Vaşinqton konfransı başa çatıb Vaşinqton konfransı başa çatıb Azərbaycan və türk diasporu təşkilatları 907-ci düzəlişin aradan qaldırılması üçün səyləri birləşdirəcək Turqut ABŞ-ın paytaxtı Vaşinqton şəhərində USAN-ın Xarici Ölkələrdə Yaşayan Azərbaycanlılarla İş üzrə Dövlət Komitəsilə (XÖYAİDK) birgə təşkil etdiyi "ABŞ-Azərbaycan starteji müttəfiqlik əlaqələrinin inkişafında enerji təhlükəsizliyi və diasporun rolu" mövzusunda ikigünlük konfrans işini başa çatdırıb. Nüfuzlu Corc Vaşinqton Universitetində keçirilən müzakirələrə 300-yə yaxın diaspor nümayəndəsi qatılıb. Konfransın ilk günü müzakirələr ABŞ-Azərbaycan strateji tərəfdaşlığının genişləndirilməsinə dair təhlil və tövsiyələr, ölkələrimiz arasında ticarət və biznes təmaslarının genişləndirilməsi, Xəzər hövzəsinin enerji ehtiyatlarının ikitərəfli və çoxtərəfli münasibətlərə təsiri və türkdilli icmanın Amerikanın siyasi həyatında artan rolu ətrafında aparılıb. Müzakirələrdə Konqresin sabiq üzvləri Robert Livinqston, Qreq Laflin, Azərbaycanın ABŞ-dakı səfiri Yaşar Əliyev, ARDNŞ-nın vitse-prezidenti Elşad Nəsirov, ABŞ Azərbaycanlıları Şəbəkəsinin icraçı direkotru Adil Bağırov, Azərbaycanşünas professor Tadeuş Svyataxovski çıxış ediblər. Nüfuzlu "Heritage" Fondunun keçmiş SSRİ ölkələri üzrə baş tədqiqatçısı Ariel Koen deyib ki, qarşıdan gələn prezident seçkilərində hansı siyasi partiyanın qalib gəlməsindən asılı olmayaraq, Ağ Ev bölgəmizdə maraqlarının müdafiəsi naminə Azərbaycan kimi müttəfiqlərilə strateji tərəfdaşlıq əlaqələrini davam etdirəcək. Sabiq prezident Corc Buşun hakimiyyəti zamanı Ağ Ev aparatının başçısı olan Con Sununu isə vurğulayıb ki, Xəzər hövzəsinin neft yataqları olmadan belə Azərbaycan əhəmiyyətli geostrateji yerləşməsinə görə ABŞ üçün maraqlı tərəfdaşdır. Konfransın ikinci günündə Amerikanın Azərbaycan və digər türk icmalarının Konqreslə işinin düzgün qurulması, digər xalqların diaspor təşkilatlarıyla əlaqələrin genişləndirilməsi zərurəti, diasporumuzun keçdiyi inkişaf yolu və perspektivlər, daha mütəşəkkil fəaliyyəti, eləcə də noyabrdakı prezident seçkiləri ərəfəsində türk seçicilərin səfərbər olaraq eyni mövqedən çıxış etməsi mövzuları diqqət mərkəzində olub. Dövlət Komitəsi sədrinin birinci müavini Valeh Hacıyev, Milli Məclisin üzvü Asim Mollazadə, ölkəmizin BMT-dəki daimi nümayəndəsi Aqşin Mehdiyev, Azərbaycanın Los-Anceles şəhərindəki baş konsulu Elin Süleymanov, Meksikadakı diplomatik nümayəndəliyimizin müvəqqəti işlər vəkili İlqar Muxtarov Amerikadakı Azərbaycan icmasının vətənlə sıx münasibətlər qurmasının əhəmiyyətindən danışıb, ölkəmizdə son illərdə baş verən ictimai-siyasi proseslər, Ermənistan-Azərbaycan, Dağlıq Qarabağ münaqişəsinin həllində Azərbaycanın beynəlxlaq hüquq normaları və prinsiplərinə əsaslanan mövqeyi barədə ətraflı məlumat veriblər. Şəbəkə üzvləri Azərbaycan və türk diasporu təşkilatlarının gündəminə duran prioritet məsələlər, o cümlədən Azadlığa Dəstək Aktının 907-ci maddəsinin tamamilə aradan qaldırılması, Dağlıq Qarabağ münaqişəsinin həllində Azərbaycanın mövqeyinə ABŞ-ın geniş dəstəyini qazanmaq üzrə səyləri gücləndirərək Konqreslə təmasları artırmaq qərarına gəliblər. Konfransda ABŞ Azərbaycanlıları Şəbəkəsi diaspor quruculuğunda göstərdiyi xidmətlərə görə qurumun "Liderlik" mükafatını təqdim edib. Builki laureatlar ABŞ-ın Kolumbiya Universitetinin professoru, azərbaycanşünas tarixçi Tadeuş Svyatoxovski və Respublikaçılar Partiyasının seçkiqabağı qurultayındakı ilk Azərbaycan mənşəli nümayəndəsi Con Vəfai olublar. Sonda Amerikada yaşayan həmvətənlərimizə, Amerika ictimai təşkilatlarına, dövlət qurumlarına, Konqresə və prezidentliyə namizədlərə müraciətlər qəbul edilib. Müraciətlərdə Azərbaycan gerçəklikləri, Dağlıq Qarabağ münaqişəsinin yalnız Azərbaycanın ərazi büövlüyü çərçivəsində həllinin mümkünlüyü və bu məsələdə Amerikanın rolunun vacibliyi qeyd olunub. Konfrans Vaşinqtonun məşhur Kennedi mərkəzində Azərbaycan incəsənət ustalarının iştirakıyla keçirilən konsertlə başa çatıb. Konsert proqramında Azərbaycanın klassik və xalq musiqisi nümunələri təqdim olunub. İsmayıl Hacıyevin rəhbərliyi altında "İpək Yolu" Kanada-Azərbaycan kamera orkestri muğamın beynəlxalq aləmdə təbliğində böyük xidmətləri olan Heydər Əliyev Fondunun prezidenti, YUNESCO və İSESCO-nun xoşməramlı səfiri Mehriban Əliyevava həsr edilmiş "Dünyanın Qızıl Gülü" əsərini də ifa edib.dak