Avropa Birliyi Cənubi Qafqazda nüfuzunu qoruyur "Gürcüstanda "beşgünlük müharibə"nin nəticələri göstərdi ki, bu qurum Qarabağ münaqişəsinin nizamlanmasında da mühüm rol oynaya bilər" Fransanın Azərbaycandakı səfiri Qabriel Keller digər təşkilatlar kimi Avropa Birliyinin (AB) də Dağlıq Qarabağ münaqişəsininin həllində həlledici rol oynadığını bildirib: "Bu gün Dağlıq Qarabağ münaqişəsinin həlli şansları Gürcüstandakı münaqişədən əvvəlki dövrə nisbətən daha çoxdur". Mütəxəssislərin fikrincə, səfirin AB-nin Qafqazda gedən proseslərdə, o cümlədən Qarabağ münaqişəsinin nizamlanmasında əsas siyasi qüvvə olmasını bəyanlaması təsadüfi deyil. Xatırladaq ki, bir neçə gün əvvəl xarici işlər nazirinin müavini Araz Əzimov Avropa Siyasəti Mərkəzinin Brüsseldə keçirilən konfransında sensasiyalı bəyanatlar səsləndirib. O, Azərbaycanın Gürcüstan və Ukraynadan fərqli olaraq Avropa Birliyinə üzv olmağa can atmadığını söyləyib. Tural Araz Əzimov rəsmi Bakının Avropa Birliyini regionda sülhün bərqərar olmasında mümkün vasitəçi saymadığını da bəyanlayıb. Qeyd edək ki, bu vaxta qədər Azərbaycanın hakimiyyət rəsmiləri Qərbə inteqrasiyanın xarici siyastdə əsas prioritet olduğunu bildiriblər. Sözsüz ki, Qərbə inteqrasiyanın son nəticəsi də Avropa Birliyinə və NATO-ya üzvlükdür. Avropa Şurası, ATƏT kimi qurumlara üzvlük məhz Avropa Birliyi yolunda mərhələlər, qapılar sayılır. Fransanın Azərbaycandakı səfiri Qabriel Keller isə Azərbaycanın əsas problemi olan Qarabağ münaqişəsinin açarlarından birinin Azərbaycanın "can atmadığı" Avropa Birliyində olmasına eyham vurur. O, həmçinin Dağlıq Qarabağ münaqişəsinin nizamlanması prosesində Fransanın Avropa Birliyinin sədri qismində deyil, Minsk qrupunun həmsədri kimi fəaliyyət göstərdiyini də dilə gətirib: "Əlbəttə, Avropa Birliyinin bir çox üzv ölkəsi Minsk qrupunda təmsil olunur, bu baxımdan Avropa Birliyi də münaqişənin nizamlanması prosesində çox həlledici rol oynayır. Bu rol da danışıqlar irəlilədikcə daha da artacaq". Səfir onu da deyib ki, paradoksal olaraq, bu gün Dağlıq Qarabağ münaqişəsinin həll şansları Gürcüstandakı münaqişədən əvvəlki dövrə nisbətən daha çoxdur. Belə ki, Cənubi Qafqaz ölkələri öz zəifliklərinin, regional kontekstdən asılılıqlarının və hərb yolu ilə problemləri həll etməyin mümkünsüzlüyünün fərqinə varmağa başlayıblar: "Bu şəraitdə Minsk qrupunun irəli sürdüyü təşəbbüslərin-Nyu-Yorkda xarici işlər nazirlərinin görüşü, 15 oktyabrdan sonra prezidentlərin görüşünün planlaşdırılması - nəticə verəcəyinə daha çox şans var. Danışıqlarda qeydə alınan hər bir uğur regionun təhlükəsizliyi və rifahı naminə müsbət ölçülərlə davam etdiriləcək". "Atlas" Araşdırmalar Mərəkəzinin rəhbəri Elxan Şahinoğlu Qabriel Kellerin fikirlərində həqiqətin olduğunu söylədi. AB bölgədə önəmli rol oynamaqla yanaşı, münaqişələrin həllində də əsas fiqur sayılır: "Gürcüstandakı hadisələrə diqqət yetirsək görərik ki, beşgünlük müharibənin məntiqi sonu olaraq Rusiya ilə Gürcüstan arasında atəşkəs müqaviləsinin tez bir zamanda imzalanmasında Avropa Birliyi önəmli rol oynadı. Bu qurumun hazırkı sədri Fransa olduğundan prezident Nikola Sarkozinin bölgəyə səfərlərinin də müəyyən effektləri oldu. Avropa Birliyi bu hadisələrdən sonra Cənubi Qafqaza olan marağını artırıb. Avropa Birliyi həqiqətən də bu münaqişənin həllində daha aktiv rol oynaya bilər". Onun sözlərinə görə, əgər AB fəallığını artırarsa, bu münaqişənin həllində həlledici məqam sayılar. Avropa Birliyinin son vaxtlar regionun onun enerji ehtiyaclarını ödəməsində əhəmiyyətli rol oynadığını anladığını deyən ekspert bu səbəbdən qurumun Azərbaycanla bağlı həm də iqtisadi maraqlarını artırdığını bildirdi: "Hazırda "Nabucco" layihəsinin reallaşmasında Azərbaycan və Türkiyədən çox, Avropa Birliyi maraqlı olmalıdır. Əgər Avropa ölkələri rus qazından asılılığı aradan qaldırmaq istəyirlərsə, bu layihə ilə bağlı müəyyən mənada lobbiçiliyi də artırmalıdırlar. Çünki bir çox problemlər yaranıb ki, bu məsələlər də Bakı və Ankaradan asılı deyil. Ortada Rusiyanın güclü təzyiqləri və Orta Asiya ölkələrinin bu layihədə iştirakı ilə əlaqədar təminatın olmaması var. Türkmənistan qazı olmadan "Nabucco" layihəsi də işləməyəcək. Ona görə də son vaxtlar Azərbaycan rəsmilərinin Avropa Birliyinin həm iqtisadi, həm də siyasi məsələlərdə aktiv olmaması ilə bağlı verdiyi açıqlamaları məntiqli saymaq lazımdır. Fransa səfiri əgər bu fikirlərə söykənib öz narahatçılığını bildirirsə, qurumun müəyyən mənada fəaliyyətinin zəifləməsini də nəzərə almalıdır". xalqcebhesi