“AMERİKA ƏSGƏRLƏRİ AZƏRBAYCANA GƏLƏCƏK” Vəfa Quluzadə: “Çox yaxında, özü də ildırım sürətilə Amerika bazalarının Azərbaycanda mövcudluğu məsələsi reallaşacaq” Son zamanlar ABŞ-ın Azərbaycana münasibətinin yaxşılığa doğru dəyişdiyi barədə müxtəlif şərhlərə rast gəlinir. Xüsusilə də amerikalı həmsədr Metyu Brayzanın Dağlıq Qarabağ probleminin həllində Azərbaycanın ərazi bütövlüyü prinsipinin prioritet olduğunu deməsi Ağ Evin Azərbaycan siyasətinin dəyişməsi kimi yozulur. Bəzi ekspertlərə görə, dərhal nikbin fikirlər söyləmək üçün əsaslar yoxdur və Brayzanın açıqlaması az sonra öz əhəmiyyətini itirə bilər. Bununla belə, hesab olunur ki, Amerika indiki situasiyada Azərbaycanı Rusiya təhdidindən qorumaqdan ötrü siyasətində korrektələr edib. Ortaya sual çıxır, ABŞ Azərbaycanı qorumaqdan ötrü hansı təsir mexanizmlərinə malikdir və konkret olaraq hansı addımları ata bilər? Politoloq Vəfa Quluzadə əmindir ki, Amerika özünün əsgəri bazalarını Gürcüstan və Ukrayna ilə yanaşı Azərbaycanda da yerləşdirəcək: “Çox keçməyəcək ki, hər üç ölkə NATO ölkələrinə çevriləcək”. V.Quluzadənin sözlərinə görə, Amerika Azərbaycanı özünə yaxın müttəfiq sayır və bu münasibətlər getdicə daha da yaxşılaşacaq: “Çünki Azərbaycan Amerika üçün önəmli bir ölkədir. Amerika burda əsgəri bazalarını yaratmaqla regiona nəzarətini gücləndirəcək. Çox yaxında, özü də ildırım sürətilə Amerika bazalarının Azərbaycanda mövcudluğu məsələsi reallaşacaq. Bu bazaların yaradılmasında əsas məqsəd İran, Əfqanıstan, Pakistan, həmçinin Rusiyanın şimal hissəsini nəzarətdə saxlamaq olacaq". Ekspertə görə, çox keçməyəcək Rusiya ciddi sarsıntılarla üzləşəcək: “Bu ölkədə ərzaq, yanacaq böhranı gözlənilir. Rusiya artıq büdcə kəsirini doldura bilmir. Ümumiyyətlə, Rusiya getdikcə SSRİ-nin gününə düşür. Sovet İttifaqı bütün respublikaları buraxmağa məcbur olduğu kimi, indi bu böhran Rusiyanı da Tatarıstan kimi büdcəsinə maliyyə ayırdığı respublikalarla bağlı tərəddüdə qoyub. Bu böhran 3 il davam etsə, mən tam əminəm ki, Rusiya federativ yox, ən azı konfederativ dövlətə çevriləcək. O zaman Kalininqraddan tutmuş Vladivostoka qədər dövlət olmayan bir çox muxtar respublikaların müstəqilliyi məsələsi ortaya çıxacaq”. Qarabağ məsələsinin həllinə gəldikdə, V.Quluzadə Qarabağ probleminin Madrid prinsipi əsasında həll olunmaq üzrə olduğu barədə bəyanatları qeyri-ciddi saydı: “Birincisi, danışıqlar irəliyə doğru getmir və bu, yalandır. İkincisi isə Azərbaycan bu prinsipləri hələ qəbul etməyib. Madrid prinsiplərində Azərbaycanın Qarabağ ermənilərinə referendum keçirməyə icazə verməsi, separatçıların özlərini müstəqil elan etməsi, bundan sonra isə Ermənistanın Azərbaycanın ərazi bütövlüyünü tanıması məsələləri əks olunub ki, rəsmi Bakı bunu qəbul edə bilməz”. V.Quluzadə hesab edir ki, Qarabağ məsələsi yalnız geosiyasi dəyişikliklər nəticəsində həll oluna bilər: “Qafqaz regionu indiyədək Rusiyanın malikanəsi idi. Ancaq artıq NATO Qafqaza doğru genişləndiyi üçün Rusiyanın nüfuzu güclü surətdə laxlayır. 2001-ci ildə yazırdılar ki, NATO-nun Qafqaza gəlməsi bir nağıldır. Yadımdadır ki, o zaman ”Frans press" bu məsələ ilə bağlı mənim nikbin fikirlərimdən sitat gətirmişdi. Proqnozlar özünü doğrultdu, artıq NATO Qafqaza gəlir. NATO-nun Qafqaza gəlməsi isə avtomatik olaraq Rusiyanın Qafqazdan çıxması deməkdir. Mən Rusiyanın gələcəyi ilə bağlı digər bir proqnoz da verirəm. Hazırkı dünya böhranı 2-3 il çəkəcək. Ondan sonra isə dünyada qüvvələrin balansı tamam dəyişəcək. Bu zaman Rusiya NATO-ya tabe olacaq. Ondan sonra biz Rusiya ilə NATO-da müttəfiq olacağıq". Cavid TURAN musavat