Əlini mənə, Pakistan İslamabad ABŞ-ın təhqiqat yardımından imtina etdi Pakistan İslamabadda törədilən terror aktının araşdırılmasında köməyini təklif edən ABŞ-a rədd cavabı verib. Ölkənin daxili işlər naziri Rəhman Zdarek bəyan edib ki, onlara kömək gərək deyil: "Biz özümüz təhqiqat aparacağıq, təklif olunan yardımları rədd etmişik". "Newsru.com"un yaydığı məlumata görə, kömək barədə müraciət Federal Təhqiqat Bürosundan daxil olub. O da bəlli olub ki, Pakistan prezidenti Asif Əli Zərdari və baş nazir Yusif Gilani hərbi komandanlığın nümayəndələri ilə bir yerdə sentyabrın 20-də İslamabadda partladılan "Marriott" mehmanxanasında nahar etməyə hazırlaşırmışlar. Daxili işlər naziri Rəhman Məlik ölkənin birinci şəxslərinin son anda başqa bir yerdə nahar etmək qərarına gəldiklərini vurğulayıb. Maliki qeyd edib ki, birinci şəxslər təsadüf nəticəsində sağ qalıblar: "Milli Assambleyanın spikeri həmin gün "Marriott" mehmanxanasında ölkənin birinci şəxsləri üçün nahar vermək qərarına gəlib... Lakin prezident və baş nazir son anda nahar edəcəkləri yeri dəyişərək Gilaninin evində görüşmək və söhbət etmək qərarı qəbul ediblər. Bunun nəticəsində də onlar sağ qalıblar". Dünən, həmçinin ABŞ-la Pakistan arasında münasibətlərə xələl gətirən daha bir insident yaşanıb. Pakistan hərbçiləri ölkənin hava məkanını pozan iki Amerika vertolyotunu atəşə tutublar. "France Presse" agentliyinin məlumatına görə, insident Əfqanıstan sərhədi yaxınlığındakı Şimali Vəziristan əyalətində baş verib. Amerika vertolyotları "Əl-Qaidə" təşkilatının və Taliban hərəkatının döyüşçülərinin gizləndiyi güman edilən Lvara Mundi kəndi yaxınlığında qeydə alınıblar. Pakistan hərbçilərinin vertolyotları atəşə tutmasından sonra amerikalılar Əfqanıstana qayıdıblar. Amerika hərbçiləri sentyabrın əvvəlindən başlayaraq Pakistandakı fəaliyyətlərini aktivləşdiriblər. Pentaqon bunu Pakistan hakimiyyətinin terrorçularla effektiv mübarizə aparmaması ilə izah edir. Pakistan komandanlığı isə sentyabrın 16-da ölkə sərhədlərini keçən amerikalılara atəş açmaq əmri verib. İslamabadda "Marriott" oteli yaxınlığında baş vermiş partlayış nəticəsində ölənlərin sayı isə artıq 60-a çatıb. Xəbəri "Frans Press" agentliyi Pakistan hüquq-mühafizə orqanlarına istinadən yayıb. Məlumat verilir ki, yaralıların sayı 200 nəfərdir. Şahidlərin sözlərinə görə, terrorçu yük maşını ilə otelin qapısına soxulub. Partlayış o qədər güclü olub ki, onun səsini İslamabadın bütün rayonlarında eşitmək mümkün olub. Partlayışa görə məsuliyyəti öz üzərinə götürən yoxdur. Dəbdəbəli "Marriott" otelinin isə yalnız yanmış bünövrəsi qalıb. Partlayış mehmanxana fasadının böyük hissəsini və banket zalındakı tavanı uçurdub. Yanğın bir neçə saat davam etdiyinə görə hakimiyyət bütün binanın uça biləcəyindən narahat olub. Məlumata görə, ölənlər arasında 2 xarici, o cümlədən bir ABŞ vətəndaşı var. Ona yaxın xarici vətəndaş xəsarət alıb. Oteldə çoxlu xarici vətəndaş qalırdı. 315 nömrəsi olan mehmanxana hökumət binaları və xarici ölkələrin səfirliklərinin yaxınlığında yerləşir. Bununla əlaqədar rayon ərazisində gücləndirilmiş təhlükəsizlik tədbirləri həyata keçirilir. Hüquq-mühafizə orqanları adamları və maşınları yoxlamaq məqsədilə mütəmadi olaraq saxlayırlar. Pakistanın baş naziri Yusif Rza Gilanidən sitat gətirən mətbuatın məlumatına görə, oteldəki partlayış nəticəsində Çexiyanın Pakistandakı səfiri İvo Zdarek həlak olub. Baş nazir bildirib ki, terror aktı nəticəsində 53 nəfər həlak olub, onların arasında Çexiya səfiri var: "Onun cəsədi tanınıb". Əvvəllər İ.Zdarek itkin düşmüş hesab edilirdi. Partlayışdan sonra Pakistan prezidenti Asif Əli Zərdari televiziya ilə xalqa müraciət edib: "Terror - Pakistanın xərçəng şişidir. Biz Allahın köməkliyi ilə ölkəni ondan tamamilə azad etmək fikrindəyik. Qorxaqların bu cür hərəkətləri bizim qətiyyətimizə təsir göstərməyəcək". Son həftələr hakimiyyət qoşunları sərhəd rayonlarındakı üsyankarlara hücum edəndən sonra Pakistanı zorakılıq dalğası bürüyüb. Partlayış Zərdarinin parlamentdə prezident kimi ilk çıxışından bir neçə saat sonra baş verib. O, çıxışında terrorizmlə ekstremizmin kökünü kəsəcəyinə söz verib. Rusiya prezidenti Dmitri Medvedyev Pakistan prezidentinə terror aktı ilə əlaqədar başsağlığı verib. Kremlin mətbuat xidmətinin məlumatına görə, teleqramda bildirilir ki, "bu vəhşi aktı qətiyyətlə pisləyərək Pakistan xalqı və rəhbərliyinə səmimi həmrəylik və dəstəyimizi bildiririk. Əminəm, bu vəhşi aktın təşkilatçıları tapılaraq layiq olduqları cəzanı çəkəcəklər". "Pakistanla həm ikitərəfli formatda, həm də terrora qarşı mübarizə üzrə beynəlxalq səylər çərçivəsində qarşılıqlı fəaliyyəti güücləndirməyə hazır olduğumuzu təsdiqləyirik"- deyə D.Medvedyev bildirib. Öz növbəsində C.Buş İslamabaddakı hücumu pisləyərək baş verən hadisənin "qarşımızda duran təhlükə haqqında bizə xəbərdarlıq" olduğunu bəyan edib. ABŞ prezidenti terrorizmlə mübarizədə Pakistana hərtərəfli yardım edəcəklərinə söz verib. Xarici işlər naziri Devid Milibend hücumu "şərəfsiz" adlandırıb.