Mübariz Əhmədoğlu: "Avropa ölkələri ilə Fransa arasında fikir ayrılıqları var" Avropanın alternativ marşrutlar üzərində axtarışları davam etdirdiyi bir vaxtda rəsmi Moskva yenidən Cənubi Qafqazda həyata keçirilən enerji layihələrinin perspektivsizliyi məsələsini gündəmə gətirib. Bu günlərdə açıqlama verən Rusiyanın xarici işlər nazirinin müavini Andrey Denisov Mərkəzi Asiya və Azərbaycan qazının Avropaya nəqlini nəzərdə tutan NABUKKO layihəsini kağız üzərində olan məsələ adlandırmaqla yanaşı, BTC-nin təhlükəsizliyinin təmin olunması məsələsi ilə bağlı da üstüörtülü mesajlar verib. Bu kəmərin işləməsinin regiondakı sabitliyin vəziyyətindən asılı olduğunu bildirən Rusiya rəsmisi öz ölkəsinin BTC-yə qarşı olmadığını bildirib. Onu da qeyd edək ki, BTC-nin Türkiyə ərazisindən keçən hissəsində partlayış baş verdikdən sonra Rusiyanın Gürcüstan ərazisinə hərbi təcavüz etməsi rəsmi kəmərdə baş verən partlayışda Rusiyanın əli olduğu barədə versiyaların irəli sürülməsi ilə müşayiət olunmuşdu. Bu versiyaları rəsmi Moskva dəfələrlə təkzib etsə də, Rusiya rəsmilərinin son vaxtlar BTC ilə bağlı məsələləri gündəmə gətirməsi birmənalı qarşılanmır. Siyasi Texnologiyalar və İnnovasiyalar Mərkəzinin rəhbəri, politoloq Mübariz Əhmədoğlu isə hesab edir ki, Rusiya rəsmilərinin BTC ilə bağlı tez-tez bəyanatlar verməsi səbəbsiz deyil. "BTC-nin Türkiyə ərazisində partlaması və bundan sonra Gürcüstanda baş verən hadisələr fonunda Rusiyanın kəmərlə bağlı adı daha çox hallandırılsa da, Rusiya bildirmək istəyir ki, əgər BTC onun hədəfində olsaydı, Gürcüstanda hər yeri məhv edə-edə gedib BTC-nin 10 metrliyində, Bakı-Qars layihəsinin 20 metrliyində dayanmazdı. Rusiya rəsmiləri BTC ilə bağlı məsələləri gündəmə gətirməklə bir növ Moskvanın xoş niyyətini nümayiş etdirmək istəyirlər" - deyən politoloq onu da bildirib ki, bu kəmərin işləməsi Rusiya üçün maraqlı olmasa da, artıq Kremlin bu layihəyə qarşı aqressivliyi əvvəlki kimi deyil. "Hətta Rusiyanın özündə bu ölkənin neftinin bir hissəsinin BTC ilə daşınması kimi fikirlər də səsləndirilir" - deyən Mübariz Əhmədoğlu Rusiya rəsmilərinin səsləndirdiyi bəyanatların bir növ Avropaya verilən mesaj olduğunu deyib. Onun bildirdiyinə görə, Avropa hazırda Rusiyanın enerji asılılığından xilas olmağa çalışır. "Rusiya isə BTC ilə bağlı məsələni tez-tez yada salmaqla bildirmək istəyir ki, onun bu kəməri dayandırmaq niyyəti olsaydı, Gürcüstanda hərbi əməliyyatları gedib bu kəmərin yanına çatanda saxlamazdı". Bununla belə SİTM rəhbəri hesab edir ki, BTC son aylar sanki bir uğursuzluq zolağına düşüb. "Türkiyədə baş verən partlayışdan sonra Gürcüstanda baş verənlər kəmərin işinə çətinlik yaratdı. Bunlar da ortadan qalxandan sonra platformaların işində qaz sızması ilə bağlı fasilə yarandı. Ona görə də BTC sanki uğursuzluq zolağındadır. Amma yəqin ki, bu çox çəkməyəcək" - deyən politoloq bir aya bu kəmərin işi ilə bağlı bütün məsələlərin həllini tapacağını proqnozlaşdırır. Mübariz Əhmədoğlu NABUKKO layihəsi ilə bağlı Moskvanın mövqeyinə də toxunub. Onun sözlərinə görə, əksər siyasi analitiklər bu layihənin əsas düşməni kimi Rusiyanı görsə də, əslində bu belə deyil. "NABUKKO-nun daha böyük düşməni var. Bu da Fransadır. Fransa ilə Avropa ölkələri arasında bu məsələ ilə bağlı ciddi fikir ayrılığı var. Bunun da səbəbi yenə ermənilərlə bağlıdır. "Erməni soyqırımı" məsələsinə görə Fransa çalışır ki, NABUKKO-nun gəlib Türkiyədən keçməsinə mane olsun. Ona görə də digər Avropa ölkələri ilə Fransa arasında fikir ayrılığı yaranıb və bu layihənin reallaşmasına maneçilik də yenə ermənilərin ucbatındandır. Bununla belə politoloq hər iki layihənin gələcəyi ilə bağlı nikbindi. Onun fikrincə, Rusiya NABUKKO-ya qarşı olsa da, artıq bu narazılıq kəskin səviyyədə deyil. "1994-cü ildə BTC ilə bağlı Rusiya Böyük Britaniyaya və ABŞ-a hətta nota da vermişdi. İndi isə bu layihənin hələ real olmadığını deməklə kifayətlənir. Bunun özü artıq vəziyyətin dəyişdiyini və Rusiyanın da bir çox reallıqlarla razılaşmalı olduğunu təsdiqləyir". Vüsalə Rafiqqızı sherg