Rusiyanın Ermənistana verdiyi vədlər Rusiyanın xarici işlər naziri Sergey Lavrovdan sonra müdafiə naziri Serdyukovun Ermənistana səfərləri baş tutdu. Rusiyanın Ermənistanla hərbi əməkdaşlığı genişləndirmək istəyi, xarici işlər və müdafiə nazirlərinin səfərləri nəyə hesablanıb? Bütün bunlar Azərbaycana nə vəd edir? Məsələyə münasibət bildirən hərbi ekspert Üzeyir Cəfərovun sözlərinə görə, Rusiyanın Ermənistanla hərbi əməkdaşlığı genişləndirmək istəyini NATO-ya cavab kimi qiymətləndirmək olar: “Rusiyanın xarici işlər və müdafiə nazirlərinin Ermənistana səfərlərini adi bir səfər kimi qarşılayıram. Düzdür, burda müəyyən incəliklər də var. Regionda, konkret olaraq Gürcüstanda Qərb dövlətlərinin sərgilədiyi mövqe istər-istəməz Rusiyanı qıcıqlandırır. Ona görə də Rusiya Cənubi Qafqazda özünün forpostu olan Ermənistanla hərbi əməkdaşlığını bir qədər də genişləndirmək istəyir. NATO-nun Gürcüstana gələcəyi qaçılmazdı. Rusiya da buna cavab olaraq belə addım atmaq istəyir. Eyni zamanda Amerika rəsmlərinin regiona, Azərbaycana səfəri Rusiyanı məcbur edir ki, Ermənistanla münasibətlərini gündəmdə saxlasın. Hamıya məlumdur ki, Qarabağ münaqişəsinin yaranmasının ən böyük səbəbkarı Rusiyadır və onun həllində bu dövlət maraqlı deyil. ATƏT-in həmsədrlərindən biri olsa da, hərəkətləri, atdığı addımları ilə təsdiq edir ki, separatçıları dəstəkləyir və onlarla bir mövqedədir. Ona görə də Rusiya rəsmilərinin Ermənistana səfərləri Azərbaycan üçün yaxşı heç nə vəd etmir. Çünki münaqişənin həllində Rusiya heç vaxt obyektiv mövqe sərgiləməyib və yaxın vaxtlarda da belə edəcəyi gözlənilmir”. Politoloq Zərdüşt Əlizadənin fikrincə, rus nazirlərinin Ermənistana səfərlərində məqsəd orada olan narahatlığı aradan qaldırmaqdır: “Ermənilər çox ümid edirdilər ki, Osetiyanı və Abxaziyanı tanıyandan sonra Rusiya Dağlıq Qarabağı da tanıyacaq. Onlara dedilər ki, malı mala qatmaq lazım deyil. Ermənilər də bundan çox narahatdırdılar. Bu səfərlər də ona görədir ki, narahatlığı aradan götürsünlər. Rusiya ermənilərə deyir ki, vaxt gələr, Qarabağı da tanıyarıq. Hələlik vaxt gəlməyib. Əsas odur ki, münaqişə donmuş vəziyyətdə qalsın”. Z.Əlizadənin sözlərinə görə, Rusiyanın Ermənistanla hərbi əməkdaşlığı genişləndirmək istəyi NATO-ya cavab kimi qiymətləndirilə bilməz: “Ola bilər ki, bu rusların NATO-ya cavabıdı. Ancaq praktiki olaraq Rusiyanın Ermənistandakı dəstəsi və Ermənistan ordusu qurbanlıq keçidirlər. Çünki regionda irimiqyaslı müharibə olsa, Ermənistandakı 3-4 min rus və 25 minlik erməni ordusu hərbi amil sayıla bilməz. Onlar ancaq Azərbaycan ordusunun yanında hərbi qüvvə sayıla bilər. Əsas siyasi oyunun, gedişlərin, səfərlərin bir məqsədi var. Ermənistana deyirlər ki, möhkəm durun, problem dondurulub, heç bir yenilik olmayacaq. Bizə lazımdır ki, münaqişə dondurulmuş vəziyyətdə qalsın. Qarabağ nə Ermənistanın, nə də Azərbaycanındı. Qarabağ Rusiyanın əlində alətdir ki, onun vasitəsilə hər iki dövləti özündən asılı vəziyyətdə saxlasın, regiona nəzarət etsin. Qarabağ münaqişəsinin bu funksiyası var. Bu funksiyanı da yerinə yetirməkdə davam edəcək”. Fizzə azadliq