Sarkisyanın növbəti saxtakar çıxışı Serj Sarkisyanın BMT Baş Məclisinin 63-cü sessiyasındakı çıxışı ölkəsinin həyata keçirdiyi riyakar siyasətin məntiqi nəticəsi kimi qiymətləndirilməlidir. Rəsmi Yerevan Azərbaycanı durmadan silahlanaraq, güc potensialını artırmaqda günahlandırır. Şübhəsiz demək olar ki, Ermənistan prezidenti BMT Baş Məclisində ilk dəfə çıxış etməklə, bayağı sensasiya doğurmağı qarşısına məqsəd qoyub. Azərbaycanın hərbi büdcəsinin artmasından narahatlıq ifadə edən işğalçı dövlətin lideri Baş Assambleyanın «Azərbaycanın işğal olunmuş ərazilərindəki vəziyyətə dair» qətnamə qəbul etməsini əbəs saymaqla bildirib ki, guya Qarabağ münaqişəsinin həlli üçün səylər göstərildiyi halda qətnamənin qəbulu tərəflərdən birinin dəstəklənməsinə qulluq edir. Bununla yanaşı, Sarkisyan qan qoxulu fikirlər də səsləndirib. O suallar doğuran ritorik sualı nitqinə daxil edib. Diqqət yetirin – «Doğrudanmı dondurulmuş münaqişələrin peşəkar yanaşma tələb etdiyini anlamaq üçün qan axmalıdır?». Dünya qloballaşsa da, hələ də bəzi dairələr Qarabağ problemində kimin təcavüzkar və kimin bu təcavüzün qurbanı olduğu haqda bütöv təsəvvür toplaya bilməmişdir. Bundan sui-istifadə etməyi qarşısına məqsəd qoyan Ermənistan prezidenti bəzi boşluqların olmasından yararlanıb əlavə dividentlər qazanmağa çalışır. Onun təbirincə desək, onda ermənilərin Azərbaycan torpaqlarına basqın etməsi əsla qəsbkarlıq deyil, sadəcə tarixi ədalətin bərpasıdır. Belədirsə, onda sual olunur – hansı tarixin, və ya kimin tərəfindən yazılmış tarixin? Erməni-daşnak xislətinə bələd olanlara yaxşı məlumdur ki, siyasi oyunbazlar işləri bərkə düşdükdə həmişə demaqogiyaya üz tuturlar. Məhz belə gedişlə gözlərə toz atılır, vaxt udulur, bir də ki, bəzən gözlənilməz imkanlar açılır. Dəlil-sübuta söykənməyən iddialar həm də piar kampaniyalarda ehtiyaclı olurlar. Odur ki, Serj Sarkisyan ilk dəfə böyük meydanda peyda olmaqla bütün vasitələrin dəyərində divident ovlamaq istəyərək öz ölkəsinə qalib qismində qayıtmaq istəyir. Belə olmasaydı, o sadəlöhvcəsinə «BMT-nin münaqişələrin həlliylə bağlı qüvvədə olan nizamnaməyə əməl olunmasının vacibliyindən» dəm vurmazdı. Belədirsə, bəs onda niyə Ermənistan rəhbəri ali beynəlxalq qurumun birdən-birə 4 qətnaməsini yada salmır? Onlardan irəli gələn tələblərə əməl etmir? Bu «niyə»-lərin səbəbləri aydındır. İşğalçı tərəf həmişə öz dağıdıcı siyasətinə bəraət qazanmaq üçün gah mıxa, gah da nala vurur, mötəbər qüvvələri həqiqətdən yayındırmağa çalışır. Amma belə planlar bir müddət inandırıcı görünsə də, əvvəl-axır iflasa uğrayır. Sonra isə avantürist amal daşıyıcıları üçün faciəvi mərhələ başlayır. Axı böyük ağ yalanın altından çıxmaq bir o qədər də asan iş deyil. butovaz