fəallıq 56 saylı Xaçmaz kənd Seçki Dairəsində qeydə alınıb - 24.56 %. Hələlik ən aşağı fəallıq 15 saylı 1-ci Yasamal Seçki Dairəsindədir - 3.63 %. Saat 12.00-dək isə ölkə üzrə 1 623 775 nəfər səsvermədə iştirak edib. Bu, seçicilərin ümumi sayının 33,37 faizini təşkil edir. Bu müddətə qədər seçici fəallığının ən yüksək olduğu yer 32 saylı Suraxanı 3-cü Seçki Dairəsidir - 48,64 %. Ən aşağı fəallıq isə 33 saylı Xətai 1-ci Seçki dairəsindədir - 12, 73 %. Saat 15.00-dək ölkə üzrə 2 584 253 nəfər səsvermədə iştirak edib. Bu, seçicilərin ümumi sayının 53,1 faizini əhatə edir. Bu saata qədər ən yüksək seçici fəallığı 118 saylı Ağdam şəhər Seçki Dairəsində qeydə alınıb - 69,27%. Ən aşağı fəallıq isə 29,86%-lə 29 saylı Səbail Seçki Dairəsində olub. Saat 17.00-dək isə ölkə üzrə 3 161 459 nəfər səsvermədə iştirak edib. Bu, seçicilərin ümumi sayının 64,96 faizi deməkdir. Ölkə üzrə ən yüksək seçici fəallığı 14 saylı Əzizbəyov 2-ci Seçki Dairəsində qeydə alınıb - 80,45 %. Ən aşağı fəallıq isə 29 saylı Səbail Seçki Dairəsindədir. Burada seçicilərin 43,39 %-i səs verib. Axşam saat 22:10 radələrində isə Mərkəzi Seçki Komissiyası Prezident seçkilərində seçicilərin iştirakına dair sonuncu rəsmi məlumatı açıqlayıb. Seçkilər" İnformasiya Mərkəzindən "Şərq"ə verilən məlumata görə, saat 19.00-dək ölkə üzrə 3 681 529 nəfər səsvermədə iştirak edib. Bu, seçicilərin ümumi sayının 75,65 faizi deməkdir. Ölkə üzrə ən yüksək seçici fəallığı 1 saylı Şərur-Sədərək Seçki Dairəsində qeydə alınıb, 92,2 %. Ən aşağı fəallıq isə 28 saylı Sabunçu 3-cü Seçki Dairəsində olub. Burada seçicilərin 57,56 %-i səs verib. Firdovsi Fərzəliyev, Nəsimi Cəfərli sherg