AKP-nin PKK ilə mübarizə bəyanatları bələdiyyələrə seçki günü unudulacaq Dövlət Baxçalı: "Terrorun beyni Bərzani, yönətimi Qəndil, dəstəkçisi separatçılar, mehmandarı AKP-dir" Oktyabrın 14-də partiyasının qrup toplantısında çıxış edən MHP sədri Dövlət Baxçalı hökumətin ünvanına ağır ittihamlar səsləndirib. PKK ilə mübarizədə AKP hökumətinin məsuliyyət daşıdığını deyən MHP sədri AKP içində PKK ilə eyni dildə danışan millət vəkillərinin olduğunu söyləyib. Dövlət Baxçalı kürsüdə çıxış zamanı əlindəki xəritəni göstərərək hövsələdən çıxıb: "Dilədiyimiz terrorun sona çatması, Türkiyə Böyük Millət Məclisinin verdiyi əməliyyat keçirmə səlahiyyətinin səmərəli şəkildə istifadə olunmasıdır. İndi artan terror aksiyalarının istiqaməti və hökumətin bu məsələlərə yanaşması nəticəsində yeni dönəm başlayıb. Artıq qanlı aksiyalar fonunda AKP-nin klassik fəaliyyətinin- sonu gəlməyən tədbir arayışlarının, sözdə atəşkəs çağırışlarının baş aldadıcı olduğu görünür. Hökumət üzvlərinin terrorla mücadilə bəyanatları cəmiyyətə ümid verməkdən belə uzaqdır. Terrorla mücadilə toplumun bütün təbəqələrinin ortaq dəstəyilə çözüləcək milli bir problemdir. Biz hökumətə təkliflərimizi çatdırmışıq, çıxışlarımızda ortaya qoymuşuq. Proseslər hökumətin terrorla mübarizə probleminə bizimlə eyni pəncərədən baxmadığını üzə çıxarır. AKP hökumətinin PKK ilə mübarizə bəyanatlarının təsiri bələdiyyələrə seçki günü unudulacaq. Hökumətin terrorla mücadilə məsuliyyətini öz çiynindən atıb Türkiyə Silahlı Qüvvələrinə yükləmək cəhdləri üzə çıxıb. Parlamentdə müzakirələr zamanı Türkiyə Silahlı Qüvvələrinə sərhəddən o yanda PKK terrorçularına qarşı əməliyyat keçirmək səlahiyyəti verən TBMM qərarnaməsi haqqında söz alan hökumət təmsilçisinin terrorla mücadiləni TSQ-nın öhdəsinə qoyması və "nə istədilərsə, verdik" sözləri tam bir məsuliyyətsizlikdir. Bu sözlər "Nə edək, biz TSQ-ya hər cür dəstəyi veririk, amma ordu terrorun qarşısını ala bilmir" anlamı daşıyır. TBMM qərarnaməsi hökumətə verilib, Türkiyə Silahlı Qüvvələrinə deyil. Qərarnamədəki imza baş nazirə aiddir, həmin imza ilə məsuliyyət hökumətə aiddir". TBMM-də tezkərə (qərarnamə) müzakirələri zamanı AKP-nin adından çıxış edən bir millət vəkilinin separatçı terror təşkilatının fikirlərindən istifadə etdiyini, təbliğat apardığını deyən Dövlət Baxçalı söyləyib: "AKP bir daha PKK və Bərzani ilə eyni mövqedə dayanıb. Təəssüf ki, bunun üçün uca Məclis kürsüsü alət edilib. Bu kirli bir zehniyyətdir, ən azı PKK qədər separatçı, alçaq və əxlaqsızdır. "Sayın millət vəkili" deyilən həmin zat bu xəritəyə işarə vurur. Bunu qəbul etmək mümkün deyil. Aydın görünür ki, hökumətin terrorla mübarizə ilə bağlı strategiyası yoxdur. Hökumət əli silahlı terrorçu ilə diplomatik bazarlığa hazırlaşır. ABŞ-ın və AKP-nin PKK-nı bu bölgədən uzaqlaşdırmaq niyyəti yoxdur. Hökumət qlobal oyunun içinə itələnib, amma oyun bəlli olub. Terrorun beyni Bərzani, yönətimi Qəndil, dəstəkçisi separatçılar, mehmandarı AKP-dir. Hökumətin PKK terroru ilə mücadilədə tam bir başı pozuqluq nümunəsi göstərərkən bir hökumət sözçüsünün "BBG evi"ndən danışması diqqət çəkici olub. Bu məsələni gündəmə gətirən hökumət üzvünə və istənməyən vəziyyəti qaşıyaraq ictimai rəyi Türkiyə Silahlı Qüvvələrinə qarşı təhrik edən mediaya bir məsələni xatırlatmaq istəyirəm. İraqda əsgərlərimizin başına çuval keçiriləndə baş nazir Ərdoğanın Kayseridə səfərini dayandırmayıb, əksinə, avtoparkın açılış mərasiminə qatılması unudulmayıb. AKP mediası iynəni öncə özünə batırmalıdır. MHP olaraq Türkiyənin bir və bütün olaraq görən bir siyasi anlayışın təmsilçiləriyik. Bunu bir milli varlıq səbəbi, müqəddəs bir vətən vəzifəsi sayırıq. Veriləcək torpaqlarımız, vaz keçilməz insanımızın olmadığını daim ifadə etmişik. Bu məsələdə ən kiçik güzəşt belə vətənə xəyanətdir. Nə yazıq ki, bu vəziyyətimizdən nəsibini almayanların TBMM-də yer alması çox böyük uğursuzluqdur. Daha öncə də bölücülüyün sözlü aksiyalarına şahid olduq. Türkiyə Böyük Millət Məclisindəki müzakirələr zamanı AKP adından danışan millət vəkilinin "Gavir dağından o tərəfə keçilməməlidir" sözləri Bərzaninin, PKK-nın cızdığı xətdir. Haqqında sözü gedən millət vəkilinin sözləri separatçı təşkilatın haraya çatdığını aydın şəkildə göstərir. Bu zirvələrin sahibi olan şəxs nə məqsədlə xatırlatma cürəti göstərir? Bəhs etdiyi xətti açıqlamaqla nə məqsədi güdür? Bu suala verilən cavab hər şeyi ortaya çıxaracaq. Bizim sorğuladığımız məsələ aydındır. AKP-çi millət vəkilinin Gavir dağı ilə Sivas arasında göstərdiyi o xətt Bərzaninin, PKK-nın cızdığı xətdir. Bu zehniyət ən azı PKK qədər separatçı və xəyanətkardır. Millət vəkili dediyimiz bu şəxs separatizmi dəstəkləyir. Üstəlik bəziləri bizi ittiham etməyə çalışır. İndi 40 illik bir partiyayaya, bizə yolu sizmi göstərəcəksiniz? Biz qlobal oyunun fərqindəyik. Bu bizə və vətən övladlarına ən böyük xəyanətdir. İndi deyil, amma sabah bunun cavabını verəcəyik". Dövlət Baxçalı Ərdoğanın "ağzı olan danışır" sözlərinə isə belə cavab verib: "Bu baş nazir Ərdoğana yaraşan belə üslub, danışıq tərzi onun nə qədər böyük çarəsizlik içərisində olduğunu göstərir. Rəcəb Tayyib Ərdoğanın Şimali İraqda bufer bölgə qurulması təklifinə verdiyi təpki kürd lideri Bərzanidən belə sərt olub". xalqcebhesi