"Rusiya amili olmasaydı, Azərbaycan siyasətinin cizgiləri, oriyentirləri daha aydın, ardıcıl və sistemli ola bilərdi" Xarici işlər nazirinin müavini Araz Əzimov Avropa Siyasəti Mərkəzinin Brüsseldə keçirilən konfransında sensasiyalı bəyanatlar səsləndirib. O, Azərbaycanın Gürcüstan və Ukraynadan fərqli olaraq Avropa Birliyinə üzv olmağa can atmadığını söyləyib. Araz Əzimov rəsmi Bakının Avropa Birliyini rejgionda sülhün bərqərar olmasında mümkün vasitəçi saymadığını da bəyanlayıb. Qeyd edək ki, bu vaxta qədər Azərbaycanın hakimiyyət rəsmiləri Qərbə inteqrasiyanın xarici siyastdə əsas prioritet olduğunu bəyanlayıblar. Sözsüz ki, Qərbə inteqrasiyanın son nəticəsi də Avropa Birliyinə və NATO-ya üzvlükdür. Avropa Şurası, ATƏT kimi qurumlara üzvlük də məhz Avropa Birliyi yolunda mərhələlər, qapılar sayılır. Elə az əvvəl Azərbaycanın Avropa Şurası Parlament Assambleyasındakı nümayəndə heyətinin üzvü Gültəkin Hacıyeva da müsahibəsində anoloji bənzətmələr aparmışdı. Ramiz Mikayıloğlu Bəs nə baş verir? Araz Əzimovun açıqlamalarını Azərbaycanın xarici siyasətində kordinal dəyişikliklərin baş verdiyininmi təzahürüdür, bu bəyanatları nədər şərtləndirib? Məsələylə bağlı fikirlərini öyrəndiyimiz politoloq Qabil Hüseynli bildirdi ki, Azərbaycanın Avropa Birliyinə üzv olmağa can atmaması barədə verilən bəyanat heç də xalqımızın rəyini əks etdirə bilməz və təəccüblə qarşılanmalıdır. Məsələn, Türkiyə on illərdir ki, Avropa Birliyinə üzvlüyə can atır və Birliyə üzvlüyün verdiyi üstünlüklər hamıya bəllidir. Söhbət yüksək iqtisadi inkişaf, əhalinin maddi rifahı, Avropa məkanında sərbəst hərəkət, iş və s. imkanların əldə olunmasından gedir. Politoloq vurğuladı ki, əgər Araz Əzimovun düşüncəsi hakimiyyətin düşüncəsidirsə, bu, yanlış siyasi kursdur və bunu qəbul etmək olmaz: "Çünki Qərbyönümlü siyasət kursu yürütdüyünü bəyanlayan hakimiyyət Qərbyönümlü siyasətin ən mühüm komponentlərindən imtina edirsə, deməli, sadəcə, söz oyunu ilə məşğuldur". Avropa Birliyini rəsmi Bakının Dağlıq Qarabağ münaqişəsinin tənzimlənməsində mümkün vasitəçi saymamasına gəlincə, politoloqun sözlərinə görə, faktiki ATƏT-i də, ATƏT-in Minsk qrupunu da təşkil edən əsas dövlətlər Avropa Birliyinə üzv ölkələrdir: "Məncə, həmin ölkələr də Dağlıq Qarabağ probleminə münasibətdə Rusiyayla müqayisədə daha müsbət, ob ektiv münasibət sərgiləyirlər. Doğrudur, məsələnin həlliylə bir təşkilat məşğul olmalıdır. Əgər başqa bir təşkilat da problemin həllinə impulslar verirsə, bundan imtina etməyin heç bir mənası yoxdur". Qabil Hüseynli xatırlatdı ki, Azərbaycan həm də Avropa Birliyilə qonşuluq münasibətləri statusuna malikdir. Dəfələrlə Avropa Birliyinin nümayəndələri Bakıda olub, Azərbaycan rəhbərliyilə söhbətlər aparıb: "Qərbin ən böyük dövləti ABŞ-ın nümayəndəsi Metyu Brayza son dərəcədə prinsipial fikir səsləndirir və Dağlıq Qarabağın probleminin yalnız Azərbaycanın ərazi bütövlüyü çərçivəsində həllinin mümkün olduğunu söyləyir. Bu, bütövlükdə problemə yanaşmanın fəlsəfəsini və siyasətini dəyişdirəcək bir fikirdir. Bu mənada Araz Əzimovun söylədiyi fikirlərdə rasionallıq görmürəm". Politoloq hesab edir ki, rəsmi Bakının xarici işlər nazirinin müavini səviyyəsində səsləndirdiyi bəyanatların əsas səbəbi Rusiya amiliylə bağlıdır: "Rusiya amili olmasaydı, Azərbaycan siyasətinin cizgiləri, oriyentirləri daha aydın, ardıcıl və sistemli ola bilərdi".