“Azərbaycan Dağlıq Qarabağ münaqişəsinin həlli ilə bağlı bəzi ümidverici təklifləri təhlil etməyə hazırdır” Prezident İlham Əliyevin sədrliyi ilə Nazirlər Kabinetinin 2008-ci ilin doqquz ayında sosial-iqtisadi inkişafın yekunlarına həsr olunmuş geniş iclası keçirilib Oktyabrın 13-də Azərbaycan prezidenti İlham Əliyevin sədrliyi ilə Nazirlər Kabinetinin 2008-ci ilin doqquz ayında sosial-iqtisadi inkişafın yekunlarına həsr olunmuş geniş iclası keçirilib. Prezident İlham Əliyev iclası açaraq deyib ki, Azərbaycanın uğurlu iqtisadi inkişafı çox dinamikdir və bu, son doqquz ayda da davam edib: “Bu müddətdə ümumi daxili məhsulun 15 faiz artması çox yüksək göstəricidir. Son dörd ildə Azərbaycanın iqtisadi inkişaf sürətinə görə dünyada liderliyini qoruması onu göstərir ki, ölkədə aparılan iqtisadi islahatlar davamlı və uzunmüddətlidir. Hazırda inflyasiya 21 faiz təşkil etsə də, dövlət bunun təsirinin minimuma endirilməsi üçün kompleks tədbirlər görür. Bu baxımdan əhalinin pul gəlirlərinin 34 faiz artması dövlətin məqsədyönlü siyasətinin bariz nəticələrindəndir”. Sosial məsələlərin dövlətin diqqətində olduğunu, minimum əmək haqqının, pensiyaların baza hissəsinin artırıldığını və humanitar sahədə görülən işlərin, büdcədən sosial məsələlərin həllinə və infrastruktur layihələrinə ayrılan vəsaitin insanların sosial rifahının yaxşılaşmasına təkan verdiyini bildirən dövlət başçısı regionların sosial-iqtisadi inkişafına dair Dövlət proqramının uğurla başa çatmasını, son beş ildə əksər rayonların iqtisadiyyatının 2 dəfədən çox artmasını da vurğulayıb. Prezident İlham Əliyev bildirib ki, son vaxtlar dünyada yaşanan maliyyə böhranı bir çox ölkələrin iqtisadi potensialına zərbə vurub: “Amma Azərbaycan düşünülmüş siyasəti ilə və güclü iqtisadiyyatla özünü bu böhranlı vəziyyətdən qoruyur. Bu da bizim düşünülmüş iqtisadi siyasətimizin, risklərə çox ehtiyatlı yanaşmağımızın nəticəsidir. Bu, ən düzgün siyasətdir. Azərbaycan bütün sahələrdə dünya iqtisadiyyatına çox sürətlə inteqrasiya edir və onun bir parçasıdır. Biz öz siyasətimizi elə aparmalıyıq və aparırıq ki, istənilən iqtisadi-siyasi böhran Azərbaycana təsir etməsin. Biz buna nail olmuşuq”. Azərbaycanın beynəlxalq mövqelərinin möhkəmləndiyini, regionda sabitləşdirici rol oynadığını və regional əməkdaşlığın möhkəmlənməsinə böyük töhfə verildiyini vurğulayan prezident İlham Əliyev deyib ki, biz müharibə şəraitində yaşadığımıza görə, ilk növbədə, hərbi potensialımızı gücləndirməliyik. Növbəti illərdə büdcə xərclərinin ən böyük hissəsi yenə də ordu quruculuğuna və hərbi gücümüzün artırılmasına yönəldiləcəkdir. Dövlət başçısı Ermənistan-Azərbaycan münaqişəsinə də toxunub və bildirib ki, münaqişənin nizamlanmasında müəyyən irəliləyişlər olsa da, konkret nəticə yoxdur: “Biz bəzi ümidverici təklifləri təhlil etməyə hazırıq. Azərbaycanın artan imkanları danışıqlarda mövqeyimizi daha da gücləndirir. Azərbaycanın ərazi bütövlüyü məsələsi heç kimdə şübhə doğurmur və biz hələ ki, danışıqların aparılmasına ehtiyac duyuruq. Bizim siyasətimiz dəyişməz və birmənalıdır. Münaqişə yalnız Azərbaycanın ərazi bütövlüyü çərçivəsində həllini tapmalıdır”. İclasda vergilər naziri Fazil Məmmədov, təhsil naziri Misir Mərdanov, səhiyyə naziri Oqtay Şirəliyev, Dövlət Sosial Müdafiə Fondunun sədri Səlim Müslümov çıxış ediblər. Prezident İlham Əliyev iclasa yekun vuraraq, doqquz ayın yekunlarını müsbət qiymətləndirib və deyib ki, bütün sahələrdə nəzərdə tutulan məsələlər öz uğurlu həllini tapıb. Gələn il makroiqtisadi sabitliyin qorunması, inflyasiyanın aşağı salınması diqqətdə olacaq, qeyri-neft sektorunun inkişafı, ərzaq təhlükəsizliyi prioritet məsələ kimi qalacaq. 2009-2013-cü illəri əhatə edəcək regionların sosial-iqtisadi inkişafı Dövlət proqramında indiyədək həll olunmamış məsələlər əksini tapacaq.