Rusiya şantaja əl atır "Kreml Qafqaz ölkələrini qondarma Cənubi Osetiya və Abxaziya ilə bir yerdə görmək istəyir" Rusiya separatçı respublikaların- Cənubi Osetiya və Abxaziyanın digər ölkələr kimi kimi ayrı-ayrı təşkilatlarda bərabərhüquqlu şəkildə təmsil olunması istiqamətində fəaliyyətə başlayıb. Hətta Kreml rəsmiləri separatçıları Qafqaz regionun ilə bağlı aparılan danışıqlara cəlb etmək istəyir. Bununla bağlı bəyanat verən Rusiya xarici işlər naziri Sergey Lavrov Qafqazda təhlükəsizliklə bağlı diskussiyaların Cənubi Osetiya və Abxaziyanın iştirakı olmadan nəticəsiz qalacağını bildirib: "Rusiya, Qafqazla bağlı o müzavkirələrdə iştirak edəcək ki, orada Cənubi Osetiya və Abxaziya da tam hüquqla təmsil olunsun". Rusiyanın xarici işlər naziri ortaya Kremlin qəti və kəskin mövqeyini də qoyub: "Bizim mövqeyimiz yaxşı məlumdur: Qafqazda təhlükəsizliklə bağlı diskussiyalar Cənubi Osetiya və Abxaziyanın iştirakı olmadan nəticəsiz qalacaq. Tural Rusiyaya gəldikdə isə, biz hər iki respublikanın başqaları ilə bərabər şəkildə təmisil olunduğu formatlarda iştirak edəcəyik". Mütəxəssislərin fikrincə, Moskvanın belə bir niyyətinin olması və separatçıların tanınması istiqamətində atcağı addımlar gözlənilən idi. Politoloq Rauf Mirqədirov şimal qonşumuzun regionla bağlı aparılacaq diskussiyalara Abxaziya və Cənubi Osetiyanı cəlb etməklə bağlı təklifləri siyasi şantaj kimi qiymətləndirdi: "Çünki Rusiya çalışır ki, Cənubi Osetiya ilə Abxaziyanın formal da olmasa, faktiki tanınmasına nail olsun. Yəni bu iki tanınmamış respublika ilə hüquqi baxımdan Qafqaz ölkələri arasında əlaqələr qurmağa cəhd edilir. Onsuz da beynəlxalq aləmdə separatçı respublikaları heç kim tanımayacaq. Hazırda söhbət ondan gedir ki, həm regionda həm də Qafqazın ətrafında müəyyən problemlər var ki, onları həll etmək lazımdır. Yəni indiki məqamda bu münaqişələrlə bağlı danışıqlarda aktullaşıb. Belə bir vəziyyətdən istifadə edən Moskva regionla bağlı danışıqlara yəqin ki, Abxaziya və Cənubi Osetiyanı müşahidəçi ya da digər qismlərdə cəlb etmək istəyir. Amma düşünmürəm ki, bu siyasət Kreml üçün uğurlu alınacaq". Rauf Mirqədirovun sözlərinə görə, regiondakı sülh və təhlükəsizliklə bağlı olan Qafqaz Sabitlik və Əməkdaşlıq Platforması yaradılması təşəbbüsü Türkiyəni ideyası olduğu üçün Rusiyanın bu təklifi həm də müəyyən mənada Ankaranın təşəbbüsünə qarşı çıxmaq kimi də qiymətləndirilməlidir. Politoloqun fikrincə, region dövlətlərinin separatçıların danışıqlarda iştirakını dəstəkləmələri də inandırıcı görünmür. Türkiyə belə bir addım atmaz. Çünki belə bir təklifə razılığın verilməsi Qərbin maraqlarına qarşı çıxmaq deməkdir. Gürcüstan isə öz "ölümünə" qol çəkməz və Azərbaycanın hər iki separatçı rejimin hansısa danışıqlarda iştirakına razılıq verməsi özü üçün Dağlıq Qarabağ məsələsində presedent yaratması olacaq: "Bu məsələdə yalnız Ermənistanın mövqeyi sual altında ola bilər. Yəni bu daha çox şantaj əhəmiyyəti daşıyan bir addımdır. Kreml rəsmiləri bununla demək istəyirlər ki, əgər Qafqaz ölkələri Cənubi Osetiya və Abxaziya ilə danışıqlar aparmasa, biz də bu diskussiyalara və müəyyən formatlara cəlb olunmayacağıq. Amma sadə insanlar da bilirlər ki, hazırda Qafqazda hansı proseslər cərəyan edir və bu hadisələrin törədilməsində kim maraqlıdır. İndiki halda Qafqazda real, hər an yenidən alovlanacaq problemlər var və bu məsələləri həll etmək lazımdır. Yoxsa hansısa bütün regionun marağına zidd siyasət yürütməklə bu münaqişələrin həllinə nail olmaq mümkün olmayacaq. Ona görə də düşünürəm ki, Rusiya bu hədədən o tərəfə addım atmayacaq". Politoloqun fikrincə, Azərbaycanın da nə vaxtsa Dağlıq Qarabağdakı separatçı rejimin "regional diskussiyalarda iştirakı təmin olunmalıdır" tələbilə üzləşəcəyi inandırıcı görünmür: "Ermənistanın bu cür şantaj xarakterli bəyanatlarla çıxış edəcəyi ağlabatan siyasi addım olmaz. Çünki artıq Rusiya bu tələbi ortaya qoyub və bunun təkrarlanması üçün ən azından Kreml İrəvana icazə verməyəcək. Yəni bədnam qonşumuz hansısa xarici qüvvələrdən çox ciddi dəstək almasa belə bir şərtlər qoya bilməz. Amma Serj Sarkisyanın da hazırkı çalışmaları ona köklənib ki, Dağlıq Qarabağdakı separatçılar ayrıca bir tərəf kimi Azərbaycanla aparılan sülh danışıqlarda təmsil olunsun. Regionla bağlı diskussiyalarda qondarma rejimin iştirakı ilə bağlı təkliflərə gəldikdə isə, bu addımın atılması effektli olmayacaq. Rusiya bu təklifinin arxasında dayanmayacaq. Çünki bu real siyasət deyil. Əsl siyasətdə real problemləri həll etmək lazımdır. Real problemlərin həlli üçün isə heç vaxt maksimalist addımlar atılmır". xalqcebhesi