Rusiya Medvedyev-Sarkozi planını yerinə yetirir "Beşgünlük müharibə"nin Kremlə vurduğu zərbələrin təsiri görünür Artıq iki gündür ki, Rusiya Gürcüstan ərazisindəki işğalçı qoşunlarını çıxartmağa başlayıb. Xatırladaq ki, "Medvedyev-Sarkozi planı"na əsasən, qoşunlar oktyabrın 10-dək tam çıxarılmalıdır. Prosesə Avropa Birliyinin müşahidəçiləri nəzarət edirlər. NATO Moskvanın bu addımını alqışlayıb və Alyansın rəsmisi Ceyms Appaturay Rusiyanın sülh planının icrası istiqamətində fəaliyyətə keçməsindən məmnun olduqlarını deyib. Mütəxəssislərin fikrincə, Rusiya ilə Gürcüstan arasında "beşgünlük müharibə"nin Kremlə vurduğu zərbələrin təsiri artıq görünür. Moskvanın beynəlxalq iqtisadi təzyiqlərə məruz qalmasının ardınca bu addımı atacağı gözlənilən idi. Analitiklər Moskvanın bu addımından sonra Rusiya-ABŞ münasibətlərinin tədricən yumşalacağını da gözləyirlər. Tural Politoloq Leyla Əliyeva Rusiyanın Gürcüstan ərazilərindən çıxarmasını müsbət amil saysa da, bu işdə daha çox Kremlin qazandığını söylədi: "Ümumiyyətlə, Moskva anlamağa başlayıb ki, Gürcüstan ərazilərinə qoşun yeritməklə özünü tələyə salıb. Amma burada daha çox Rusiyanın əsas niyyətinin həyata keçdiyinin də şahidi olduq. Moskva təcavüz siyasətilə dünyaya göstərdi ki, istəsə belə bir addım atar və hətta ABŞ-ın istənilən müttəfiqinə təcavüz edərək onun paytaxtına qədər irəliləyə bilər. Gürcüstana təcavüz Moskvanın öz nüfuzunu və təsir imkanlarını göstərmək üçün atılmışdı". Kreml rəsmiləri dolayısıyla, digər MDB ölkələrinə də mesajlar göndərdi ki, bu vəziyyət onlara da dərs olmalıdır. Leyla Əliyevanın qənaətincə, rus qoşunlarını geri çəkməsində siyasi alver özünü göstərir: "Ola bilsin, Avropa ölkələrilə Rusiya arasında belə bir razılıq var ki, Moskva tez bir zamanda bu ərazilərdən öz qoşunlarını çıxarsın və regionda ABŞ-ın rolu azaldılsın. Ola bilsin ki, Rusiya təminat da istəyib ki, Gürcüstanın NATO-ya qəbulu bir qədər də uzadılsın". Gürcüstanın Şimali Atlantika Alyansına üzvlüyü Rusiyanı narahat edir. İşğala əl atan Moskvanın əsas məqsədi həm də Tiflisin NATO-ya qapısını birdəfəlik bağlamaq idi: "Artıq ruslar orada qoşunları saxlaya bilməyəcək. Moskva çalışacaq ki, hansısa güzəştlər almaqla işğal olunmuş ərazilərdən öz qoşunlarını mərhələ-mərhələ çıxarsın. Bu proses ya tez gedəcək, ya da müəyyən müddətdən sonra ləngidiləcək. Amma demək olmaz ki, Qərb Rusiya ilə əvvəlki əməkdaşlığını yenidən bərpa edəcək. Avropa Birliyi və ABŞ-ın Moskva ilə bundan sonra ehtiyatla davranacağını da proqnozlaşdırmaq olar. Digər tərəfdən, istisna deyil ki, Rusiyanın zəiflədilməsi gələcəkdə də davam etsin". Politoloq dedi ki, əgər Avropa Birliyi Kremlə təzyiqləri birdəfəlik dayandırsa, bu o anlama gələcək ki, Rusiya öz niyyətlərini başqa istiqamətlərdə davam etdirəcək və rus siyasətçiləri daha da radikallaşacaqlar. Bu zaman "soyuq müharibə" yeni mərəhələyə qədəm qoyar: "Rusiya ilə hər cür əlaqələrin kəsiləcəyini, Moskvanın izolyasiya olunacağını bəyanlayan ABŞ indi yavaş-yavaş Kremllə müəyyən sahələrdə əməkdaşlıq edə bilər. Yəni ABŞ-ın İrana qarşı öz məqəsədini həyata keçirmək üçün BMT Təhlükəsizlik Şurasında Rusiyanın köməyinə ehtiyacı var. Rusiya İran məsələsində Vaşinqtona kömək etməsə, yaxud da İrana kömək etsə, ABŞ çox ağır faciələrlə üzləşə bilər. Ona görə də Vaşinqton rəsmiləri Kremlin bu addımından sonra Gürcüstan məsələsində mövqeyini hələlik yumşaltmasa da, digər məsələlərdə Rusiyaya qarşı mövqeyini dəyişməyə meyl edəcək. Yəni Gürcüstandan rus qoşunları çıxarıldıqdan sonra Vaşinqtonun mövqeyinin dəyişəcəyini ehtimal etmək olar".