TÜRKİYƏDƏ PKK-ya QARŞI NÖVBƏTİ SƏFƏRBƏRLİK İstefada olan polkovnik Erdal Sarızeybək: “Terror təşkilatını məhv etmək üçün onun arxivini ələ keçirmək lazımdır” Türkiyədə hökumətin təhlükəsizlik bloku və silahlı qüvvələrin komandanlığı oktyabrın 9-da saatlarla davam edən qapalı toplantı zamanı PKK-ya qarşı yeni tədbirlərlə bağlı müzakirələr aparıb. Toplantı ilə bağlı heç bir açıqlama verilmir, ancaq gözlənilirdi ki, terror təşkilatının son qanlı hücumlarından sonra PKK-ya qarşı daha radikal mübarizə üsulları barədə hökumətə təkliflər veriləcək. Bura terrorla mübarizə üçün muzdlu peşəkar əsgərlərdən ibarət 10-15 minlik xüsusi təyinatlı əlahiddə birliklərin formalaşdırılması, terrorla mübarizə qanununda silahlı qüvvələrin səlahiyyətlərini artıran dəyişikliklərin edilməsi və digər məsələlər daxildir. Xəbər verildiyi kimi son həftə ərzində PKK-nın hücumu nəticəsində 17 əsgər və 5 polis əməkdaşı həlak olub. Məlum olub ki, bir ildir fasilələrlə aparılan əməliyyatlara baxmayaraq PKK İraqın şimalında hələ də çoxsaylı qruplaşmalara malikdir və bu qruplar ağır silahlarla sərhəddi keçib irimiqyaslı terror hücumları törətməyə qadirdir. Türkiyə mətbuatı silahlı qüvvələrin PKK-nın son hücumlarından sonra terrorçulara qarşı mübarizənin strategiyasını dəyişməkdə olduğunu yazır. Bildirilir ki, 11 il sonra silahlı qüvvələrin Baş Qərargahı PKK-ya qarşı mübarizənin ön cəbhəsində - ölkənin cənub şərqində özəl timlər adlanan xüsusi təyinatlı polis bölmələrini yerləşdirməyi qərara alıb. Məlumata görə, Baş Qərargah həmin bölgəyə göndərilmək üçün 7 min özəl timin səfərbər edilməsi haqda təlimat verib. Bu qüvvələr Baş qərargahın tabeçiliyinə veriləcək. Xüsusi təyinatlıların ilk qrupu dünən Ankaradan yola çıxıb. Baş Qərargah ölkənin cənub-şərqindən özəl timlərin çəkilməsi haqda 1997-ci ildə təlimat verib. O vaxt buna özəl timlərin mafiyalarla bağlı olması və Susurluq qalmaqalı səbəb olmuşdu. Terrorla mübarizə ekspertlərinə görə, özəl timlər PKK-ya qarşı vaxtilə çox effektli fəaliyyət göstərib. Nə vaxt hansı istiqamətdən hücum edəcəyi məlum olmayan PKK-çıları tapıb məhv etmək üçün onların xüsusi təcrübələri var. PKK-ya qarşı döyüşlərin iştirakçısı, istefada olan polkovnik Erdal Sarızeybək isə belə fikirləşir ki, bu qanlı terror təşkilatını bitirmək üçün onun arxivi tapılmalıdır. Sarızeybək vaxtilə PKK-nın ötən həftə sonu 17 əsgəri həlak etdiyi Hakkari bölgəsindəki Aktütün kazarmasının komandiri olub. O deyib ki, PKK lideri Abdullah Öcalan istintaqa ifadəsi zamanı təşkilatın bütün arxivinin “Harun” ləqəbli şəxsdə olduğunu deyib: “Türkiyə kəşfiyyatı həmin şəxsin əsl kimliyini və hazırda Suriyada gizləndiyini bilir. PKK-nın arxivi da ondadır. Bu arxivdə PKK-çılara aid bütün məlumatlar, həmçinin onların həyata keçirdikləri terror aksiyaları haqda məlumatlar yer alır. Arxivdə PKK-nın maliyyə qaynaqları, hansı hesabda nə qədər pulu olduğu, kimlərdən silah aldığı və başqa məlumatlar da var”. Sarızeybək deyib ki, PKK-nın bank hesabları İsveçrədə, Kürd Müqavimət Hərəkatının hesabında saxlanılır. Bu hesabda 500 milyon dollardan çox pul var. “Türkiyəni çox böyük təhlükə gözləyir. Kürd məsələsi Türkiyə üçün erməni probleminə çevriləcək. Günlərin birində kürd dövləti qurulan kimi məsələ terrordan Türkiyəyə qarşı soyqırım ittihamlarına çevriləcək və siyasiləşəcək”. İstefada olan polkovnik onu da deyib ki, AKP iqtidarı dövründə Avropa Birliyinə üzvlük yolunda aparılan hüquqi islahatlar nəticəsində silahlı qüvvələrin və polisin terrorçulara qarşı əl qolu bağlanıb. Onun sözlərinə görə, terrorçu birinci atəş açmadan silahlı qüvvələrin atəş açmaq səlahiyyəti yoxdur. Üstəlik terroçu təslim olmasa ona qarşı hansı tip silahlardan istifadə edilə biləcəyinə dair məhdudiyyətlər var. Bu arada Baş Qərargah İraqın şimalından ölkəyə daxil olmaq istəyən çoxsaylı terrorçu qrupunun aşkar edildiyini, böyük qisminin hava zərbələrinin də dəstəyi ilə məhv edildiyini açıqlayıb. Baş Qərargahdan ictimaiyyətlə əlaqələr idarəsinin rəisi general Metin Gürak bildirib ki, müşahidələr nəticəsində terorçu qrup oktyabrın 9-da axşam aşkar olunub. Onların mövqelərinə havadan və qurudan zərbələr endirilib, onlarla terrorçu məhv edilib. Gürak Hakkaridəki terror hücumunu həyata keçirən terrorçuların təqib olunmaqda davam etdiyini də bildirib. Xatırladaq ki, Türkiyə parlamenti silahlı qüvvələrə İraqın şimalında daha bir il PKK-ya qarşı məhdud hərbi əməliyyatlar həyata keçirmək səlahiyyəti verib. Fərhad MƏMMƏDOV musavat