UKRAYNADA NÖVBƏDƏNKƏNAR SEÇKİLƏR DEKABRIN 7-də OLACAQ Siyasi böhranın sonu isə görünmür Ukraynada oktyabrın 8-də axşam prezident Viktor Yuşşenkonun parlamentin buraxılması haqda fərmanı və xalqa müraciəti elan olunub. İtaliyada səfərdə olan Yuşşenkonun televiziya ilə müraciətində bildirilib ki, o, ölkədə yaranmış siyasi böhrandan çıxış yolunu yeni seçkilər təyin etməkdə görür. Ukrayna prezidenti müraciətində Konstitusiya ilə ona verilən səlahiyyətlərdən istifadə edərək parlamenti buraxdığını və növbədənkənar seçkilər təyin etdiyini bildirib. Yuşşenko parlamentdəki fraksiyaların qanunda nəzərdə tutulan 30 gün ərzində koalisiya yarada bilmədiklərini vurğulayıb. Konstitusiya isə prezidentə həmin vaxt başa çatandan sonra parlamenti buraxmaq səlahiyyəti verir. Xatırladaq ki, sentyarın 3-də hakim “narıncı ”koalisiya baş nazir Yuliya Timoşenkonun rusiyameylli qüvvələrlə əlbir olaraq prezidentin səlahiyyətlərini məhdudlaşdıran qanun layihəsini qəbul etməsindən sonra dağılıb. Belə ki, prezidenti dəstəkləyən “Bizim Ukrayna” bloku hakim koalisiyadan çıxıb, yeni koalisiya isə qurulmayıb. Yuşşenko yeni seçkilərin vaxtını deməsə də prezident administrasiyasından bildiriblər ki, seçkilərin dekabrın 7-nə təyin edilməsi haqda fərman hazırlanır. İtaliyada səfərini davam etdirən Yuşşenko isə jurnalistlərə açıqlamasında yeni hökumət formalaşdırılanadək Yuliya Timoşenkonun baş nazirin səalhiyyətlərini icra edəcəyini, nazirlərin isə öz vəzifələrində qalacaqlarını bildirib. Yuşşenko öz adına seçki bloku formalaşdıracağını da istisna etməyib. Bu arada ötən seçkilərdə “Bizim Ukrayna” bloku ilə birlikdə seçkilərə qatılmış “Xalq özünümüdafiəsi” bloku prezidenti dəstəkləyən qüvvələrlə koalisiyadan çıxıb. Daxili işlər naziri Yuri Lutsenkonun başçılıq etdiyi bu hərəkat Ali Radaya növbədənkənar seçkilərdə “Bizim Ukrayna” partiyası ilə bir yerdə iştirak etmək niyyətində deyil. Həmin blokdan deputat Taras Stetskiv artıq “Bizim Ukrayna - Xalq özünümüdafiəsi” blokunun mövcud olmadığını bəyan edib. Statskiv bildirib ki, “Xalq özünümüdafiəsi” bloku qarşıdan gələn seçkilərdə bu və ya digər şəkildə “Yuliya Timoşenko bloku” ilə birləşəcək. O, prezident Viktor Yuşşenkonun Ali Radanı buraxmasını da “Ukrayna dövlətinə qarşı son dərəcə məsuliyyətsiz addım” adlandırıb. Yerli müşahidəçilərə görə, növbədənkənar seçkilərdə prezidenti dəstəkləyən qüvvələrin şansı yüksək deyil. Lakin belə şəraitdə seçkilərə getmək Timoşenko üçün də sərfəli deyil. Ona görə də Timoşenko prezidentin parlamenti buraxmasını qanunsuz sayaraq məhkəməyə şikayət etməyə hazırlaşır. Regionlar Partiyasının lideri Viktor Yanukoviç isə iqtidardakı demokratik qüvvələrin arasındakı ziddiyyətlərdən bu seçkilərdə faydalanmaq istəyir. Bildirilir ki, Ukraynada sonu görünməyən siyasi böhran ölkənin NATO-ya üzvlük arzularına da zərbə vura bilər. ABŞ-ın Kiyevdəki səfiri Uilyam Teylor bildirib ki, ölkədə qeyri-stabillik Ukraynaya üzvlük planının təqdim edilməsinə mane olacaq. Gözlənilirdi ki, dekabrda alyans Ukraynaya üzvlük planını təqdim edə bilər. F.MƏMMƏDOV musavat