MAKKEYN SEÇKİNİ UDUZUR Barak Obama ikinci debatda da rəqibini üstələdi Amerikada prezidentliyə namizədlər arasında həlledici debatlar keçirilib. Bu dəfə Barak Obama və Con Makkeyn Tennesi ştatının Neşvill şəhərində üz-üzə gəliblər. Debatlar seçicilərin suallarına cavablar formasında keçirilib. Suallar isə namizədlərə İnternet, telefon və zaldakı tamaşaçılar vasitəsilə verilib. Gözlənildiyi kimi, debatlar zamanı əsas mövzu Amerikadakı maliyyə böhranı və onun aradan qaldırılması yolları haqda olub. Obama və Makkeyn həmçinin öz iqtisadi proqramlarının əsas tezislərini çatdırmağa çalışıblar. Həmçinin debatlar zamanı xarici siyasət mövzularına, İraq və Əfqanıstandakı əməliyyatlara, terrorla müharibəin prioritetlərinə və Qafqazdakı münaqişələrə də toxunulub. Obama deyib ki, Amerika çox pis maliyyə böhranı yaşayır, o, prezident seçiləcəyi təqdirdə əksər amerikalılar üçün vergini azaldacağını deyib: “Orta təbəqənin xilasedici paketə ehtiyacı var. Bu da orta təbəqənin vergilərinin azaldılması, ev sahiblərinə evlərində qala bilmək üçün yardım deməkdir. Bu o deməkdir ki, biz dövlətə və yerli hakimiyyət orqanlarına yol və körpü layihələri həyata keçirməyə kömək edirik, bu isə insanları iş yerində saxlamaq deməkdir”. Prezidentliyə demokrat namizəd Amerikanın “böyük depressiya” dövründən bu yana ən ağır iqtisadi böhran yaşadığını deyərək qeyd edib ki, bütün bunlar Buş administrasiyasının düşünülməmiş siyasətinin nəticəsidir. Makkeyn isə deyib ki, prezident seçilərsə, Maliyyə Nazirliyinə çətin vəziyyətdə olan mülkiyyətçilərə kömək etmək haqda göstəriş verəcək: “Amerikanın prezidenti kimi mən maliyyə nazirinə deyərdim ki, ölkədəki bütün problemli kreditləri alsın və evlərin yeni - nisbətən aşağı qiymətləri barədə danışıqlar aparsın. Adamlara da imkan verilsin ki, həmin məbləğləri ödəsinlər və evlərində qalsınlar”. Daha sonra namizədlər xarici siyasət məsələləri haqda suallara cavab veriblər. Makkeyn deyib ki, Obama Ali Baş Komandan olmaq üçün keyfiyyətlərə malik deyil və onun xarici siyasət platforması təhlükəlidir. Makkeyn Obamanı Amerikanın və dünyanın təhlükəsizliyini təhdid edən İran kimi ölkələrə qarşı yumşaq mövqe tutmaqda günahlandırıb. Debatlar zamanı hər iki namizəd Rusiyanın beynəlxalq siyasətdə atdığı adddımları pisləyiblər. Tamaşaçılardan biri Makkeynə belə sual verib: “Siz Ronald Reyqan kimi Rusiyanı şər imperiyası hesab edirsinizmi?” Makkeyn bu suala birmənalı cavab verməyib: “Ola bilsin ki, bu belədir. Əgər mən ”hə" cavabı versəm bu yeni “soyuq müharibə” demək olardı, “yox” desəm belə çıxacaq ki, mən Rusiyanın əməllərinə qiymət vermirəm." İran məsələsinə gəldikdə isə Obama deyib ki, bu ölkənin nüvə silahına malik olması yolverilməzdir. Onun sözlərinə görə, ABŞ İranın nüvə silahı əldə etməsinə yol verməmək üçün sərt mövqe tutmalıdır, lakin öz mövqeyini İrana çatdırmaq üçün onunla birbaşa danışıqlar vacibdir. Demokrat namizəd ABŞ-ın İraqa müdaxiləsini də səhv addım adlandırıb. Makkeyn isə deyib ki, Obama İraqdakı qüvvələrin sayının artırılmasına qarşı çıxmaqla düzgün addım atmayıb. 90 dəqiqəyə yaxın davam edən debatlardan sonra televiziya tamaşaçıları arasında aparılan rəy sorğuları Obamanın üstün gəldiyini göstərib. Belə ki, tamaşaçıların 54 faizi debatda Obamanın qalib gəldiyini bildirib, yalnız 30 faiz Makkeyni qalib sayıb. Respublikaçı namizədin debatlardan məyus ayrıldığı telekameraların da diqqətindən yayınmayıb. Müşahidəçilərə görə, Obama onu Amerikadakı iqtisadi böhran sayəsində üstələyə bilib. Bununla da Makkeynin ABŞ prezidenti seçilmək şansı daha da azalıb. Hazırda Obama ondan daha yüksək reytinqə malikdir. Baxmayaraq ki, cəmi 1 ay əvvələ qədər Makkeyn rəqibini qabaqlayırdı. F.MƏMMƏDOV musavat