Rəsmi Bakı Sergey Lavrovun “sənədlər”indən xəbərsizdir Rusiyanın Gürcüstana müdaxiləsindən sonra ATƏT Minsk Qrupunun həmsədrlərindən biri olan Rusiyanın vasitəçilik missiyasının şübhə altına düşməsinə baxmayaraq, Moskva hər vasitə ilə qurumdakı aparıcı rolunu saxlamağa cəhd edir. Dağlıq Qarabağ münaqişəsinin aradan qaldırılması ilə bağlı vasitəçilik missiyasını həyata keçirən ATƏT Minsk Qrupuna həmsədr ölkələrdən biri olan Rusiya problemin həlli ilə əlaqədar tərəflər arasında razılaşdırılan bəzi məqamların olduğunu və bunun rəsmi şəkildə sənədləşdirildiyini iddia edib. Bakı isə adıçəkilən məsələ ilə bağlı ortada hər hansı razılaşdırılmış sənədin olmadığını qəti şəkildə bəyan edir. Rusiyanın Gürcüstana müdaxiləsindən sonra ATƏT Minsk Qrupunun həmsədrlərindən biri olan Rusiyanın vasitəçilik missiyasının şübhə altına düşməsinə baxmayaraq, Moskva hər vasitə ilə qurumdakı aparıcı rolunu saxlamağa cəhd edir. Bunu Ermənistana rəsmi səfər edən Rusiya xarici işlər naziri Sergey Lavrovun Yerevanda verdiyi açıqlama da sübut edir. Lavrov Ermənistan xarici işlər naziri Edvard Nalbandyanla görüşündə deyib ki, Dağlıq Qarabağ münaqişəsinin həlli prosesində bir sıra prinsipial məqamlar razılaşdırılıb. Görüşdən sonra jurnalistlərə verdiyi açıqlamada rusiyalı nazir: “Dağlıq Qarabağ münaqişəsinin həlli prosesində bir sıra prinsipial məqamlar razılaşdırılıb. Bu məqamlar ATƏT-in Minsk Qrupunun Rusiya, ABŞ və Fransadan olan həmsədrləri tərəfindən sənədləşdirilib və ATƏT-də saxlanılır. Orada təbii ki, razılaşdırılmayan məsələlər də var, ancaq bu məsələlərin həllinə imkan yaradacaq müxtəlif variantlar da mövcuddur”, - deyib. Sergey Lavrovun sözlərinə görə, tərəflər arasında davam etdiriləcək görüşlər zamanı münaqişənin həllində irəliyə doğru addım atmaq mümkün olacaq. Bununla belə S. Lavrov ölkəsinin münaqişənin sülh yolu ilə həll edilməsində maraqlı olduğunu və bu məsələdə Ermənistanla mövqelərinin üst-üstə düşdüyünü xüsusi vurğulayıb. Rusiya xarici işlər naziri Gürcüstanın münaqişəni hərbi yolla həlletmə cəhdini pis nümunə adlandıraraq, bu cür yollara əl atılmasının xoşagəlməz hadisələrə yol aça biləcəyi barədə Bakıya özünəməxsus şəkildə xəbərdarlıq etməyi də unutmayıb. O: “Biz Saakaşvili rejiminin Cənubi Osetiyaya təcavüzündən sonra Qafqazda yaranmış vəziyyətə xüsusi diqqət ayırdıq. Hesab edirik ki, istənilən münaqişə beynəlxalq hüquq əsasında danışıqlar masasında həllini tapmalıdır”, - deyib. Rusiyalı nazirin sözlərinə görə, böhranlı vəziyyətlərin güc tətbiq etməklə həlli cəhdləri iflasa məhkumdur. Bəs doğrudanmı Dağlıq Qarabağ münaqişəsi ilə bağlı bəzi prinsipial məqamlar razılaşdırılaraq, ATƏT Minsk Qrupu tərəfindən sənədləşdirilib? Məsələyə münasibət bildirən Xarici İşlər Nazirliyi mətbuat xidmətinin rəhbəri Xəzər İbrahim bizimlə söhbətində tərəflər arasında yalnız bəzi məsələlərdə razılığın əldə edildiyini söylədi. O: “Biz münaqişənin həlli ilə bağlı bütün məsələlərdə razılıq əldə etdikdən sonra onun rəsmi sənəd halına salınmasına tərəfdarıq. Ona görə də bu məsələlərdə hər hansı erkən sənədləşdirmədən söhbət gedə bilməz”-dedi. Xəzər İbrahim bildirdi ki, Sergey Lavrovun haqqında danışdığı sənədləşdirmədən rəsmi Bakı xəbərsizdir. Çünki ortada bununla bağlı hər hansı sənədin olması onlara məlum deyil. Xəzər İbrahim Sergey Lavrovun belə bir açıqlama verməsinin səbəbini anlamadığını da vurğuladı.zaman