Azərbaycan türkü türklərə qarşı döyüşə bilməz Hakkaridə qətlə yetirilənlərin PKK üzvü olduğu təsdiqlənmir PKK terror təşkilatının Türkiyə ərazisində yenidən terror aktları törətməsi türk hərbçilərinin yenidən İraqın şimalında hərbi əməliyyatlar keçirməsi ilə müşayiət olundu. Qeyd edək ki, rəsmi Bakı PKK-nı terror təşkilatı kimi tanıdığını və bu məsələdə Türkiyənin yanında olduğunu bəyan etsə də, terrorçulara qarşı aparılan son hərbi əməliyyatlar zamanı məhv edilən terrorçular arasında iki nəfər Azərbaycan vətəndaşının olması Türkiyə ictimaiyyəti tərəfindən birmənalı qarşılanmadı. Qeyd edək ki, məhv edilmiş PKK terrorçuları ilə bağlı türk kanalların yaydığı materiallarda bu fakt daha qabarıq şəkildə nümayiş etdirildi. Bu baxımdan baş verənlərin Azərbaycanda necə qarşılandığı da maraq doğurmaya bilməz. Onu da qeyd edək ki, PKK mövzusu Azərbaycanda zaman-zaman gündəmə gəldiyindən, hətta Azərbaycan ərazisində bu terrorçu təşkilatla əlaqəli şəxslərin mövcudluğuna dair məlumatlar olduğundan Azərbaycan vətəndaşlarının bu təşkilatda təmsil olunmasına münasibətlər də fərqlidir. Xarici İşlər Nazirliyinin mətbuat katibi Xəzər İbrahim məsələ ilə bağlı "Şərq"ə açıqlamasında Türkiyədə PKK terror təşkilatına qarşı keçirilən son əməliyyatlarda məhv edilən terrorçular arasında Azərbaycan vətəndaşlarının olması barədə məlumatsız olduğunu deyib. Bununla belə mətbuat katibi Azərbaycanın bu məsələ ilə bağlı rəsmi mövqeyinin dəyişmədiyini və PKK-nı terrorçu təşkilat kimi tanıdığını bildirib. MTN-in keçmiş əməkdaşı İlham İsmayıl isə bildirib ki, PKK-nın Azərbaycanla əlaqələrinin olması barədə söhbətlər hələ bu təşkilatın rəhbəri Abdullah Öcalan həbs edilən zamanlardan gündəmdə olduğuna görə terror təşkilatına kimlərinsə qoşulması mümkündür. "Bunlar, Türkiyəni və Azərbaycanı sevməyənlərdir" deyən ekspertin sözlərinə görə, türk kanallarının yaydığı materiallara Azərbaycanın güc strukturları diqqətlə yanaşmalıdırlar. "Çünki PKK terror təşkilatıdır və əgər bu gün PKK-da Türkiyəyə qarşı döyüşən Azərbaycan vətəndaşları varsa, deməli, onların Azərbaycandakı yaxınları və yaxın ətrafı sabah Azərbaycan üçün problemə çevrilə bilərlər. Ona görə də hesab edirəm ki, Azərbaycanın xüsusi xidmət orqanları təcili şəkildə Türkiyənin xüsusi xidmət orqanları ilə əlaqəyə girərək həmin Azərbaycan vətəndaşlarının kimliyini öyrənməli, onların ailələri və yaxın ətrafı ilə bağlı araşdırma aparmalı və onları nəzarət altında saxlamalıdırlar" - deyən İlham İsmayıl onu da əlavə edib ki, PKK terror təşkilatında Azərbaycan vətəndaşlarının təmsil olunması faktının ortaya çıxması xoşagələn hadisə deyil və bu, daha çox təəssüf doğuran məqamdır. Azərbaycan vətəndaşlarının hansı şəraitdə terror təşkilatına qoşulması barədə fikir söyləməyin çətin olduğunu bildirən ekspertə görə, həmin şəxslərin muzdlu döyüşçü olması versiyası inandırıcı deyil. "Birincisi, PKK terror təşkilatı maliyyə baxımından o qədər də güclü deyil ki, muzdlu döyüşçülər tutsun. Digər tərəfdən isə Azərbaycanda həqiqətən Türkiyəni sevməyənlər də var" - deyən İlham İsmayıl Çeçenistanda baş verən müharibə zamanı da döyüşçülər arasında Azərbaycan vətəndaşlarının olduğunu xatırladıb. Lakin o, PKK terror təşkilatı ilə bağlı məsələnin tamamilə fərqli olduğunu deyib. "Birincisi, Çeçenistanda döyüşənlər din uğrunda döyüşürdülər. PKK isə Türkiyəyə qarşı döyüşür. Azərbaycan türkünün türklərə qarşı döyüşməsinə inanmıram. Çünki PKK ilə bağlı məsələ daha çox milli məsələdir. Ola bilər ki, hansısa milli azlıqların nümayəndəsi və Azərbaycan vətəndaşlığı olan şəxslər PKK-ya könüllü getsinlər. Hər halda baş verənlər bizim üçün xoş olmayan hal olsa da, bu, PKK terror təşkilatında Azərbaycandan müəyyən sayda insanların olmasının mümkünlüyünü istisna etmir". Ötən gün Hakkaridə öldürülən Azərbaycan vətəndaşlarının kimliyi informasiya portallarında açıqlandı. Bunlar 46 yaşlı Əzizə Hüseynova və 26 yaşlı Xəyalə Şərifovadır. Hakkari vilayətinin Kürdərə kəndinin yaxınlığında iki qadın meyitinin olması barəsində polisə kənd sakinləri xəbər verib. "Day.az"ın Azərbaycanın İstanbuldakı konsulluğuna istinadən verdiyi məlumata görə, qadınları qətlə yetirən 3 nəfər yaxalanıb və araşdırma aparılır. Verilən informasiyalardan qətlə yetirilən bu iki Azərbaycan vətəndaşının PKK üzvü olduğu barədə heç bir məlumat yoxdur. Vüsalə Rafiqqızı sherg