Siyasi-oftalmoloyi qüsur Respublikaçılar Obamanı ABŞ-ı amerikalılar kimi görməməkdə qınayır ABŞ vitse-prezidentliyinə Respublikaçılar Partiyasından namizəd Sara Peylin Demokrat Partiyasının prezidentliyə namizədi Barak Obamanı terrorçularla əlaqədə ittiham edib. "CNN"in yaydığı məlumata görə, Peylin Obamanın sağ radikal "Weather Underground" hərəkatının yaradıcısı Bill Ayreslə münasibətlərdə günahlandırıb. "Weather Underground" hərəkatı Vyetnamdakı müharibəyə qarşı sərt kampaniya aparması ilə məşhurdur. Hərəkat üzvləri 1960-cı illərdə ABŞ-da bir neçə qansız terror aktı həyata keçiriblər. Bunların arasında Pentaqon və Kapitolidəki partlayışlar da var. Amma "Weather Underground" insan itkisinə yol verməmək üçün həmişə aksiyaların yeri barədə əvvəlcədən xəbərdarlıq edirmiş. "New York Times" Ayers və Obama arasında mümkün əlaqə barədə açıqlama verib. Qəzetin məqaləsində terrorçunun və prezidentliyə namizədin tanışlığı geniş şərh olunub. S.Peylin isə Kolorado və Los-Ancelesdə tərəfdarları qarşısında çıxışı zamanı bu fakta toxunub: "Bu adam (Barak Obama) Amerikanı bizim gördüyümüz kimi görmür. Yəni bütün dünyada xeyir və ədalət uğrunda əsas mübariz kimi görmür. Onun bizim ölkəmizə inamı o qədər aşağıdır ki, özünə terrorçularla dostluq etməyi rəva görür". Obamanın qərargahı dərhal ittihama cavab verib. Demokrat namizədin tərəfdarları bildiriblər ki, Obama və Ayers həqiqətən də 1980-ci illərdə xeyriyyə təşkilatında bir yerdə çalışıblar: "Amma artıq 2005-ci ildən bu yana Obamanın Ayerslə münasibətləri yoxdur. Con Makkeynin qərargahı Obamanı tənqid etməklə respublikaçılar administrasiyasının günahı ucbatından baş verən iqtisadi böhrandan diqqəti yayındırmağa çalışır". Onu da qeyd edək ki, Amerikanın vise-prezidentliyinə namizədlər - demokrat Co Bayden və respublikaçı Sara Peylin arasında birinci və sonuncu teledebat keçirilib. Debatın birinci hissəsində söhbət başlıca olaraq Amerikadakı iqtisadi böhrandan, eneryi və ətraf mühit ehtiyaclarından gedib. Siyasi məsələlər müzakirə edilərkən namizədlərdən Amerika qoşunlarının İraqdan çıxarılacağı vaxt barədə sorğu-sual edilib. Debatdan öncə tamaşaçılara hər iki iştirakçının soruşulacaq suallar barədə məlumata malik olmadıqları bildirilib. Az keçməmiş müzakirə maliyyə böhranı və prezident Buşun bank sektoru üçün xilas planına yönəlib. İqtisadiyyat haqqında danışan Baydenin hücumları əsasən respublikaçıların prezidentliyə namizədi Makkeynə qarşı olub. Peylin prezidentliyə demokrat namizəd Obamanın Ağ evə seçilərsə, İran lideri Mahmud Əhmədineyadla danışıqlara gedəcəyi barədə şərhlərini tənqid edib: "Bu diktatorların bəzisinin Amerikadan zəhləsi gedir. Onlar bizə, bizim azadlığa, demokratiyaya, dözümlülüyümüzə, qadınların hüquqlarına nifrət edirlər. Belə adamlarla cənab Obamanın təklif etdiyi kimi necə oturub danışmaq olar? Bu, təhlükəlidir." Bayden isə bildirib ki, Makkeyn İrana barmaqarası yanaşır və Amerikanın qarşı tərəfdə olanlarla danışması olduqca vacibdir. Debatın sonunda hər iki namizəd nə üçün vitse-prezident olmaq istədiklərini dilə gətiriblər. Peylin özünün və Makkeynin sadə amerikalıların problemlərini başa düşdüklərini söyləyib: "Mən sizi əmin etmək istəyirəm ki, biz Amerika uğrunda mübarizə aparacağıq. Biz orta təbəqəni və sadə amerikalıları, adi Amerika ailəsini müdafiə edəcəyik. Mən də çox çətinliklərdən keçmişəm. Mən sınaqların nə olduğunu bilirəm. Allaha şükürlər ki, mən Amerikada yaşamağın necə gözəl olduğunu da bilirəm. Biz tanrı tərəfindən şərəfləndirilmişik. Mən və Makkeyn həmişə amerikalı olduğumuza görə fəxr etmişik." Senator Bayden isə qarşıdan gələn seçkilərin amerikalılar üçün çox önəmli olduğunu söyləyib: "Mənin böyüyüb başa çatdığım məhəllədə hörmət və şərəf hər şeydən önəmli idi. Sizin çoxunuz da mənim kimisiz. Bu məhəllələrdə analar-atalar uşaqlarını özlərinə inanmağı öyrədirdilər. Yəni bizə deyirdilər ki, şərəfli olsaq, çox işləsək, ölkəmizi sevsək hər şeyə nail ola bilərik. Biz buna inanırdıq və bu, belədir. Buna görə də mən və Obama Amerika boyunca bu inamı yenidən dirçəltmək uğrunda mübarizə aparırıq". Ekspertlər hər iki namizədin çıxışının güclü olduğunu bildiriblər. Lakin onların qənaətincə, vitse-prezidentlərin seciçi seçiminə təsiri çox hallarda az olur.