Lorens Şits: "Moskvanın hərəkətləri Rusiyanın regional konfliktlərin həllində maraqlı olmadığı fikrini möhkəmlədib" Beynəlxalq Böhran Qrupunun Qafqaz üzrə proqram direktoru Lorens Şits rus-gürcü müharibəsi nəticəsində yaranmış mürəkkəb situasiyanın Dağlıq Qarabağ münaqişəsinin tənzimlənməsi prosesinə artıq mənfi təsir göstərdiyi qənaətindədir. Baş verənlər Minsk qrupunun da fəaliyyətinə təsirsiz ötüşməyib. Moskvanın Gürcüstandakı hərəkətlərinə görə Qərb və Rusiya arasında fikir ayrılığı yaranıb. Lorens Şitsə görə, Azərbaycan və Ermənistan rəhbərliyi, beynəlxalq ictimaiyyət cəsarətli dinc tənzimləmənin zəruriliyini anlayır. Hər iki ölkənin dövlət başçıları az əvvəl Türkiyənin regionda etimad atmosferinin yaradılmasıyla bağlı təşəbbüsünü də dəstəkləyiblər: "Türk-erməni münasibətlərinin normallaşması Ankaraya vasitəçilik səylərini gücləndirməyə kömək edəcək, bu da münaqişənin mümkün həllində öz əksini tapacaq. Rəvan Məmmədli Bu, Ermənistanın regional blokadadan qaçmasına da imkan verəcək. Türkiyənin təşəbbüsünün uğuru bütün tərəflərdən asılıdır". Beynəlxalq Böhran Qrupunun Qafqaz üzrə proqram direktoru hesab edir ki, Gürcüstanda yaranan böhran ABŞ və Avropa Birliyinin Cənubi Qafqazda həllini tapmamış konfliktlərə diqqətini artırıb. Baş verənlər mövcud status-kvonun nə dərəcədə kövrək olmasını da ortaya qoyub: "Gürcüstandakı hadisələr Azərbaycanın ABŞ üçün əhəmiyyətini artırdı. Vitse-prezident Dik Çeyninin Azərbaycana səfəri də bunun təzahürüdür. Böhran həm də Avropa Birliyini məcbur etdi ki, strateji təhlükəsizliyi üçün Cənubi Qafqaz, həmçinin bu bölogənin daha çox Avropaya inteqrasiyası barədə düşünsün". O, Türkiyənin regiondakı roluna da toxunub. Lorens Şitsə görə, Ankara Dağlıq Qarabağ münaqişəsinin sülh yoluyla tənzimlənməsində vacib rol oynaya bilər və oynamalıdır: "Qafqazda sülh və sabitlik yönündə Türkiyənin səylərini gücləndirməsi onun Avropa Birliyinə üzvlüyünə də kömək edər". Beynəlxalq Böhran Qrupunun Qafqaz üzrə proqram direktoru Türkiyənin Ermənistanla sərhədləri açmağa, Bakını isə buna emosional reaksiya verməməyə çağırıb. Onun fikrincə, bu, İrəvanın münaqişənin sülh yolu ilə həlli yönündə axtarışlarına stimul verər. Lorens Şits sonda bir daha vurğulayıb ki, Rusiyanın Gürcüstandakı hərəkətləri, Cənubi Osetiya və Abxaziyanın müstəqilliyini tanıması onun Qərblə münasibətlərinə mənfi təsir göstərib, Minsk qrupunun işini çətinləşdirib. Moskvanın hərəkətləri Rusiyanın regional konfliktlərin həllində maraqlı olmadığı fikrini möhkəmlədib: "Ancaq Rusiyanı beynəlxalq vasitəçilikdən təcrid etmək mümkün deyil. Çünki rusların rejionda iştirakını nəzərə almamaq mümkünsüzdür. Rusiyanın beynəlxalq ictimaiyyətin tərkib hissəsi kimi davamlı prinsipial yanaşması regiondakı münaqişələrin həlli üçün açardır. Düşünürəm ki, Avropa Birliyinin də regiondakı bu münaqişələrin həllinə yardım istiqamətində potensialı böyükdür".