Dini missionerlərin fəallığı Siyasət və inancın yarışı Dini missionerlik öncəki kimi ideoloji savaşda əsas təsir vasitələrindən biridir. Dünyanın müxtəlif ölkələrindən olan missionerlər konkret dairələrin maraqlarına uyğun təbliğatlarını aparmaqdadırlar. Müşahidəçilər Qafqazda missionerlərin fəallaşdığını vurğulayırlar. Əsasən xristian missionerlər fərqlənirlər. Onların planlarında bu istiqamətdə daha da fəal olmaq vardır. Səbəb nədir? Dinlərarası münasibətlər müasir dünya üçün vacib faktordur. Tarixən sosial, ideoloji və siyasi böhranlar qlobal miqyas alanda dini təlimlərdə fəallıq artır. Çünki əsasən din insanlar və xalqlararası münasibətləri formalaşdırır. Dini təsəvvürlər insanların dünyagörüşünə çox ciddi təsir edir. Ona görə də bizim həssas və qalmaqallı dünyamızda dini missionerliyin yeni məna kəsb etməsi gözlənilən haldır. Bu mübarizənin fonunda xristian missionerlərin dünyanın siyasi və geosiyasi cəhətdən ən aktiv bölgələrində fəallığını artırmaq planlarını da başa düşmək olar. Eyni zamanda, məsələnin başqa bir tərəfini də vurğulamaq gərəkdir. Problem dünyada İslamın nüfuzunun artmasına bağlıdır. Onun da bir çox tarixi və obyektiv səbəbləri vardır. Son zamanlar hətta xristianlığı öyrənən elm adamlarının İslamın üstünlüklərindən yazması təsadüfi və fərdi maraqla bağlı deyil. Dünyada gedən proseslərə daha çox düzgün reaksiya verən və ziddiyyətlərdən çıxış yolunu göstərən din kimi İslamın şanslarının çox olduğu aydın görünür. Həm də illərdir İslamı qaralamağa yönəlik kampaniyalar gözlənildiyinin əksinə olaraq onun populyarlığını artırdı. Sadə insanlar dini inancından asılı olmayaraq İslama meyllənməkdədirlər. Siyasətçilər isə İslama olan hücumlardan sonra onun mənəvi üstünlüklərindən danışmağa məcbur qaldılar ki, bu da ona marağın daha da artması ilə sonuclanır. Bir sözlə, heç bir dini inanca radikal olmayan İslam Allahın rizası ilə bəşəriyyətə daha böyük vüsətlə yayılmaqdadır. Bundan bir çox xristian dairələr narahat olurlar və əks tədbirlər görməyə çalışırlar. Missionerlik bu sahədə əsas vasitədir. Missionerlər dünya üzrə təsiri artan xristian dövlətlərin rəsmi siyasəti səviyyəsinə qalxmaqdadır. Məsələnin əsas təhlükəli tərəfi bizcə, bundan ibarətdir. Ona görə ki, özlüyündə istənilən dini inanc fərdi seçimdir. İslamı yayanlar bu qaydaya ciddi əməl ediblər, insan inanıb İslamı seçib. O baxımdan kiminsə inanıb xristianlığl seçməsinə tolerant yanaşmaq gərəkdir. Ancaq məsələ dövlət ideologiyasına bağlanıb, müxtəlif maddi həvəsləndirmə ilə insanları dinindən etmək böyük dinsizlikdir. Görünür, bəziləri katolikliyin pulla kilsəyə gedib günahları yumaq təcrübəsini başqaları üzərində sınaqdan keçirmək iddiasına düşüb. Maddi həvəsləndirmə ilə insanları “xristian etmək” dini inancın iflasıdır. Ancaq o, konkret dövlətlərin maraqlarına xidmət etdiyindən təhlükəli miqyasda sistemli inancsızlıq formalaşdıra bilər. Şübhəsiz ki, elə bu səbəblərə görə, bir çox Qərb ölkələrində bəzi xristian təriqətlərini qadağan ediblər. Xristian missionerlərin fəallaşmasının əsas səbəbinin İslamın vüsət alması olması fonunda mənəvi deqradasiya faktorunu ayrıca qeyd etmək gərəkdir. Sirr deyil ki, bütün xristian dünyası mənəvi pozğunluq girdabında çabalayır. Heç bir hüququ tədbir bunun qarşısını ala bilmir. Cinsi pozğunluqdan tutmuş cinayətin müxtəlif növlərinə qədər olduqca təhlükəli tendensiyalar güclənir. Xristian alimlər özləri etiraf edirlər ki, xristianlıq bunun qarşısını ala bilmir. İslam isə dünya üzrə mənəviyyatı qoruya bilən ən güclü din olaraq qəbul edilir. O səbəbdəndir ki, Qərbdə bir çoxları öz mənəviyyatlarını və deməli, gələcəklərini xilas etmək üçün İslama üz tuturlar. Nəhayət, bütün bunların fonunda iqtisadi cəhətdən güclü olan dövlətlərin dünyaya təsirini artırması ilə öz dini görüşlərini də insanlara yeritmək istəklərini kənara qoymaq olmaz. Onlar iqtisadi cəhətdən təmin olunmuş insanların həm də müsəlman olmasını qəbul etmək istəmirlər. Yəni düşünürlər ki, dünya iqtisadi cəhətdən inkişaf etdikcə müsəlmanların sayı artacaq. Dolayısı ilə onlar pullarını müsəlmanın inkişafı üçünmü xərcləyirlər? Bu məsələlər xristian missionerlərin işlərini çoxaldır. Ancaq dünyanın bir həqiqəti var – heç nəyi Allahın iradəsindən kənar qəbul etdirmək olmaz. Onlar nə qədər çox çalışsalar da sonda ən doğru inanc qalib gələcək. Çünki hər şeydən üstün olanı dünyanı qurtarmaqdır. Şahin Məhəmmədoğlu olaylar