Lavrov MDB-də optimist əhval-ruhiyyə yaratmağa çalışır "Gürcüstanın qurumu tərk etməsi Rusiya üçün qanqaraldıcı hadisədir" Ötən gün MDB Xarici İşlər Nahirləri Şurasının Qırğızıstanın paytaxtı Bişkekdə növbəti toplantısı keçirilib və Gürcüstanın MDB-dən çıxmaq haqqında müraciətinə baxılıb. Toplantıdan sonra Rusiyanın xarici işlər naziri Sergey Lavrov bildirib ki, Gürcüstanın MDB-dən çıxmaq haqqında müraxiəti təsdiqlənib. Onun sözlərin görə, bu ölkənin qurumdan çıxması 2009-cu ilin avqustunda rəsmiləşəcək. Həmin vaxta qədər bununla bağlı texniki məsələlər həll olunacaq. Sergey Lavrova görə, Gürcüstanın MDB-dən çıxması bu təşkilat üçün mənfi nəticələr doğurmayacaq, çünki Tiflisin son illər təşkilatdakı fəaliyyəti daha çox "korroziya" yaradıb. Rusiyanın xarici işlər naziri Ukraynanın da Gürcüstanın ardınca MDB-dən çıxacağı haqda deyilənlərin düzgün olmadığını iddia edib. Onun fikrincə, Ukrayna bu təşkilat çərçivəsində əməkdaşlığı möhkəmləndirəcək. Ramiz Mikayıloğlu Qeyd edək ki, Rusiyanın Cənubi Osetiya üzərində suveren hüquqlarını bərpa etmək üçün hərbi əməliyyatlara başlamış Gürcüstana müdaxidəsindən sonra Tiflis MDB-dən çıxmaq barədə qərar verib. Həmin dönəmdə Ukrayna prezidenti Viktor Yuşşenko Ukraynanın da MDB-dən çıxması ilə bağlı məsələnin gündəmə gələcəyini söyləmişdi. Hətta bununla bağlı Ali Radaya qanun layihəsi də göndərilmişdi. Verilən açıqlamalardan o da məlum olmuşdu ki, Ukrayna Ali Radası MDB-nin Nizamnaməsini bu vaxta qədər ratfikasiya etmədiyi üçün təşkilatla körpüləri qırmaq elə də çətin olmayacaq. Lakin ölkədə hökumət böhranının yaranması, parlamentin işinin iflic olması fonunda bu məsələ kölgədə qaldı. Sergey Lavrovun bəyanatına münasibət bildirən politoloq Nəsib Nəsibli deyir ki, MDB-də lider statusuna malik bir dövlət kimi Rusiya üçün Gürcüstanın qurumu tərk etməsi qanqaraldıcı bir hadisədir. Belə bir şəraitdə Serjey Lavrov MDB Nazirlər Şurasının iclasın guya "Gürcüstanı MDB-dən çıxarmaq" əhval-ruhiyyəsində keçirilməsi yönündə təəssüratın formalaşmasına çalışır: "Gürcüstanın MDB-dən çıxdığı bir halda digər bir dövlətin-Ukraynanı da çıxması ehtimalı qarşısında təşkilatın lideri pessimist əhval-ruhiyyənin yaranmasının qarşısını hər vəclə almağa çalışır. Sözsüz ki, təşkilatın lider dövləti həmişə optimist əhval-ruhiyyədə görünməyə çalışmalıdır və Sergey Lavrov da belə davranıb". Nəsib Nəsibliyə görə, Rusiyanı Ukraynada baş verən son böhran, "narıncı" koalisiyanın dağılması və növbədənkənar parlament seçkilərinin keçirilməsi barədə qərar verməsi də ruhlandırır: "Çünki bu seçkilərin nəticələrini öncədən proqnozlaşdırmaq çətindir. Mümkündür ki, seçkilərdən sonra hökumətin rusiyayönümlü Regionlar Partiyası təşkil etsin və bu partyianın sədri Viktor Yanukoviç də baş nazir olsun. O halda Ukraynadakı formalaşdırılacaq rusyönümlü hökumət də MDB çərçivəsində əməkdaşlığın qorunmasında və genişləndirilməsində maraqlı olacaq. Bu baxımdan Sergey Lavrovun ümidlərini başa düşmək olar". Ukraynada növbədənkənar parlament seçkilərinin keçirilməsi isə dekabrın 7-də gözlənilir. "Narıncı" düşərgədə vəziyyət həqiqətən heç də yaxşı deyil. Məsələn, ötən seçkilərdə prezident Viktor Yuşşenkonu dəstəkləyən "Bizim Ukrayna" Partiyasıyla birlikdə seçkilərə qatılmış "Xalq Özünü Müdafiə" bloku bu koalisiyadan çıxıb. Daxili işlər naziri Yuri Lutsenkonun başçılıq etdiyi bu hərəkat Ali Radaya növbədənkənar seçkilərdə "Bizim Ukrayna" partiyasıyla birgə iştirak etmək niyyətində deyil. Həmin blokdan deputat olan Taras Stetskiv artıq "Bizim Ukrayna-Xalq Özünü Müdafiə" ölokunun mövcud olmadığını bəyanlayıb. O bildirib ki, "Xalq Özünü Müdafiə" bloku qarşıdan gələn seçkilərdə bu və ya digər şəkildə baş nazir Yuliya Timoşenkonun bloku (YTB) ilə birləşəcək. Rusiyayönümlü Regionlar Partiyasının lideri Viktor Yanukoviç də bu seçkilərdə demokratik qüvvələr arasındakı ziddiyyətlərdən yararlanmağa hazırlaşır...