Rusiyalı nazir Ermənistana ağıl verir Sergey Lavrov: " Dağlıq Qarabağ münaqişəsinin tezliklə həll olunması erməni xalqının maraqlarına uyğundur" -Rusiya bir vasitəçi kimi hesab edir ki, münaqişənin həlli tam realdır. Bunu Ermənistan və Azərbaycan birbaşa razılaşmalar çərçivəsində özləri etməlidir... "Dağlıq Qarabağ münaqişəsi tərəflərinin öz maraqları var. Ermənistanın maraqları tam aydındır - bu ölkə Dağlıq Qarabağ münaqişəsi ilə bağlı blokadadır, dünya ilə ünsiyyətdə böyük çətinlikləri var. Münaqişənin tezliklə həll olunması erməni xalqının maraqlarına cavab verir". APA-nın məlumatına görə, bunu Rusiyanın xarici işlər naziri Sergey Lavrov "Rossiyskaya qazeta"ya verdiyi müsahibəsində deyib. O, Dağlıq Qarabağ münaqişəsi nizamlanandan sonra Türkiyənin Ermənistana dünya ilə normal əlaqələr qurmağa yardım etməyə hazır olacağını, bunun Ankara ilə İrəvan arasında rəsmi, diplomatik əlaqələr qurmaqla mümkünlüyünü qeyd edib. Nazirin sözlərinə görə, Qafqazda böhran başlanmazdan əvvəl Dağlıq Qarabağ münaqişəsinin həllində ATƏT-in Minsk Qrupunun vasitəçiliyi ilə Ermənistan və Azərbaycan prezidentlərinin birbaşa görüşləri sayəsində irəli getmək üçün çox yaxşı şans olub, nizamlanmanın prinsip və mexanizmlərini əhatə edən məzmunlu sənəd hazırlanıb: "Dağlıq Qarabağ münaqişənin nizamlanması ilə bağlı razılaşdırılmamış 2-3 məsələ qalıb ki, onların da Ermənistan və Azərbaycan prezidentlərinin növbəti görüşlərində razılaşdırılması gözlənilir". S. Lavrov prezidentlərin görüşlərinin Azərbaycanda keçiriləcək prezident seçkilərindən bir qədər sonra baş tutacağını güman edir: "Öncə söhbət Laçın dəhlizindən gedir. Rusiya bir vasitəçi kimi hesab edir ki, münaqişənin həlli tam realdır. Bunu Ermənistan və Azərbaycan birbaşa razılaşmalar çərçivəsində özləri etməlidir. Vasitəçilər - Rusiya, ABŞ və Fransa bu prosesin incəliyini və həssaslığını əla başa düşərək, həll imkanlarını görürlər". Rusiyalı nazir bu münaqişədə Türkiyə faktoruna toxunaraq bildirib ki, rəsmi Ankaranın aktivləşməsi Qafqaz böhranının geosiyasi nəticələrinin gərginləşməsi ilə əlaqədardır: "Hadisələr baş verəndə Rusiyanın geosiyasi cəhətdən hansısa addımları atmağı düşünmürdü. Bizim yeganə məqsədimiz - dinc əhalini və rusiyalı sülhməramlıları müdafiə etmək idi. Lakin həmin böhran zamanı Gürcüstan vasitəsilə erməni xalqına həyatı vacib malların tranziti ilə bağlı Ermənistanın yaşadığı problemlər bu münaqişənin təcili həllinin vacibliyini göstərdi. Vəziyyətin davam etməsi heç kimin marağında deyil. Cənubi Osetiya və Abxaziya daim hərbi hücum təhlükəsi altında qaldıqca, Ermənistanın həyatı vacib tranziti də təhlükə altına düşür. Ermənistan üçün bu təhlükədən qaçmaq çox vacibdir. İrəvanın Dağlıq Qarabağ münaqişəsinin tezliklə həllinə marağı burdan irəli gəlir. Bu isə Türkiyə ilə münasibətlərin normallaşması və bu ölkənin ərazisi vasitəsilə dünyaya çıxışı təmin edir". S. Lavrov hesab edir ki, Türkiyə bu məqamın unikallığını vaxtında başa düşüb: "Bu unikallıq Türkiyəyə bu regionda öz iştirakını göstərməyə imkan verir. Türkiyə Qafqazla qonşudur və demək olar ki, regionun bütün ölkələri ilə yaxşı münasibətləri var. Ankaranın Qafqazda Sabitlik və Əməkdaşlıq Platforması ideyası Türkiyə diplomatiyasının təcrübəli olduğunu göstərir. Mənə elə gəlir ki, Qafqazda münaqişəli vəziyyət qalarsa, Ermənistanın bundan çox ciddi əziyyət çəkəcəyini anlaması, Türkiyə tərəfindən bu məqamın unikallığının başa düşülməsi və Minsk Qrupu həmsədrlərinin verdikləri təkliflər Dağlıq Qarabağ probleminin həllin tapılması üçün əsas yaradır".sherg