Medvedev Bakıya alverə gəlir... «Əgər bu alver baş tutsa, azad olunan ərazilərdə rus sülhməramlıları qalsa, onun qiyməti bir qəpikdir» Vəfa Quluzadə: “Azərbaycan müstəqilliyini itirib Qarabağ məsələsini həll etsə, bu bizə heç nə vermir” Cənubi Qafqazda baş verən son hadisələrdən sonra Rusiyanın Azərbaycana marağı bir qədər də artıb. ABŞ-ın vitse-prezidenti Dik Çeyninin regiona səfərindən sonra prezident Ilham Əliyev Moskvaya çağırıldı. ABŞ dövlət katibinin birinci müavini Neqropontenin Bakıya səfərindən sonra isə Rusiya prezidentinin ölkəmizə səfər edəcəyi ilə bağlı xəbərlər yayıldı. Rusiyanın Azərbaycana bu diqqətinin arxasında nə dayanır? Medvedevin Bakı səfəri baş tutacağı halda daha çox hansı məsələlərin müzakirəsi gözlənilir? Yayılan xəbərlərə münasibət bildirən politoloq Vəfa Quluzadənin sözlərinə görə, Medvedevin Bakıya səfəri yalnız alver məqsədi güdə bilər: “Nəzəri cəhətdən bu səfəri təsəvvür etmək olar. Çünki Rusiya Gürcüstanda qalib gəldiyini dedi, müharibəni tam uduzdu. Görürük ki, orda sementdən necə ağır blokpostlar qoymuşdular. Indi də onları daşıyıb aparırlar. Yəni ruslar ora bir günlüyə gəlmirdilər. Ruslar Gürcüstanda hakimiyyəti dəyişmək istədi. Bu alınmadı. Ona görə də Gürcüstanda qoşunları saxlamaq və ora tam nəzarət etmək istəyirdi. Bu da baş tutmadı. Çünki Gürcüstan tamamilə Amerikanın himayəsinin altındadır. Yəni bu hücumla Rusiya ATƏT-in Tiflisə yolunu açdı. Indi orda 200-dən çox xarici müşahidəçi var. Qalır Azərbaycan. Azərbaycana Gürcüstandan sonra güc tətbiq etmək bir o qədər mümkün və ağıllı görünmür. Sözsüz ki, onlar bunu edə bilməz. Medvedev Bakıya alver etməyə gəlir. Onun müəyyən təminatları olacaq. Yəni Azərbaycan rusyönlü olacaq, Qərblə, Amerika ilə, Türkiyə ilə əsgəri əməkdaşlığa son qoyacaq, təhlükəsizlik müqaviləsinin üzvü olacaq, rus sərhədçilərini öz sərhədlərinə yaxın qoyacaq. Əvəzində də onlar Qarabağ məsələsində hansısa güzəştlərə söz verəcəklər. Belə bir alver üçün Medvedev gələ bilər. Əgər bu alver baş tutsa, azad olunan ərazilərdə rus sülhməramlıları qalsa, onun qiyməti bir qəpikdir. Çünki rus sülhməramlılarının orda olması açıq işğaldır. Ermənilər bizim torpaqları Rusiyanın köməyi ilə işğal edib. Amma rus sülhməramlılarının gəlməsi açıq işğal ola bilər. Ona görə inanmıram ki, Rusiya işğal olunmuş əraziləri azad etməyə gedə bilsin. Amma dünyada baş verən böhran qarşısında Rusiyanın vəziyyəti bu gün olduqca ağırdı. Gələcəyə də ümidləri olduqca azdır. Təzədən rus ordusunu yeni silahlarla silahlandırmaq ümidləri puç olub. Ona görə Qafqazı nə cür əldə saxlamaq, Cənubi Qafqazdan Qərbi nə cür sıxışdırıb çıxarmaq barədə düşünürlər. Bu məsələlər sözsüz ki, Medvedevi və rus siyasi elitasını narahat edir. Başqa səbəb ola bilməz. Neftin və qazın qiyməti aşağı düşür. Bəlkə gələcək üçün nefti öz əlinə almağı düşünə bilər. Ancaq bu gün Rusiya zəifləyib. Azərbaycan nəyə görə Rusiyaya güzəştə getsin? Medvedevin Azərbaycana niyə gəldiyi onun səfərindən sonra məlum olacaq. Yaddan çıxarmayaq ki, Medvedev əvvəl Ermənistanda olub. Yəni Azərbaycana Ermənistana səfər edəndən sonra gəlir. Bu göstərir ki, Medvedev Qarabağ məsələsində nə isə etmək, bunun əvəzində Azərbaycanı Rusiyaya yenidən calamaq istəyir. Yəni Rusiya bütün Cənubi Qafqazı öz təsiri altına almaq fikrindədir. Əgər Medvedev Azərbaycanın siyasi oriyentasiyanı dəyişməsi, yaxud Azərbaycanın enerjisinin hamısının Rusiyaya verilməsi nəticəsində müəyyən güzəştlərə, hətta Qarabağ məsələsində nəyəsə nail olacaqsa, bizə belə həll lazım deyil. Azərbaycan müstəqilliyini itirib Qarabağ məsələsini həll etsə, bu bizə heç nə vermir. Əksinə, olan vəziyyətdən də pis vəziyyətə düşürük. Bunu təhlükəli hesab edirəm”. Fizzə azadliq