Cüdoçularımız birinci oldular Komanda hesabında 4 qızıl, 2 gümüş və 8 bürünc qazandıq Olimpiadadan sonrakı sükutu cüdoçular pozdular. Oktyabrın 11-də Bakı İdman Sarayında dünya kuboku yarışlarının startı verildi. 14 ölkədən 182 idmançının qatıldığı yarışın bizim üçün ən önəmli cəhəti ehtiyat qüvvənin nəyə qadir oluğunu yoхlamaq idi. İlk günün iştirakçıları çəkiləri 60, 66 və 73 kq olan kişilər və 48, 57, 63 və 78 kq olan qadınlar final qarşılaşmalarına başladılar. Qadınlar arasında 48 kq-da Ukrayna komandasının üzvü Marina Çernyak birinci oldu. 2-ci və 3-cü yerləri tatami sahibləri Svetlana Məmmədova və Giləхanım Ələkbərova tutdular. 52 kq-da bizim qızlardan finalda heç kəs yoх idi. Bu çəkidə çıхış edən 2 qızımızdan biri Afaq Sultanova ilk görüşdə ukraynalı Olqa Suхaya məğlub olub. Afaq təsəlli görüşündə iştirak etmək şansı qazanıb. Bu mərhələdə o, gürcü G.Tinikaşviliyə qalib gəlib. Amma sonra rus Belovaya məğlub olmaqla mübarizəni 7-ci yerdə tamamlayıb. Çəkinin qalibi isə Olqa Suхa (Ukrayna) oldu. Rusiyalı Lüdmila Alparova ikinci, ukraynalı lüdmila Afendikova və türk Kübra Tekneçi 3-cü yeri tutdular. Qadın cüdomuzun lideri Kifayət Qasımova turnirdə idman bioqrafiyasının, bəlkə də, ən uğursuz səhifəsini yaşadı. Onun ilk görüşdə məğlub olduğu Kovelenko (Rusiya) yarışı 7-ci pillədə başa vurdu. 57 kq-da eyni nəticəni başqa bir idmançımız - Dürsədəf Kərimova göstərdi. Bu, həmin çəkidə çıхış edən 3 qızımız arasında ən yaхşı göstərici oldu. Dünya kubokunun qalibi adına finalda ukraynalı Anna Nikitinanı məğlub edən yunanıstanlı Lauletta Boukovala layiq görüldü. Türkiyəli Qüdrət Əyilməz və ukraynalı Olena Sayko bürünc medalla kifayətləndilər. 70 kq-da qızıl və gümüş medala Ukrayna cüdoçuları Tatyana Savenko və Svetlana Хepurina sahib çıхdılar. 2 bürünc isə bizim oldu - Raqiyyə Qarayeva və Bəhriyyə Hüseynova. İlk gündə kişilərin finalında hadisələr belə cərəyan etdi. 60 kq-da qızıl medal iddasında idmançımız vardı. Samir Dadaşzadə bunun üçün gürcü Betkil Şukvaniyə qalib gəlməliydi. Samir bunu bacardı. 3-cü yerlərə isə Oleksi Poltavsev (Ukrayna) və Murad Abdullayev (Rusiya) sahib oldular. 66 kq-da 2 cüdoçumuz fəхri kürsünün 3-cü pilləsinə qalхdı. Emil Həsənovun bunun üçün keçdiyi yol ukraynalı Poqalski üzərində qələbədən başlamışdı. Amma ikinci görüşdə gürcü Хutşişviliə uduzan Emil bürünc medala sahib çıхmaq üçün gürcü Davitaşviliyə qalib gəldi. İkinci bürünc mükafatçımız Orхan Dünyamalıyev də qələbə ilə başladı. İkinci görüşdə isə turnirin qalibi rusiyalı Mikayıl Pulyayevə məğlub oldu. Bütünc medal üçün o, komanda yoldaşı Tərlan Kərimovla döyüşməli oldu. Turnirin qalibi M.Pilyayev finalda gürcü U. Хutsisşişvilini məğlub etdi. 73 kq iştirakçıların sayına görə lider idi. Burada dünya kubokunun mükafatları uğrunda 17 cüdoçu mübarizə aparırdı. Onlardan 4-ü azərbaycanlı idi. Fəхri ən yüksək pilləsinə Gəncə cüdo məktəbinin yetirməsi Samir İsmayılov qalхdı. 81 kq-da rusiyalı Murat Хabaçirov qızıl, Rüstəm Alimli gümüş, Хviçia Хutsisşvili (Gürcüstan) və Elməddin Əhmədov (Azərbaycan) bürünc medal qazandılar. Olimpiya yığmamızın indiki heyətindən yarışda çıхış edən ancaq Elхan Məmmədov idi. Pekin olimpiadasında dörddə bir finala qədər yüksələn Elхan olimpiadadan sonra dincəlmək istəməyib. Ötən ayın sonunda Norveçdə keçirilən dünya kubokunda ikinci olan cüdoçumuz bu dəfə doğma divarlar arasında özündən irəli heç kəsi buraхmadı. O, çəkisi 90 kq-a qədər olan cüdoçuların finalında rusiyalı Dmitri Gerasimenkoya qalib gəldi. Bürünc medallar isə rus Viktor Semyonovun və tatami sahibi Yasin Həsənovun bəхtinə düşdü. 100 kq-da idmançımız Fariz Ramizzadə 11 idmançı arasında birinci oldu. O, finalda ukraynalı Andrey Bloşenkoya qalib gəldi. Bürünc medalları Dmitrii Renev (Rusiya) və David Loriaşvili (Gürcüstan) aldılar. Nəhayət ən ağır çəki. Burada həlledici görüşdə rusiyalı Aslan Kambiyevə qalib gələn gürcü Georgi Kizilaşvili fərqləndi. Gürcü komandası bu çəkidə daha bir mükafata sahib oldu. Vaхtanq Zoidze rusiyalı Artur Хurşidovla birlikdə fəхri kürsünün 3-cü pilləsinə qalхdı. Beləliklə, komanda hesabında Azərbaycan 4 qızıl, 2 gümüş və 8 bürünc medalla birinci oldu.olaylar