Yuşşenkonun Timoşenkoya "İtaliya dərsi" "Bu yaxınlarda biz Ukraynada prezident seçkilərinin şahidi ola bilərik" Ukraynada hakim "narıncı" koalisiyanın dağılmasından sonra yaranmış siyasi böhran dərinləşir. Prezident Viktor Yuşşenkonun verdiyi müddət oktyabrın 7-də başa çatmasına baxmayaraq, parlamentdəki siyasi qüvvələr arasında yeni koalision hökumətin yaradılması haqda razılaşma əldə olunmayıb. Bununla belə prezidenti dəstəkləyən "Bizim Ukrayna" blokundan bildiriblər ki, prezident Ali Radanı buraxmaq haqda qərarı istənilən vaxt verə bilər. Tərəflər isə bir-birlərini xəyanətdə və satqınlıqda ittiham edirlər. Baş nazir Yuliya Timoşenkonun "narıncı" koalisiyanın bərpasına prezident imkan verməməsi barədə ittihamları da siyasi proseslərin daha da dərinliyə gedəcəyindən xəbər verir. Tural "Biz prezidentin bütün şərtlərini yerinə yetirmişik, amma o öz fraksiyasına koalisiyanın bərpasını qadağan edir." Baş nazir deyib ki, prezident onun telefon zənglərinə cavab vermir və görüşdən imtina edir. Yuliya Timoşenko deyib ki, prezident Regionlar Partiyası ilə əlbir olaraq ona qarşı tələ qurub. Yerli müşahidəçilərə görə, əgər parlament buraxılsa və növbədənkənar seçkilər təyin edilsə, "Bizim Ukrayna" blokunun qalib gəlmək şansı da olmayacaq. Amma Viktor Yuşşenko 2010-cu il prezident seçkilərində yenidən seçilmək şansı əldə edə bilər. Viktor Yuşşenko seçki kampaniyasını Moskva ilə qarşıdurma və Qərbə inteqrasiya üzərində qurmaq niyyətindədir. Baş nazir isə son vaxtlar Rusiya ilə isti münasibətlər qurur. Mütəxəssislərin fikrincə, Gürcüstan olaylarından sonra Rusiyaya əyilməyən ölkələr sırasında olan Ukraynada ciddi siyasi hadisələrin baş verməsi Kremlin bu proseslərdə əlinin olmasından xəbər verir. Dünən səhər prezident Viktor Yuşşenko Ali Radanın buraxılmasının və növbədənkənar seçkilərin keçirilməsinin mümkünlüyülə bağlı fraksiya rəhbərlərilə məsləhətləşmələrdən sonra ölkəni tək edərək İtalyaya səfərə gedib. Məsləhətləşmələrin nəticəsində prezident parlamentin buraxılması barədə qərar verməyib. Onun İtaliya səfəri iki gün çəkəcək. Səfər zamanı o, Ukraynanın NATO-ya qəbulu ilə bağlı italyan hökumətinin dəstəyini almağa çalışacaq. Bununla belə, adının çəkilməsini istəməyən Ali Radanın deputatı bildirib ki, hələ oktyabrın 7-də Viktor Yuşşenkonun xalqa müraciəti videolentə yazılıb. "Korrespondent" qəzetinin yazdığına görə, müraciət dünən gecə Ukrayna vaxtıyla 21:00-da (Bakı vaxtıyla 23:00-da-red.) səsləndirilməli idi. Məhz bu müraciətində prezident ya Ali Radanı buraxdığını, ya da onun işini davam etdirəməyə icazə verəcəyini söyləməlidir. Məsələylə bağlı fikirlərini öyrəndiyimiz"Atlas" Araşadırmalar Mərkəzinin rəhbəri Elxan Şahinoğlu deyir ki, Ukraynada cərəyan edən siyasi hadisələrin daha da kəskinləşəcəyini istisna deyil. Ekspert yaxın gələcəkdə Kiyevdə siyasi həbslərin də olmasını mümkün sayır. Onun sözlərinə görə, Ukraynada demokratik qüvvələrin hakimiyyətə gəlməsi nə qədər gözləniləndisə, bir müddət sonra bu "narıncı" koalisiyanın qəfildən dağılması və Yuliya Timmoşenkonun Rusiyaya meyl etməsi də bir o qədər gözlənilməzdir. Çünki düşünürdülər ki, əgər Regionlar Partiyasının sədri Viktor Yanukoviç rusiyayönümlü siyasətə köklənibsə, digər qüvvələr Qərbə doğru istiqamət alıb: "Amma siyasi proseslər tamam başqa məcrada inkişaf etməyə başladı. İndiki vəziyyətdə prezident də hər an manevr imkanlarından istifadə etməyə çalışır və topu rəqib meydanına atır. Viktor Yuşşenkonun parlamenti buraxması ideyası da bu siyasətdən irəli gəlir. Onun atdığı topa kimin zərbə endirəcəyi isə hələlik bilinmir". Elxan Şahinoğlu hesab edir ki, bu gün siyasi proseslərin qarışmasında əli olan Yuliya Timoşenko yenidən əvvəlki iddialarla çıxış etmək istəsə də, bu artıq onun üçün gecikmiş və yersiz addımların atılmasına gətirib çıxaracaq: "Amma hadisələrin sonunun nəyə gətirib çıxaracağını da söyləmək çətindir. Yəni növbədənkənar parlament seçkiləri keçirilə bilər. O da mümkündür ki, bu yaxınlarda biz Ukraynada prezident seçkilərinin də şahidi olaq".