Moskva Azərbaycanın Qərblə münasibətlərini pozmağa çalışır "Rusiya qeyri-səmimidir, Laçın məsələsinin müzakirəsi, Ermənistanla Dağlıq Qarabağ arasında əlaqənin saxlanılması faktiki Azərbaycan ərazisinin ilhaqı deməkdir" Rusiya xarici işlər naziri Sergey Lavrov diqqət çəkən bəyanat verib. O deyib ki, Qafqazdakı son böhrana qədər Dağlıq Qarabağ münaqişəsinin həllini ATƏT-in Minsk qrupunun həmsədrləri vasitəsilə Ermənistan və Azərbaycan prezidentlərinin birbaşa görüşləri çərçivəsində irəlilətmək üçün çox gözəl şans ortaya çıxıb. Praktiki cəhətdən Dağlıq Qarabağ münaqişəsinin tənzimlənməsinin bütün prinsip və mexanizmlərini özündə əks etdirən təfərrüatlı sənəd hazırlanıb. Sergey Lavrov cəmi iki-üç həll olunmamış məsələ qaldığını söyləyib: "Bu məsələlərin Ermənistan və Azərbaycan prezidentlərinin növbəti görüşlərində razılaşdırılması nəzərdə tutulur. Biz belə başa düşürük ki, bu görüşlər Azərbaycanda keçiriləcək prezident seçkilərindən sonra baş tutacaq. Hər şeydən əvvəl söhbət Laçın koridorundan gedir. Ramiz Mikayıloğlu Üç həmsədrdən biri kimi hiss edirik ki, münaqişənin həlli tam realdır. Bunu Ermənistan və Azərbaycan birbaşa razılaşmalar çərçivəsində özləri etməlidir. Vasitəçilər - ruslar, amerikanlar və fransızlar bu prosesin incəliyini və həssaslığını əla başa düşərək, həll imkanlarını görürlər". Sergey Lavrovun bəyanatıyla bağlı fikirlərini öyrəndiyimiz "Şərq-Qərb" Araşdırmalar Mərkəzinin rəhbəri Ərəstun Oruclu deyir ki, Dağlıq Qarabağ münaqişəninin həlli üçün real şərait yarandığını söyləmək düzgün olmazdı. Sadəcə, son dövrlər Türkiyənin Qafqaz Sabitlik və Əməkdaşlıq Platforması təşəbbüsü ortaya çıxdıqdan sonra faktiki olaraq ABŞ-la Rusiya arasında bir yarışma başlayıb. Öncə ABŞ ən müxtəlif səviyyələrdə bəyanlayıb ki, Azərbaycanın ərazi bütövlüyünü tanıyır. Bundan sonra Bakıya çox intensiv səfərlər başlayıb. İndi də Rusiya səhnəyə çıxıb: "Məncə, bu, daha çox geosiyasi mübarizənin, region ətrafında gedən yarışmanın təzahürləridir. Burada regionun əsas, açar dövləti kimi Azərbaycanın kimin tərəfinə keçməsi son dərəcədə önəmlidir. Sadəcə, hər kəs Azərbaycanı şirnikləndirərək öz tərəfinə çəkmək istəyir". Ərəstun Oruclu hesab edir ki, Moskva bu məsələdə daha qeyri-səmimidir. Çünki ABŞ-dan fərqli olaraq, Rusiya rəsmiləri son dövrlər bəyanatlarında Azərbaycanın ərazi bütövlüyülə bağlı ifadəni ya işlətmirlər, ya da çox ehtiyatlı işlədirlər: "Ona görə də hesab edirəm ki, Rusiyanın son təşəbbüsləri, bəyanatları daha çox Azərbaycanın Qərb dövlətləriylə tərəfdaşlığına xələl gətirməyə hesablanıb". Bəllidir ki, Sergey Lavrov "iki-üç məsələ qalıb" deyəndə ilk növbədə Dağlıq Qarabağın statusunu nəzərdə tutur. Əslində status məsələsi Azərbaycan üçün əsas və prinsipial əhəmiyyət daşıyır. Xarici işlər nazirinin status yox, Laçın məsələsinə diqqət çəkməsinə gəlincə, "Şərq-Qərb" Araşdırmalar Mərkəzinin rəhbəri bildirdi ki, adıçəkilən rayonun danışıqlar predmeti olmasının özü belə yaxşı hal deyil. Çünki belədə Dağlıq Qarabağ ərazisi istənilən halda Azərbaycandan ayrılmış kimi görünür: "Əgər Dağlıq Qarabağ Azərbaycanın tərkib hissəsi olaraq qalacaqsa, rəsmi Bakı koridor məsələsini özü də həll edə bilər. Laçın məsələsinin müzakirəsi, Ermənistanla Dağlıq Qarabağ arasında əlaqənin saxlanılması faktiki Azərbaycan ərazisinin ilhaq olunması deməkdir". Onun sözlərinə görə, Moskva indiki halda Qarabağdakı separatçı qurumla Ermənistanın əlaqələrinin rəsmiləşməsinə, Azərbaycanın da işğalçı ölkəylə iqtisadi əlaqələr quraraq kommunikasiya xətlərini açmasını istəyir: "Rusiya bu plan çərçivəsində Qarabağın statusunun müzakirəsinin gələcəyə saxlanılmasına çalışır. Bu, detalları öyrənilməli təklifdir. Ani olaraq buna "yox!" və ya "hə!" demək mümkün deyil. Hər halda bütün çəkişmələr Azərbaycanın ərazi bütövlüyü ətrafında gedir. Dəxli yoxdur, ola bilər ki, sözdə Azərbaycanın ərazi bütövlüyünün saxlanıldığı deyilsin. Amma nəticə etibarilə hər şey başqa cür ola bilər".