Rusiya forpostuna təzyiq göstərir "Rusiyanın beynəlxalq mövqeyinin zəiflədiyi vaxtda İrəvanın Ankara ilə münasibətlər qurması Kremli qıcıqlandırıb" Rusiya forpostu olan Ermənistana satdığı qazın qiymətini qaldıracaq. 2009-cu il aprelin 1-dən qazın hər min kubmetrinə görə ermənilər 154 dollar ödəməli olacaqlar. "ArmRosqazprom"un direktoru Karen Karapetyan deyib ki, ölkədə qazın qiyməti gələcəkdə də artacaq. Məsələn, 2010-cu il aprelin 1-dən Ermənistana təbii qaz 200 dollara satılacaq. Bu barədə razılaşmaya Rusiya və Ermənistan prezidentləri imza atıblar. Razılaşma 2009-cu ildən 2015-ci ilə qədər müddəti nəzərdə tutur. Karen Karapetyan iddia edib ki, qiymət artımı sadə vətəndaşların və istehsalçıların durumuna təsir göstərməyəcək, çünki qazın bahalaşması dolların qiymətdən düşməsi və Ermənistanda alıcılıq qabiliyyətinin artmasıyla bağlıdır. Tural "Qiymət ona görə yanvarda deyil, apreldə artırılır ki, bazar qiymət artımına adaptasiya olunsun. Gələcəkdə qiymətlərin dəyişməsi Rusiyanın inkişaf tempi, Rusiya və Ermənistanın bazar qiymətlərinə keçməsiylə paralel olacaq. Prezidentlərin imzaladığı razılaşma bazar üçün yaxşı şərait yaradır". "ArmRosqazprom"un direktoru Karen Karapetyan və "Qazprom"un prezidenti Aleksey Millera də görüşləri zamanı Ermənistana qaz satışı ilə bağlı razılaşmanı müsbət dəyərləndiriblər. Ermənistan prezidenti Serj Sərkisyan da imzalanan sənədi yüksək qiymətləndirir. Onun fikrincə, 2009-cu il aprelin 1-dən qazın qiymətinin 200 dollara qalxması sosial yükü elə də əhəmiyyətli dərəcədə artırmayacaq. Politoloq Leyla Əliyeva Ermənistanın ağır iqtisadi durumuna baxmayaraq bu ölkəni qarşıda yeni sürprizlərin gözlədiyini bildirdi: "Gürcüstan olaylarından sonra Rusiyanın Ermənistanla bağlı yeni, xüsusi niyyətləri meydana çıxıb. Moskvanın hərbi baxımdan İrəvanda mövcudluğu və bu ölkənin siyasi rəhbərliyilə müttəfiq kimi davranması məhz Türkiyə və Azərbaycan təhlükəsilə bağlıdır. Ermənistanın indiki rəhbərliyinin Ankara ilə münasibətlər qurmağa başlaması və bu inanılmaz addımların Rusiyanın beynəlxalq aləmdə mövqeyinin zəiflədiyi bir vaxtda atılması Kremlə mənfi təsir edir". Politoloqun fikrincə, hazırkı siyasi gedişlər Rusiyanın regionda olan rolunu zəiflədə və Moskvanın Ermənistana olan təsirini azalda bilər. Çünki şimal qonşumuzun öz forpostu ilə təhlükəsizlik və hərbi alyans qurması həm də Ermənistanın Türkiyə və Azərbaycanla olan düşmənçiliyilə bağlıdır. Artıq İrəvan uzun illər düşmən gözüylə baxdığı ölkələrlə münasibətləri yaxşılaşdırmağa başlayırsa, bu, o deməkdir ki, Kremlin Ermənistana hansısa dəstəyinə və ya iqtisadi yardımlarına ehtiyac olmayacaq. Dmitri Medvedyevin indiki Ermənistan iqtidarına verdiyi siyasi dəstək də mənasını itirir: "Ona görə də Rusiya Qafqazdan gələn "yeni qərb siyasətinin"-ABŞ-ın Qafqaz ölkələrini sıx şəkildə birləşdirmək və Türkiyəni də bu birliyə mənəvi dəstək göstərməyə vadar etmək qoxusunu hiss edir. Bu mənada Kreml bu arzulamadığı kabusla üzləşməmək üçün Ermənistanla təzyiq dilində danışmağa başlayıb ki, İrəvan iqtisadi cəhətdən Moskvadan nə qədər asılı olduğunu anlayıb, Ankara rəsmilərilə yeni dost kimi deyil, ancaq adi bir qonşu dilində danışsın". Leyla Əliyevanın fikrincə, iqtisadi təzyiqlərdən sonra Kreml rəsmilərinin Ermənistana siyasi təpkiləri də ola bilər. Bu, özünü Azərbaycana Dağlıq Qarabağ münaqişəsinin həllində güzəştlərə getmək və ya rəsmi Bakının maraqlarına cavab verən manevrlər etməkdə göstərər: "Amma indiki dönəmdə çox ciddi şəkildə Moskvanın Azərbaycana bu cür şanslar verməsi və ya Kremllə Bakının bu şəkildə yaxınlaşması inandırıcı deyil. Əgər İrəvanın müəyyən mənada yolunu azmasının müqabilində Qarabağ məsələsində Azərbaycan üçün xeyirli qərarlar verilərsə, Bakı Kreml ilə açıq şəkildə müttəfiq olmalıdır. Bu isə ölkəmizin Qərbə "əlvida" deməsi anlamına gələcək. Amma hansısa bir səviyyədə Ermənistana təzyiq əlaməti olaraq buna bənzər manevrlərin şahidi ola bilərik". xalqcebhesi