Rusiyanın Gürcüstana yeni "sürprizi" "Kreml təkcə erməni separatizmindən deyil, Məhsəti türklərinin problemlərindən də yararlanmağa çalışır" Oktyabrın 6-da keçirilən "İrəvan-Tiflis" telekörpüsü zamanı gürcü politoloqu isə Soso Siskarişvili bildirib ki, Axalkələki vasitəsilə Batumu Ermənistanla birləşdirən yol gələcəkdə rus qoşunları üçün Gürcüstana cənubdan "giriş qapısı" ola bilər: "Rəsmi Tiflis İrəvan-Batumi yolu ilə bağlı müəyyən narahatçılıq içindədir. Bu gün Samtse-Cavahetiyanın erməni əhalisinə Rusiya Federasiyasının pasportu verilir. Əgər Ermənistan hakimiyəti öz soydaşlarına müvafiq təzyiq göstərməsə, rəsmi Tiflis növbəti separatizm ocağının yaranmaması üçün addımlar atacaq". Mütəxəssislərin fikrincə, Cavahetiya ermənilərinin Rusiyanın Gürcüstana təcavüzündən yararlanacağı əvvəlcədən proqnozlaşdırılır. Politoloq Rauf Mirqədirova görə, Gürcüstanda yaşayan etnik ermənilərə rus pasportlarının verilməsinin xəbəri yeni deyil: "Moskvanın təkcə Gürcüstanda deyil, eyni zamanda Krımda və Azərbaycanın şimal rayonlarında Rusiya pasportlarını paylaması haqda xəbərlər yayılıb. Tural Hətta Qərb dövlətləri bu məsələni araşdırmaq üçün rəsmi Kiyevə kömək edəcəklərini bəyanlayıblar". Politoloqun sözlərinə görə, bu əslində ən ciddi problem sayılmalıdır. Xüsusən də Gürcüstanda baş verənlər göstərdi ki, Kreml bu amildən çox yararlanır. Yəni indi açıq bir situasiya yaranıb: "Əgər bu adamlar Rusiya vətəndaşlarıdırsa, bu halda onlar Gürcüstanın və ya digər ölkələrin siyasi həyatında hansı rol oynayırlar? Yəni nə üçün başqa ölkənin vətəndaşı sənin ərazində yaşasın və sənin qanunlarına tabe olmasın. Ermənilərə rus pasportlarının paylanması məsələsinin həlli Gürcüstanın Qərb dövlətlərilə münasibətlərindən asılı olacaq. Əgər bu ölkələr Gürcüstanı birmənalı şəkildə dəstəklədiklərini bildirəcəklərsə və bu ölkəni təsir dairəsinə daxil etdiklərini nümayiş etdirəcəklərsə, bu halda Rusiya Gürcüstanla növbəti ciddi qarşıdurmaya getməyə cəsarət etməyəcək. Çünki artıq bu NATO və ABŞ-la qarşıdurma olacaq". Ekspertin sözlərinə görə, yeni qarşıdurma Gürcüstanın da maraqlarına cavab verməyəcək, hətta İrəvan da maraqlı görünmür: "Ermənistan da blokada şəraitində yaşadığından Avropaya yeganə tranzit yolu sayılan Gürcüstanda ikinci qarşıdurmaya qol çəkə bilməz. Əgər ABŞ və Avropa Tiflisə açıq dəstək verməsə, bu ölkəni NATO-ya üzv qəbul etməsə, Kreml təkcə erməni separatizmindən deyil, Məhsəti türklərinin problemlərindən də yararlanmağa çalışır. Artıq Rusiya Dövlət Duması Məhsəti türkləri haqda Gürcüstanın öhdəlikləri yerinə yetirməsilə bağlı məsələni müzakirəyə çıxarmaq istəyir. Bu doğrudan da çox riyakar bir mövqedir. Çünki bu problem özünü SSRİ-nin varisi sayan Rusiya ilə birbaşa bağlıdır. Əslində ruslar tatarların Krıma qaytarılmasını da istəmirlər. Amma Moskva bu prosesi Krımdakı rusların sıxışdırılması kimi qiymətləndirir. Bü ikiüzlü siyasət və etnik problemlərdən istifadə edilməsi xəttinin tutulması Rusiyanın qonşu dövlətlərə münasibətinin aparıcı elementlərinə çevrilib". Rauf Mirqədirov Kremlin Azərbaycana da sürpizlər hazırladığını bildirdi: "Xaçmazın iki kəndinin əhalisin əksəriyyəti Rusiya vətəndaşlığını daşıyan etnik ruslardan ibarətdir. Rusiya hesab edir ki, bu məsələ orada yaşayan insanların maraqları çərçivəsində həll olunmalıdır. Əgər bu ərazilər icarəyə verilibsə, icarə haqqı ödənilir və ya yenidən icarə müqaviləsi bağlanır. Həmin insanlar Rusiya vətəndaşları kimi kəndlərdə yaşayaraq torpaqlardan istifadə edirlər. Bu halda həmin insanların Azərbaycan hökuməti ilə hüquqi öhdəlikləri müəyyənləşdirilməlidir. Əgər icarə məsələsində razılıq əldə olunmursa, Rusiya vətəndaşlarını öz ərazisində yerləşdirməlidir. Vaxtilə həmin kəndlərə köçürülmüş ruslar Azərbaycan vətəndaşlığını da qəbul edə bilərlər. Rusiya isə bu məsələni hələlik uzatmağa çalışır: "Amma Moskva hələlik bu cür faktlardan Azərbaycana qarşı açıq təzyiq vasitəsi kimi istifadə etmir". Rauf Mirqədirovun sözlərinə görə, şimal qonşumuz istəsə, kiçik görünən bu məsələni qarşıdurma səviyyəsinə qaldıra bilər. Bu baxımdan hökumət araşdırmalıdır ki, nə qədər Azərbaycan vətəndaşı eyni zamanda Rusiya vətəndaşıdır: "Əgər bu insanlar Rusiya vətəndaşlığından imtina etməsələr, onların Azərbaycan vətəndaşlığından çıxarılması proseduru başlanmalıdır. Əks təqdirdə, Cavahetiyada və Krımda olan problemlər Azərbaycanın şimalında da təkrarlana bilər".