ABŞ, YOXSA MACARISTAN TƏYYARƏSİ?_İran 5 amerika generalının saxlanması xəbərini təkzib edir

SON XƏBƏRLƏR

ABŞ, YOXSA MACARISTAN TƏYYARƏSİ?_İran 5 amerika generalının saxlanması xəbərini təkzib edir

2021.10.20, 07:36

Gunaz.tv

ABŞ, YOXSA MACARISTAN TƏYYARƏSİ? İran 5 amerika generalının saxlanması xəbərini təkzib edir

Dünən ABŞ-la İran arasında misli görünməmiş hərbi insident baş verib. Dünyanın aparıcı KİV-ləri axşam saatlarında “Fars” agentliyinə istinadən Birləşmiş Ştatların Hərbi Hava Qüvvələrinə aid təyyarəsinin İran ərazisində məcburi endirildiyi haqda təcili xəbər yayıblar. Agentlik hadisənin təfərrüatları haqda məlumat verməsə də bildirib ki, çoxməqsədli hərbi vəzifələr üçün istifadə edilən F-16 “Falcon” tipli hərbi təyyarə Türkiyə ərazisindən İranın hava məkanına daxil olub. Təyyarə radarlara yaxalanmamaq üçün aşağı hündürlükdən uçurmuş, bu zaman İranın Hava Hücumundan Müdafiə Qüvvələri onu aşkar edib və havaya həyəcan siqnalı ilə iki qırıcı qaldırılıb. İran qırıcıları Amerika təyyarəsini adı açıqlanmayan hərbi aerodroma endirib. BBC-nin İran mənbələrinə istinadən verdiyi xəbərə görə, təyyarədə Amerika ordusunun beş yüksək vəzifəli generalı və üç mülki şəxs olub. Bildirilir ki, təyyarədəkilər dindirildikdən sonra azad edilib. Təyyarənin taleyi haqda isə məlumat verilmir. Az sonra “Röyter” agentliyi xəbərlə bağlı Pentaqonun mövqeyini yayıb. ABŞ-ın Müdafiə Nazirliyindən bəyan ediblər ki, hərbi təyyarənin İran ərazisində endirilməsi ilə bağlı onlara heç nə məlum deyil. Hadisə haqda ilk xəbər verən “Fars” agentliyi isə ikinci xəbərində daha ətraflı məlumat yayıb. Xəbərdə deyilir ki, Amerika hərbi təyyarəsi İran hava qüvvələrinin xəbərdarlığına məhəl qoymayaraq ölkənin hava məkanına daxil olub. Məlumata görə, təyyarə “Falcon” tipli olub, lakin onun qırıcı təyyarə olub-olmadığı haqda məlumat verilmir. Bildirilir ki, təyyarə İranın qərb hissəsindəki aerodromlardan birinə endirilib. Agentlik bu dəfə qeyd edib ki, saxlanıldıqdan sonra təyyarə ekipajı İranın hava məkanına səhvən daxil olduqlarını bildiriblər, təyyarədə ABŞ Hərbi Hava Qüvvələrinin beş yüksək rütbəli zabiti olub və onlar dindirilib. Britaniyanın “Sky News” telekanalı isə günün sonunda insidentlə bağlı yaydığı xəbərində bildirib ki, həqiqətən İranda Qərb ölkələrindən birinə aid hərbi təyyarə məcburi endirilib. Lakin təyyarənin ABŞ-a aid olub-olmadığı bilinmir. Xəbərdə deyilir ki, təyyarədə Əfqanıstana uçan yüksək rütbəli Amerika hərbçiləri olub. Pentaqondan isə bildiriblər ki, ABŞ HHQ-nin Türkiyədə dislokasiya olunmuş təyyarələri son günlər uçuş keçirməyiblər və onlardan birinin İran ərazisinə daxil olması haqda məlumat yoxdur. Pentaqon ABŞ hərbi təyyarəsinin İranda məcburi endirilməsini də təsdiqləməyib. Günün sonunda İran tərəfi xəbər yayılıb ki, hava sərhədlərini pozan təyyarə Macarıstana məxsus olub və humanitar yük daşıyırmış. Rəsmi Tehran onu da bildirib ki, hadisə sentyabrın 30-da baş verib. F.Məmmədov musavat

GUNAZ.TV

SON XƏBƏRLƏR