Moskva Sərkisyanın bəyanatını geri oxutdu BBS-in müxbiri Eldar İsmayılzadə Ermənistan prezidenti Serj Sərkisyanın heç bir ifadəsinin təhrif olunmadığını bildirib. Xatırladaq ki, Ermənistan prezidenti Serj Sarkisyan BBS radiostansiyasının Azərbaycan xidməti tərəfindən yayılan və ölkədə geniş rezonans doğuran açıqlamalarına düzəliş edib. Ermənistan prezidentinin mətbuat xidmətinin yaydığı açıqlamada qeyd olunub ki, o, BBS əməkdaşı ilə söhbəti zamanı investisiyalar qoyulsa, gələcəkdə Dağlıq Qarabağın bəlkə Azərbaycanın tərkibində qalmağa razılıq verə biləcəyini deməyib. Eldar İsmayılzadə isə yazdıqlarına cavabdeh olduğunu söyləyib. O, Serj Sərkisyanın erməni dilində dediklərinin, yəni səs yazısının radioda saxlandığını nəzərə çatdırıb: "O, erməni dilində deyib və ingilis dilinə tərcümə olunub. Ramiz Mikayıloğlu Ermənistan prezidentinin dedikləri hər sözünə qədər BBS-nin Azərbaycan xidmətinin saytında yerləşdirilib. Mən bu gün də tərcüməçi ilə danışmışam. O da mənə bildirdi ki, Serj Sarkisyanın heç bir ifadəsi təhrif olunmayıb". O da maraqlıdır ki, "Mediamaks" agentliyinin yaydığı məlumatda da Ermənistan prezidentinin suala cavab zamanı "investisiyalar qoyulsa, gələcəkdə Dağlıq Qarabağın bəlkə Azərbaycanın tərkibində qalmağa razılıq verə bilər" sözləri yer alıb. Bütün bunların fonunda Serj Sərkisyanın nədən dediklərini bir gün sonra təkzib etməyə çalışması suallar doğurmaya bilməz. Azərbaycanlıların yurd-yuvalarından qovulmasında, Xocalı qətliamında belə iştirak etmiş bu şəxs nəyə görə əvvəlcə Qarabağın Azərbaycanın tərkibində qalması mümkünlüyündən söz açır, sonra tez-tələsik belə ifadə işlətmədiyini bəyanlayır? Digər tərəfdən, BBS kimi nüfuzlu radiostansiyalar belə açıqlamaların səs yazısını bir müddət saxlayır və Ermənistanda prezident kürsüsündə oturan şəxsin də bunu bilməsi lazımdır. Deməli, əvvəlcə və bir gün sonra Serj Sərkisyanı danışdıran səbəblər fərqli olub. Həmin səbəblərə gəlincə, bir məqama diqqət yetirmək lazımdır. Hələ Türkiyə prezidenti Abdulla Gül Ermənistana səfərə gəlməzdən əvvəl Qərb mətbuatı yazırdı ki, "Nabucco" kəməri Ermənistandan keçə bilər. Bu, Gürcüstanda vəziyyətin o qədər də etibarlı olmamasıyla əsaslandırılırdı. Sonradan Türkiyənin xarici işlər naziri də "Nabucco" layihəsinin bu ölkədən keçməklə reallaşmasını mümkün saydıqlarını dilə gətirdi. Ötən gün Türkiyənin "Star" qəzeti ABŞ və Avropanın boru xəttinin Ermənistandan keçməsini istədiklərini yazıb. Qəzet indi Ankaranın cavabının gözləndiyini bildirir. "Nabucco" layihəsində Ermənistanın iştirakı üçün Dağlıq Qarabağ münaqişəsinin həlli istiqamətində ciddi irəliləyiş olmalı və bu irəliləyiş həm də Azərbaycanı razı salmalıdır. Sözsüz ki, status məsələsinin dərhal çözülməsini Qərb də mümkün saymır. Ancaq ABŞ və Avropa Birliyinin əvvəlki bəyanatlarından da bəllidir ki, bu güc mərkəzləri Qarabağ münaqişəsinin həlli üçün həm böyük həcmdə pullar xərcləməyə hazırdır, həm də qısa müddətdə iqtisadi əlaqələrin bərpasını zəruri sayırlar. İrəvanın hansısa inkişaf ssenarisi nəticəsində Dağlıq Qarabağın Azərbaycanın tərkibində qalmasıyla razılaşması müqabilində "Nabucco"nun bu ölkədən keçməsinə qərar verilməsi də kifayət qədər "böyük mükafatdır". Belə görünür ki, Abdulla Gülün səfərindən sonra Serj Sərkisyanın dilini də "Nabuco" təklifi açıb. Ancaq Serj Sərkisyanı prezident kürsüsündə əyləşdirən Moskvaya belə bəyanat xoş gəlməyib. Nəticədə, Rusiyanın vassalı olan Ermənistanın hakimiyyəti tez-tələsik mövqeyində korrektələr edib. Yeri gəlmişkən, Ermənistanda hakim koalisiyada təmsil olunan "Daşnaksütun"un nümayəndəsi, deputat Alvard Petrosyan mətbuat konfransı düzənləyib. O deyib ki, erməni xalqı ən ağır vaxtlarında Qarabağın Azərbaycanın tərkibində qalmasıyla razılaşmayıb və indi də razı deyil. Bu arada ABŞ-dakı Erməni Milli Komitəsi Dağlıq Qarabağ ermənilərinin "müstəqilliyini" dəstəkləyən 100-ə yaxın amerikalı konqresmenin qatıldığı tədbir keçirib. Separatçı bölogənin de-fakto müstəqilliyinin 20-ci ildönümünə həsr olunan tədbirdə Vaşinqtonun oyuncaq rejimə dəstəyini artırması tövsiyyə olunub. Separatçı rejimin ABŞ-dakı nümayəndəsi Vardan Barseqyan "The Wall Street Yournal" dərgisində məqaləylə çıxış edib. Məqalədə Qarabağdakı separatçı rejimi Azərbaycanın təzyiqlərindən və mümkün hərbi müdaxiləsindən qorumağın zəruriliyi vurğulanır. Yazıda ABŞ-ın Qarabağ ermənilərinin referendum yoluyla müqəddəratlarını təyin etmələrinə dəstək verilməsi istənilir. Bütün bunlar göstərir ki, "Nabucco" və Qərbin digər iqtisadi mükafatlarından imtinaya qərar verən Ermənistan hakimiyyəti, o cümlədən xaricdəki erməni lobbisi separatçı rejimin "müstəqilliyinin" tanınması məsələsini gündəmə gətirməyə çalışır. Ancaq Moskvanın hərbi müdaxilə qərarı verməsindən sonra Gürcüstan üzərindən Rusiya yüklərinin ötürülməsi sahəsində ciddi problemlərlə qarşı-qarşıya qalması, Cənubi Osetiya və Abxaziyadakı separatçı rejimlərin tanınması məsələsində Tiflisi razı salacaq mövqe ortaya qoymaması, əslində qoya bilməməsi, yeganə ümid bəslədiyi İran ətrafında Qərbin artan sanksiyaları Ermənistanın gələcəyini qaranlığa qərq edir. Bu arada amerikalı, ancaq erməni əsilli politoloq Riçard Kirakosyanın xəbərdarlığı da diqqət çəkməyə bilməz. Mahiyyətə varanda, əslində politoloqun ABŞ-ın İrəvana mesajını çatdırdığını da başa düşmək çətin deyil. Riçard Kirakosyan deyir ki, Azərbaycan son nəticədə regionda ən güclü ordu formalaşdırmaq istəyinə çata bilər: "Azərbaycanın mövqeyi də bəllidir. Bakı hesab edir ki, ən yaxşı variant yetərincə güc toplayana qədər gözləmək və hazır olan zaman müharibə yoluyla Qarabağı qaytarmaq lazımdır". ATƏT-in Minsk qrupunun həmsədrləri və qurumun fəaliyyətdə olan sədrinin şəxsi nümayəndəsi Anjey Kaspşik isə artıq Nyu-Yorkdadırlar. Vasitəçilər Nyu-Yorka BMT Baş Assambleyasının 63-cü sessiyasına iştirak edən Azərbaycan və Ermənistan xarici işlər nazirləri Elmar Məmmədyarovla Edvard Nalbandyan arasında görüş təşkil etmək məqsədi ilə gediblər. Vasitəçilər hazırda nazirlərin iş qrafikini öyrənirlər. Dağlıq Qarabağ münaqişəsinin sülh yoluyla nizamlanması ilə bağlı aparılan danışıqların Nyu-York mərhələsində Türkiyə xarici işlər naziri Əli Babacanın da iştirak edəcəyi gözlənilir...