Gürcüstanda yenə müharibə baş verə bilər Rusiya Xarici İşlər Nazirliyi rəsmi Tiflisi Sxinvalidə baş vermiş terror aksiyasında günahlandırır Rusiya Xarici İşlər Nazirliyi (XİN) Gürcüstanı Qafqazda yeni müharibə təhlükəsi yaratmaq cəhdində suçlayıb. RF XİN-in yaydığı bəyanatda Tiflisin regionda yeni müharibə ocağını alovlandırması və Sxinvalidə törədilən son terror aktında gürcü xüsusi xidmət orqanlarının əli olması qeyd olunur: "Geniş miqyaslı terror aktının nəticəsində son bir neçə gündə Rusiyanın sülhməramlılardan ibarət hərbi bazasının 9 əsgəri həlak oldu". Gürcüstan rəsmiləri isə bu terror aktını Rusiya xüsusi xidmət orqanlarının ssenarisi əsasında baş tutduğunu iddia edirlər. Siyasi şərhçi Aydın Quliyev rəsmi Moskvanın Gürcüstanın yenidən müharibə aparmaq və ya təcavüzə cavab vermək iqtidarında olmadığını bildiyini və Rusiyanın Gürcüstanla bağlı planlarının hələ bitmədiyini söylədi: "Ümumiyyətlə, belə bəyanatların verilməsindən asılı olmayaraq Rusiyanın Gürcüstan siyasətinin mahiyyətində dayanan çox ciddi bir məna var. Tural Bu da ondan ibarətdir ki, Kreml Gürcüstan ətrafında və həmin ölkənin daxilində vəziyyətin stabilləşməsini istəmir. Əgər təsəvvür etsək ki, Tiflis Qərbə inteqrasiya, NATO-ya üzvlük istiqamətində olan addımlarına nəzərə çarpacaq dərəcədə fasilə versə və özü ilə bağlı bütün problemlərin həlli üçün əsas fəaliyyət istiqamətini Moskvaya yönəltsə, o zaman Rusiyanın siyasəti dəyişəcək. Amma nəzərə alsaq ki, bu gün Gürcüstan çox qətiyyətlə və səs-küylə NATO-ya daxil olmaq siyasətini bəyanlayır, Rusiya da buna müvafiq olaraq Gürcüstanın daxilində və ətrafında olan vəziyyətin stabilləşməsinə imkan verməyəcək". Onun sözlərinə görə, şimal qonşumuzda yaxşı anlayırlar ki, Tiflisdə vəziyyət nə qədər qeyri-stabil olsa, Gürcüstanın NATO-ya qəbulu ən azı gecikəcək. Nazırkı şəraitdə Kremlin əsas xarici siyasəti də ona yönəlib ki, "balaca" düşmənin Şimali Atlantika Alyansına daxil olması mümkün qədər ləngidilsin. Rus siyasətçiləri başa düşürlər ki, artıq bu prosesin qarşısını almaq mümkün deyil. Amma Dmitri Medvedyevin hazırda ən böyük arzusu bu prosesin gecikməsinə nail olmaqdır: "Sergey Lavrovun da Gürcüstanın yeni müharibəyə cəhd etməsilə bağlı bəyanat müəyyən qədər həmin niyyətin təzahürü kimi dəyərləndirilməlidir. Yəni artıq bu bəyanat rəsmi Moskvanın Gürcüstanın ətrafında və onun daxilində gərginliyin bir qədər də artırılmasına yönəlik müəyyən hərəkətlərindən xəbər verir. Gzləmək olar ki, yaxın aylarda Gürcüstandakı vəziyyəti yenidən gərginləşdirmək üçün hansısa addımlara əl atılsın. Gürcü siyasətçiləri təxribatlara meylli olsa Rusiyanın planları baş tuta bilər". Ekspert Gürcüstana təcavüz kimi növbəti hədəfin nədən ibarət olacağını deməyin və bunu çox geniş təhlil etməyin də çətin olduğunu bildirdi: "Bəziləri Gürcüstanın daxilində yeni separatizm dalğasının baş qaldıracağını proqnozlaşdırırlar. Xüsusilə də Rusiyanın Gürcüstanda yaşayan erməniləri ayağa qaldıracağı daha çox səslənən fikirlərdir. Amma bu da real deyil. Çünki Ermənistanın quyruğu hazırda Gürcüstanın ayağının altındadır. Bu, Rusiyada yaşayan gürcü iş adamlarına qarşı böyük təzyiq kampaniyası şəklində və ya Abxaziya, Cənubi Osetiya ilə olan sərhədlərdə yeni lokal döyüşlərlə müşayiət oluna bilər". xalqcebhesi