Ukraynada kritik gün Ya yeni "narıncı" koalisiya yaradılacaq, ya səhnəyə Regionlar Partiyası çıxacaq, ya da bu ölkə növbədənkənar parlament seçkilərinə hazırlaşmağa başlayacaq Baş nazir Yuliya Timoşenko və prezident Viktor Yuşşenko arasında uzun müddətdir ki, müşahidə olunan soyuqluğun kulminasiya nöqtəsinə çatmasını çox gözləmək lazım gəlmədi. Gələn il keçiriləcək seçkilərdə prezident kreslosuna göz dikən baş nazir aləmi qarışdıran addım atdı. Söhbət bir müddət əvvəl Yuliya Timoşenkonun rəhbərlik etdiyi blokun ("YTB") rusiyapərəst Regionlar Partiyası ilə prezidentin səlahiyyətlərini məhdudlaşdıran bir neçə qanun layihəsinin qəbulu ətrafında razılığa gəlməsindən gedir. Bu, "YTB" ilə "narıncı" koalisiyada təmsil olunan "Bizim Ukrayna-Xalq Özünü Müdafiə" Blokunun sərt təpkisiylə qarşılandı və prezident Viktor Yuşşenkonu dəstəkləyən bu blok hökumətin tərkibindən çıxdığını bəyanladı. Ramiz Mikayıloğlu Viktor Yuşşenko da Ali Radanı buraxaraq növbədənkənar seçkilər keçirmək barədə qərar verə biləcəyini söylədi. Amma ABŞ-ın vitse-prezidenti Dik Çeyninin Kiyevə gəlişi, Yuliya Timoşenko və Viktor Yuşşenko ilə görüşündən sonra "narıncı" koalisiyanın bərpası, yenidən təşkilinin mümkünlüyü yönündə bəyanatlar səslənməyə başladı. Keçən həftə də "YTB" prezidentin səlahiyyətlərinin məhdudlaşdırılmasıyla əlaqədar qanunların parlamentə səsverməyə çıxarıldığı zaman Regionlar Partiyasından fərqli mövqe sərgilədi. Bu gün isə "narıncı" koalisiya ya yenidən formalaşdırılmalı, ya da prezident parlamenti buraxaraq, növbədənkənar seçkilərin keçirilməsi barədə qərar verməlidir. Çünki ölkə Konstitusiyasına görə nəzərdə tutulan müddət başa çatır. Bəs proseslər hansı yöndə cərəyan edə bilər? Baş nazir növbədənkənar parlament seçkilərinin keçirilməməsi üçün bacardığını edəcəyini bəyanlayıb. O bildirib ki, maksimum səy göstərmək lzımdır ki, daha bir növbədənkərar seçkilərlə bağlı xaosa yol verilməsin. Yuliya Timoşenko inanır ki, onlar qarşılıqlı anlaşmaya gələcək və koalisiya barədə razılaşma imzalayacaqlar. Ancaq baş nazirin keçən həftənin cümə günü Moskvada səfərdə olarkən rusiyalı həmkarı Vladimir Putinin mətbuat konfransında Viktor Yuşşenkonu "murzırka" adlandıraraq təhqir etməsinin qarşılığında susması diqqət çəkməyə bilməzdi. Üstəgəl, baş nazir sonradan ukraynalı jurnalistlərin bu yöndə suallarına cavab verərkən demişdi ki, bu ifadəylə tam razılaşmır, ancaq Viktor Yuşşenko da özü haqqında bu cür sözlərin işlədilməsinə müəyyən əsaslar verib. Bütün bunlar da Yuliya Timoşenkonun "narıncı" koalisiyanın baş tutması, təkrar parlament seçkilərinin keçirilməməsi yönündə nə dərəcədə səmimi olmasına müəyyən şübhələr yaradır. Məsələn, ukraynalı politoloq İqor Jdanovun qənaətinə görə, baş nazir "Bizim Ukrayna-Xalq Özünü Müdafiə" Bloku ilə koalisiyanın bərpasını arzulamır, yalnız imitasiya ilə məşğuldur. Çünki qorxur ki, rusiyapərəst Regionlar Partiyasıyla əməkdaşlıq "YTB"nin qərbyönümlü elektoratı arasında mənfi qarşılanar və bu elektorat seçkilərdə prezidentin blokuna üstünlük verər. Ekspertə görə, əgər "narıncı" koalisiyanı bu dəfə yenidən yaratmaq mümkün olsa belə, Ukrayna cəmiyyəti 2-3 ay sonra yenidən koalisiyanın parçalanmasının şahidi olacaq: "Bundan əlavə, çətin ki, koalisiya yaradanlar gələn il keçiriləcək prezident seçkilərində vahid namizədlə iştirak barədə razılığa gəlsinlər. Mahiyyətcə, koalisiyanın bərpasından sonra da parçalanma yaradan səbəblərin hamısı olduğu kimi qalacaq, onların heç biri aradan qaldırılmır". Regionlar Partiyasının parlamentdəki fraksiya rəhbəri Aleksandr Yefremov əmindir ki, Yuliya Timoşenko kreslosunu qorumaq naminə sərfəli olan hər şeyi etməyə hazırdır. Bununla belə o, "narıncılar"ın yeni koalisiyasının yaradılıb-yaradılmayacağını proqnozlaşdırmaqda çətinlik çəkib. Ötən həftə Yuliya Timoşenkonun siyasi şıltaqlıqlarından zara gəldiyini dilə gətirən Viktor Yuşşenko bu gün səhər "Bizim Ukrayna-Xalq Özünü Müdafiə" blokunun parlamentdəki fraksiyasıyla görüş keçirəcək. Bu görüşün məqsədi yeni parlament koalisiyasının formalaşdırılmasına kömək etməklir. "Ukrayna Kommunikasiya Portalı" yazır ki, bloka daxil olan partiyalar ("Narodnıy Rux", Avropa Partiyası, "İrəli, Ukrayna!", Xristian Demokrat İttifaqı (XDİ) və s.) bəyanlayıblar ki, Yuli Timoşenko ilə koalisiya barədə razılaşma uğur vəd etmir. XİD sədri Vladimir Stretoviç hesab edir ki, fraksiya yaratmaq səyləri nəticə vermir. Viktor Yuşşenkonun Litvin blokunu yeni koalisiyada görmək istəmədiyi də bəllidir. Yuliya Timoşenko da bunu təsdiqləyib. Koalisiya ilə bağlı isə prezident özü bildirib ki, hələ oktyabrın 4-də onun parlamenti buraxmaq barədə qərar vermək səlahiyyəti olub: "Ancaq 7 oktyabra qədər siyasi qüvvələrin hüquqi baxımdan koalisiyanı formalaşdırmaları üçün vaxt verdim. Əgər partiyalar razılığa gəlməsələr, mən parlamenti buraxacam. Oktyabrın 7-də mən məsləhətləşmə keçirəcəm. Bu andan sonra de-yure prezidentin parlamenti buraxmaq səlahiyyəti olur". Prezident parlamentə "Meksika serialları" oynamamağı da məsləhət görüb: "Növbədənkənar seçkilər Ukraynanın siyasi sisteminə böyük dəyişikliklər gətirməyəcək. Ən azı koalisiyanın formalaşdırılması naminə milli prioritetlər ətrafında razılaşma yolları axtarılmalıdır. Yoxsa Meksika seriallarındakı kimi oyunla məşğul olmaq, hər 12 aydan bir seçki keçirmək yaxşı deyil". Viktor Yuşşenko onu da vurğulayıb ki, oktyabrın 7-nə kimi parlamentdə yaradılacaq istənilən formatlı koalisiyanı qəbul etməyə hazırdır. Bu isə o deməkdir ki, hətta rusiyapərəst Regionlar Partiyası Litvin bloku və kommunistlərlə razılığa gələrsə, bir il əvvəlki kimi bu partiyanın sədri Viktor Yanukoviç də baş nazir postunda əyləşə bilər...