DÖVLƏT BAXÇALIDAN SENSASİON AÇIQLAMA “Türkiyə parlamentində 96 PKK-çı var” Türkiyə PKK terrorçularının 17 əsgərin həlak olması ilə nəticələnən son hücumunun şokunu yaşamaqdaykən MHP başqanı Dövlət Baxçalı terror təşkilatının parlamentdə güclü dəstəyə malik olması haqda açıqlama verib. Partiyanın parlament qrupu qarşısında çıxışı zamanı Baxçalı deyib ki, PKK-ya bağlı xarici İnternet saytlarından birində bu cür məlumat yerləşdirilib: “Parlamentdə kritik durumda bizimlə birgə hərəkət edə biləcək 96 millət vəkili var”. Baxçalının dediyinə görə, həmin saytda PKK-ya simpatiyası olan millət vəkillərinin siyahısı da verilib. Hökumətin PKK-ya qarşı mübarizə siyasətini tənqid edən Baxçalı deyib ki, terror təşkilatına qarşı sərt mübarizə aparılmalı, onlar gizləndikləri yerdə tapılıb məhv edilməlidir. O, hökuməti terrorla mübarizəni sərtləşdirmək üçün zəruri hüquqi islahatlar aparmağa da çağırıb. MHP lideri ad çəkmədən parlamentdə 22 millət vəkili ilə təmsil olunan kürdlərin Demokratik Toplum Partiyasını da tənqid edib və onların terrora açıq dəstək verdiyini bildirib. Qeyd edək ki, Türkiyə parlamentində nəinki PKK-ya simpatiyası olan, hətta bu terror təşkilatının üzvü sayılanların olması yeni deyil. DTP-dən parlamentə seçilənlər arasında PKK lideri Abdullah Öcalanın vəkilləri, vaxtilə bu terror təşkilatına üzv olduğuna və yardım etdiyinə görə həbs edilənlər də var. Məsələn, DTP-dən millət vəkili olan Aysel Tuğluk parlamentə seçilərkən hələ həbsxanadaydı və PKK üzvü olduğuna görə məhkum edilmişdi. Lakin iqtidarda olan Ədalət və İnkişaf Partiyasında da xeyli kürd millət vəkilləri var. Onların sayı 90-dan çoxdur. AKP-li kürd millət vəkillərinin bir çoxunun da PKK-ya simpatiyasının olması haqda söz-söhbətlər yeni deyil. Göründüyü kimi, PKK hətta Türkiyə parlamentindəki dəstəkçilərinin siyahısını yayacaq qədər cəsarətlənib. Güman ki, söhbət DTP ilə birlikdə, həm də AKP-li kürd millət vəkillərinin bir hissəsindən gedir. Son parlament seçkilərində AKP ölkənin kürdlərin çoxluq təşkil etdiyi cənub-şərq bölgəsində ən çox səs almışdı. İraqın kürd lideri Məsud Bərzani isə kürdləri AKP-yə səs verməyə çağırmışdı. İndi AKP hökuməti PKK-nın son qanlı hücumundan sonra terrorla mübarizə siyasətinin yetərsiz olmasına görə müxalifətin və vətəndaş cəmiyyəti qurumlarının tənqidləri ilə üz-üzədir. Bu tənqidlər zamanı səslənən arqumentlərdən biri də budur ki, hökumət İraqın şimalında PKK-nı dəstəkləyən Bərzani qüvvələrinə qarşı sərt davranmır. Türkiyə parlamenti bir il əvvəl silahlı qüvvələrə İraqın şimalında əməliyyat aparmağa səlahiyyət verən qətnamə çıxarsa da, həmin sənəddə Bərzaniyə bağlı qüvvələr hədəf kimi göstərilmirdi. Dünən parlament bu qətnamənin müddətini uzadıb. Lakin prezident Abdullah Gül bildirib ki, qətnamə İraqın şimalındakı nöqtə hədəflərə qarşı yönələcək və PKK-ya qarşı irimiqyaslı əməliyyatların aparılmasını nəzərdə tutmur. Gül İraqın şimalındakı kürd administrasiyasını da dolayısı ilə təmizə çıxarmağa çalışaraq qeyd edib ki, PKK yuvaları Şimali İraqın nəzarət edə bilmədiyi bölgələrdə yerləşib. Türkiyə prezidenti deyib ki, İraqın şimalındakı kürd əhalisinin bütün ehtiyacları Türkiyədən qarşılanır, hər gün 4 minə yaxın yük maşını bölgəyə zəruri tələbat malları daşıyır. F.MƏMMƏDOV musavat