Sərkisyan çaşmağa başlayır "Ermənistanın gələcəyinin görünməməsi, iqtisadi və beynəlxalq təzyiq rəsmi İrəvanı qeyri-müəyyənlikdə, təlaşda saxlayır" Ermənistan prezidenti Serj Sərkisyan iki gün əvvəl verdiyi müsahibəyə düzəlişlər edib, günahı fikirlərini "təhrif edən" BBC-nin, Azərbaycan KİV-nin üstünə atıb. Xatırladaq ki, Serj Sərkisyan həmin müsahibəsində demişdi ki, Dağlıq Qarabağ ermənilərinin öz müqəddəratını həll etmək hüququ tanınmalıdır. Onun iddiasına görə, Qarabağın Azərbaycanın tərkibində olduğu sovet dövrü göstərib ki, Azərbaycanın tərkibində Dağlıq Qarabağın təhlükəsiz yaşaması mümkün deyil: "Məcbur olsaq, görsək ki, başqa çıxış yolu yoxdur, Dağlıq Qarabağın müstəqilliyini tanıyacağıq. Əgər bir gün möcüzə baş versə və Qarabağ Azərbaycanın tərkibinə düşsə, zənnimcə, çox qısa bir zaman ərzində Qarabağda bir nəfər də olsun erməni qalmaz. Ramiz Mikayıloğlu O ki qaldı nəzəri varianta, yəni Qarabağ hansısa şəkildə Azərbaycanın tərkibində ola bilər ya yox, bunu qarabağlıların rəyi, referendum vasitəsilə müəyyən etmək olar. Mən əminəm ki, heç olmasa yaxın vaxtlarda istənilən referendum yalnız və yalnız bir nəticəni göstərəcək - qarabağlılar Azərbaycandan kənarda olmağı istəyəcəklər. Mən Azərbaycan prezidenti İlham Əliyevə təklif etmişəm ki, o, mövcud dövrdə Qarabağın xoş güzaranı, təhlükəsiz yaşayışı və gələcəyində azərbaycanlıların ciddi maraqlı olduqlarını göstərmək üçün Qarabağa investisiyalar qoymağa çalışsın. Bəlkə ondan sonra qarabağlılar referendum zamanı Azərbaycanın tərkibində yaşamaq istədiklərini bildirdilər. Başqa yol yoxdur". Serj Sərkisyan dünən məhz sonuncu cümlələrinə düzəliş edib. Ermənistan prezidentinin mətbuat xidmətinin rəhbəri iddia edib ki, Serj Sərkisyan investisiyalar yatırılacağı təqdirdə Qarabağ ermənilərinin referendum zamanı Azərbaycanın tərkibində yaşamaq istədiklərini bildirəcəkləriylə bağlı fikri dilinə gətirməyib. Guya BBS-nin müxbirinin sualına Ermənistan prezidentinin cavabını mətbuat təhrif edib. Nəzərə alsaq ki, BBS Böyük Britaniyaya məxsus kütləvi informasiya vasitəsidir, xarici KİV-in Ermənistan prezidentinin söylədiklərini təhrif etməkdə hər hansı marağının olduğunu düşünmək sadəlövlükdür. Əslində Türkiyəyə münasibətdə Ermənistanın xarici siyasətində bu vaxta qədər müşahidə olunmayan jestlər edən, adıçəkilən ölkənin prezidenti Abdulla Gülü İrəvana futbol yarışına baxmağa çağıran Serj Sərkisyanın tərəddüdlü bir dönəm keçirdiyini anlamaq çətin deyil. Çünki Gürcüstanda baş verən son olaylardan sonra Tiflis Rusiyayla diplomatik və iqtisadi əlaqələri kəsib. Rusiyanın forpostu olan, işğalçı siyasətinə və "soyqırım", ərazi iddialarına görə Azərbaycan və Türkiyənin blokadasıyla üzləşən Ermənistanın isə dünya ölkələriylə iqtisadi əlaqələr saxlaması üçün iki yolu qalıb. Bu, İran və Gürcüstandır. Gürcüstan yolu İranla müqayisədə daha böyük önəm daşıyır. Həm də ona görə ki, Rusiyadan da yüklər məhz bu yolla Ermənistana daşınırdı. İndi bu yol faktiki bağlanmış durumdadır. İran ətrafındasa Qərbin sanksiyaları günü-gündən sərtləşməkdədir. Ötən ilin may ayındakı hesabatından fərqli olaraq MAQATE indi daha sərh hesabat hazırlayıb. Belə bir durumda prezident kürsüsündə əyləşən Serj Sərkisyan dünyadan tam təcrid olunmuş vəziyyətə düşəcək Ermənistanda sosial-iqtisadi sahədə hansı çətinliklərin yaranacağını, siyasi rəqibi Levon Ter-Petrosyanın bundan necə məharətlə istifadə edə biləcəyini düşünməyə bilməz. Ona görə də hər vəclə Ermənistanı iqtisadi blokadadan çıxarmaq üçün Türkiyəyə yönəlik müxtəlif jestlər edir, hətta Bakının ən yaxın müttəfiqi olan Ankaranın vasitəçiliyilə Dağlıq Qarabağ münaqişəsinin tənzimlənməsi istiqamətində danışıqların aparılmasına da müsbət yanaşır. Cümə günü Türkiyənin xarici işlər naziri Əli Babacanın iştirakıyla Nyu-Yorkda Azərbaycan və Ermənistanın xarici işlər nazirləri bir araya gələcəklər. Amma Rusiyanın dəstəyilə prezident kürsüsündə əyləşən Serj Sərkisyan Ankara və Bakı ilə danışıqlarda konstruktiv mövqe sərgiləməsinin Moskvanı əsəbləşdirəcəyindən də çəkinməyə bilməz. Çünki Moskva özünün yaratdığı Dağlıq Qarabağ münaqişəsinə Azərbaycan və Ermənistana bir təsir rıçağı kimi baxır və onun həlli istiqamətində ciddi irəliləyişdən razı qalmaz. Yəqin ki, Serj Sərkisyanın iki gün əvvəl verdiyi müsahibəyə tez-tələsik etdiyi düzəliş də Moskvanın qorxusundan və siyasi rəqibi Levon Ter-Petrosyana əlavə arqument vermək istəməməsindən qaynaqlanır. Məsələylə bağlı fikirlərini öyrəndiyimiz politoloq Hikmət Hacızadə deyir ki, son bəyanatlar Ermənistan rəhbərliyinin təlaşda olduğunu və diplomatik səriştəsizliyini göstərir: "Siyasətçi dilindən artıq söz qaçırmaz. Bacarıqlı rəhbər belə etməzdi. Görünür ki, Serj Sərkisyan hakimiyyətə yeni gəldiyi üçün nəyi danışıb, nəyi danışmamağın lazım gəldiyini bilmir. Digər tərəfdən, Ermənistanın gələcəyinin görünməməsi, iqtisadi və beynəlxalq təzyiq də ölkə rəhbərliyini qeyri-müəyyənlikdə və təlaşda saxlayır. Ona görə də hərdən ortaya belə ziddiyyətli bəyanatlar çıxır". Politoloq vurğuladı ki, iqtisadi təcridin getdikcə dərinləşməsi belə ziddiyyətli çıxışların əsas səbəbidir. xalqcebhesi