“AZƏRBAYCANLA TÜRKİYƏ GÜRCÜSTANI FEDERALLAŞDIRMAĞA ÇALIŞIR” Rusiya mətbuatından şok iddia “RBK Daily”: “Rəsmi Bakı Borçalıda yaşayan azərbaycanlılara kütləvi şəkildə vətəndaşlıq verməyə hazırlaşır” “Bakı ilə Ankara Gürcüstanı federallaşdırmaq üçün Tiflisə təzyiqləri gücləndirmək niyyətindədir”. Bu iddia ötən gün Rusiya mətbuatında yer alıb. “RBK Daily” agentliyinin bildirdiyinə görə, Türkiyə və Azərbaycan Gürcüstandan Acarıstan bölgəsinə real muxtariyyət statusunu qaytarmağı, Borçalı bölgəsində yaşayan azərbaycanlılara muxtariyyət statusunun verilməsini və Məshəti türklərinin Gürcüstana qayıdıb yerləşdirilməsini tələb etməyə hazırlaşır. Agentlik bu qənaətlə çıxış etmək üçün ötən şənbə günü Azərbaycandakı məlumatlı mənbələrdən alınmış informasiyaya istinad edir. Həmin mənbələr bildiriblər ki, Azərbaycanın Xarici İşlər Nazirliyi Gürcüstanda yaşayan azərbaycanlılara kütləvi şəkildə vətəndaşlıq verməyə hazırlaşır. Mənbənin iddiasına görə, pasportlaşma başa çatandan sonra Azərbaycan rəsmi Tiflisdən Borçalı bölgəsində yaşayan azərbaycanlılara muxtariyyət statusunun verilməsini tələb edəcək, əks halda bölgəyə qoşun yeridəcək. Türkiyə XİN-dəki anonim mənbə isə “Milliyet” qəzetinə bildirib ki, rəsmi Ankara Gürcüstanın ərazi bütövlüyünün saxlanmasının yeganə yolunu ölkənin federallaşmasında görür. Türk diplomatı bildirib ki, bu məqsədlə Ankara Tiflisdən Borçalıda yaşayan azərbaycanlılara muxtariyyət statusunun verilməsini tələb etməyə hazırlaşır, həmçinin Türkiyə güclü iqtisadi maraqlarının olduğu Acarıstan bölgəsinə də real muxtariyyət statusunun verilməsini istəyəcək. Digər tələb isə Məshəti türklərinin Gürcüstana qaytarılması və onlara xüsusi statusun verilməsidir. Bildirilir ki, Acarıstanın muxtariyyəti 2004-cü ildə Saakaşvili hakimiyyəti tərəfindən faktiki olaraq ləğv edilib, o vaxtdan Tiflis yerli əhalini gürcüləşdirmək siyasəti aparır və onları “müsəlman gürcülər” kimi qeydiyyatdan keçməyə məcbur edir. Məshəti türklərinin Gürcüstana qayıtması haqda qərar qəbul edilsə də bu proses müxtəlif səbəblərdən ləngiyir. Belə ki, geri qayıtmaq istəyənlərdən gürcü soyadını götürmək tələb olunur. “RBK Daily” bu məsələni rusiyalı ekspertlərin şərhləri ilə davam etdirərək bildirib ki, Ankara ilə Bakının “federallaşma planı” ilə bağlı hərbi gücə əl atması ağlabatan deyil. Çünki bu, Türkiyənin Avropa Birliyinə üzvlüyünə problem yaradar, Azərbaycan isə Qarabağ münaqişəsi ilə üz-üzədir. Moskva Dövlət Universitetinin postsovet məkanında ictimai-siyasi prosesləri öyrənmə mərkəzinin rəhbəri Aleksey Vlasov deyib ki, Türkiyə Acarıstan naminə özünün AB-yə üzvlük perspektivlərini şübhə altına almaq istəməzdi: “Belə görünür ki, Azərbaycan və Türkiyə mətbuatına bu cür məlumatlar sızdırmaqla Tiflisə təsir etmək üçün əllərində rıçaqlar olduğuna eyham vururlar”. Ekspert qeyd edib ki, Rusiyanın hərbi müdaxiləsinə qədər Ankara ilə Bakı Saakaşvili hakimiyyətini Gürcüstandan keçən enerji xətlərinin təminatçısı kimi görürdü, ancaq indi onlara aydın oldu ki, Tiflisin özünü qoruyan lazımdır. Qeyd olunur ki, Tiflisə təzyiq etmək üçün ərazi məsələsindən istifadə etmək ideyası ilə neçə vaxtdır Rusiyada fəaliyyət göstərən Dünya Azərbaycanlıları Konqresi də çıxış edir. Elə Rusiyanın Gürcüstana hərbi müdaxiləsinin davam etdiyi günlərdə də bu təşkilatdan Borçalı azərbaycanlıları üçün muxtariyyət statusunun tələb edilməsi haqda çağırışlar eşidildi. Bəzi müşahidəçilərə görə, sözügedən təşkilat bu cür ideyaları Rusiyanın xüsusi xidmət orqanlarının təlimatı əsasında ortaya atır. Rəsmi Bakı isə Gürcüstanda yaşayan azərbaycanlıların hüquqları haqda məsələni Tiflisin qarşısında heç vaxt ən azı açıq formada qaldırmayıb. Bu baxımdan Rusiya mətbuatında Azərbaycanın Borçalı əhalisinə kütləvi şəkildə pasport verəcəyi, ardınca isə bölgənin muxtariyyəti tələbini qoyacağı, bu da qəbul edilməsə, ora qoşun yeridəcəyi haqda yer alan iddialar kifayət qədər şübhəli görünür. Nəzərə almaq lazımdır ki, Rusiya kütləvi pasportlaşdırma taktikasından Cənubi Osetiyanı Gürcüstandan qoparmaq üçün istifadə edib. Belə çıxır ki, rəsmi Bakı, hətta Ankara da Moskvanın Gürcüstanı parçalamaq və əzmək planlarında iştirak etməyə hazırlaşır?! F.MƏMMƏDOV musavat