PREZİDENT İLHAM ƏLİYEV MÜHARİBƏ EHTİMALINDAN DANIŞIB: «AZƏRBAYCAN İSTƏNİLƏN YOLLA ÖZ ƏRAZİ BÜTÖVLÜYÜNÜ BƏRPA EDƏ BİLƏR» Oktyabrın 4-də Ağdama səfər edən prezident İlham Əliyev Quzanlı qəsəbəsindəki çıxışında Cənubi Qafqazda avqust ayında baş verən son hadisələrdən bəri ilk dəfə müharibə ehtimalından danışıb. İ.Əliyev Azərbaycan dövlətinin Dağlıq Qarabağ münaqişəsinin həlli üçün səy göstərməkdə davam etdiyini bildirib: «Biz məsələnin həlli üçün müxtəlif tədbirlər görürük, həm danışıqlarda iştirak edir, həm də bu məsələnin həlli ilə məşğul olan vasitəçi ölkələrlə əlaqələrimiz var. Amma əminəm ki, bizim öz gücümüz məsələnin həllində həlledici rol oynayacaq. Beynəlxalq hüquq normaları bu əsası bizə verir. Bütün dünya Azərbaycanın ərazi bütövlüyünü tanıyır və dəstəkləyir. Dağlıq Qarabağ daxil olmaqla bütün Azərbaycan torpaqları azad edilməlidir və işğalçı qüvvələr işğal olunmuş torpaqlardan geri çəkilməlidir. Bunu həm beynəlxalq birlik tələb edir, Birləşmiş Millətlər Təşkilatı və başqa təşkilatlar tərəfindən qəbul edilmiş qərarlar, həm də, sadəcə, məntiq tələb edir, həqiqət tələb edir». Prezident yalnız torpaqlar tam azad ediləndən sonra Dağlıq Qarabağın statusunun müzakirə oluna biləcəyini vurğulayıb: «Bu status Azərbaycanın ərazi bütövlüyü çərçivəsində olmalıdır. Bu bizim prinsipial mövqeyimizdir. Bu mövqe bütün dünyaya bəllidir, vasitəçilərə bəllidir, Ermənistan tərəfinə bəllidir. Sadəcə olaraq biz hələ gözləyirik ki, Ermənistan tərəfi reallıqlarla hesablaşmalı olacaq. Bölgədə yaranmış yeni vəziyyətlə bağlı öz hərəkətində düzəlişlər edəcək və özünə aid olmayan torpaqlardan könüllü şəkildə geri çəkiləcək. Hələ ki, bizdə belə ümidlər var. Bu ümidlərin son müddət ərzində güclənməsi prosesi müşahidə olunur, müəyyən bəyanatlar verilir, bəzi təkliflər irəli sürülür. Biz isə bütün bunları izləyirik, təhlil edirik, öz fikrimizi bildiririk və bildirəcəyik. Biz gözləyirik ki, Ermənistan işğal olunmuş torpaqlardan öz xoşu ilə, könüllü surətdə çəkilsin və məsələ sülh yolu ilə həll edilsin. Əgər bu olmasa, onda bölgədə vəziyyət heç vaxt sabitləşməyəcək. Əgər bu olmasa, Ermənistan bundan sonra da təcrid edilmiş vəziyyətdə yaşayacaq və Azərbaycanın üstünlüyü günü-gündən daha da artacaq. Bu gün Ermənistanla Azərbaycanı müqayisə etmək mümkün deyil. Torpaqlarımız işğal olunan zaman bizim aramızda o qədər də böyük fərq yox idi, hətta xaricdən müdaxilələr nəticəsində Ermənistanın hərbi potensialı bizimkindən daha da güclü idi. İndi bu mənzərə tamamilə dəyişilib. Bu gün Azərbaycan həm iqtisadi, həm hərbi cəhətdən Ermənistandan bir neçə dəfə üstündür. Bizim iqtisadiyyatımız Ermənistan iqtisadiyyatından bir neçə dəfə böyükdür. Bizim büdcə xərclərimiz onlarınkından təxminən 5-7 dəfə çoxdur. Bizim hərbi xərclərimiz onların bütün dövlət xərclərinə bərabərdir və bu proses bundan sonra da davam etdiriləcək». Prezident Ermənistanın hər tərəfdən özünü təcrid olunmuş vəziyyətə salan ölkə kimi gələcək perspektivlərinin qeyri-müəyyən olduğunu deyib: «Əgər öz qonşuları ilə normal münasibətlər qurmasa, əgər öz işğalçı siyasətindən əl çəkməsə, onda Ermənistanın gələcək inkişaf imkanları çox böyük şübhə altına düşəcəkdir. Bizim isə həm iqtisadi imkanlarımız, coğrafi vəziyyətimiz, siyasi mövqeyimiz, həm də bölgədə artan nüfuzumuz və əlbəttə ki, ordu potensialımız tam əminliklə deməyə əsas verir ki, biz istədiyimizə nail olacağıq. Sadəcə olaraq mən istəyirəm ki, bu məsələ sülh yolu ilə həll edilsin, yenidən müharibə başlamasın. Ancaq əgər bütün bu danışıqlarda müzakirə olunan məsələlər öz həllini tapmasa, əlbəttə, Azərbaycan istənilən yolla öz ərazi bütövlüyünü bərpa edə bilər. Bu bizim daxili işimizdir. Heç kim bu işə müdaxilə edə bilməz və heç kim Azərbaycanı öz haqlı yolundan, siyasətindən döndərə bilməz. Biz müstəqilliyi ona görə qazanmamışıq ki, müstəqillik şərti xarakter daşısın». «Media forum»