ƏRDOĞANIN ADI HALLANAN YEYİNTİ İŞİNDƏ ŞOK GƏLİŞMƏLƏR “Dəniz fənəri” işini araşdıran hakim və prokuror “əsas günahkarlar Türkiyədədirlər” dedi Türkiyənin baş naziri Rəcəb Tayyib Ərdoğanın da adı hallanan “Dəniz fənəri” işi ilə bağlı yeni məlumatlar yayılıb. Məlum olduğu kimi, bu cinayət işi Almaniyada aparılır və söhbət milyonlarla dolların mənimsənilməsindən gedir. “Dəniz fənəri” işini aparan hakim Cokhen Müller və Frankfurt prokuroru Doris Möller “Posta” qəzetinə ilginc açıqlama veriblər. “Hürriyət” qəzetinin yazdığına görə, Müller cinayət işində əsas günahkarlardan biri hesab edilən “Dəniz fənəri”nin mühasibi olan Firdovsi Ermişin ifadələrindən danışır. Hakim əsl günahkarların hələ də həbs edilmədiyini, onların Türkiyədə olduğunu deyib. Müllerin sözlərinə görə, “Dəniz fənəri”ndə toplanan ianələr Türkiyəyə göndərilib və iqtidara yaxın “Kanal 7"nin yetkililərinə təslim edilib. Hakim əlavə edib ki, ”Kanal 7"nin yönətim başqanı Zəkəriyyə Karaman və Türkiyə Radio Televizyon Üst Qurum başqanı Zahid Akmanın “Dəniz fənəri”ndə pay sahibi olduqlarını bildirib. “Onlar ”Dəniz fənər"ini öz məqsədləri üçün istifadə ediblər. Zahid Akman TRTÜQ başqanı olduqdan sonra “Dəniz fənəri”nə bağlantıları ilə bağlı məlumatları gizlədiblər". Müller bu cinayət əməllərinə görə Almaniyada 5 il 10 ay müddətinə həbsə məhkum edilən Mehmet Gürhanın bu işdə sadəcə kukla olduğunu da deyib: “Onun arxasında Türkiyədə daha iri fiqurlar dayanır. ”Dəniz fənəri"nin rəsmi büdcəsi ilə qeyri-rəsmi büdcəsi arasında fərqi araşdırdıq. Söhbət ən azı 11, 7 milyon avronun mənimsənilməsindən gedir". Frankfurt prokuroru isə deyib ki, Zahid Akman bu işdə şübhəlilərdən biri hesab edilir və ilk imkanda istintaqa çağırılacaq. Prokuror TRTÜQ başqanının kooperativ davasında da adı hallandığını söyləyib. Məlum olduğu kimi, bu cinayət işi ilə bağlı müxalifət də Ərdoğana imkan düşdükcə ittihamlar yağdırır. Bu məlumatlara münasibət bildirən CHP başqanı Dəniz Baykal deyib ki, Zahid Akmanın istefa verməsi vacibdir: “Çünki ortada ciddi ittihamlar var. Onun istefa verməsi AKP üçün də, Türkiyə üçün də vacibdir”. “Dəniz fənəri” dərnəyində yığılan ianələrin mənimsənilməsində adı hallandırılan baş nazir Ərdoğan isə qəzəblidir. Srağagün Kocatəpə camisində namaz qılandan sonra kitab və mədəniyyət sərgisinə baxan baş nazirlə bağlı olay yaşanıb. Xəbər verildiyi kimi, bu cinayət işi ilə bağlı Türkiyənin mediamaqnatı sayılan Aydın Doğanla Ərdoğan arasında ciddi gərginlik var. Hətta Ərdoğan Aydın Doğana yaxınlığı ilə tanınan media quruluşlarının boykot edilməsinə çağırış edib. Bu səbəbdən də indi Ərdoğana ünvanlanan hər bir sual baş naziri düşündürür və qıcıqlandırır. Kocatəpə camisində də baş verənlər bunu sübut edir. “Milliyet” qəzeti yazır ki, sözügedən camidəki sərgidə “Dəniz fənəri”nin də stendi olub. “Milliyet” və “Hürriyet”in müxbirləri həmin stendin qarşısında gözləyərək Ərdoğanın şəklini çəkmək istəyiblər. Amma Ərdoğan onun başına bəla gətirən “Dəniz fənəri”nin stendi önündən başqa tərəfə gedib. Müxbirlərin Ərdoğana yaxınlaşması isə baş naziri qəzəbləndirib. O, üzünü “Hürriyət”in müxbirinə tutaraq “tərbiyəsizlik etmə, kənara çəkil” deyib. Onun bu sözlərindən sonra isə cangüdənləri müxbirləri zorla camidən çölə çıxarıblar. QAŞQAY musavat