Musiqi ictimaiyyəti Üzeyir Hacıbəylinin adının akademiyaya qaytarılmasına sevinir Azərin: "Mən oranı həmişə Üzeyir bəyin adına tanımışam" Üzeyir Musiqisi Günündə Azərbaycanın musiqi sənətini yüksəklərə qaldıran Üzeyir Hacıbəylinin ruhu şah edildi. Məlum olduğu kimi prezident İlham Əliyev Bakı Musiqi Akademiyasına Üzeyir Hacıbəylinin adının qaytarılmasıyla bağlı sərəncam verdi. Bu sərəncam isə musiqi ictimaiyyətini əməlli-başlı sevindirib. Bakı Musiqi Akademiyasından dahi bəstəkarın adının götürülməsi bir çox problemlərə səbəb olmuşdu. Bütün musiqi ictimaiyyəti buna etiraz edərək, adın qaytarılmasını tələb edirdi. Hətta akademiyanın tələbələri bununla bağlı böyük nümayişlər də keçirirdilər. Akademiya rəhbəri Fərhad Bədəlbəyli də öz növbəsində akademiyaya Ü.Hacıbəylinin adının qaytarılmasını təkidlə tələb edirdi. Sonradan bəstəkarın adının qaytarılacağına əmin olunduqdan sonra söz-söhbətlərə son qoyuldu. Nəhayət, musiqi bayramında adın qaytarılması ilə musiqi ictimaiyyəti sevinməyə ikinci səbəb tapdı. Musiqi bayramı münasibətilə silsilə tədbirlər keçirildi. Müxtəlif mədəniyyət ocaqlarında konsertlər, teatrlarda tamaşalar nümayiş olundu. Hazırda mədəniyyət xadimləri hesab edir ki, Ü.Hacıbəylinin adının akademiyaya qaytarılmaması mümkün deyildi. Onlar təmir olunan akademiyaya baxıb, keçmiş illərini doyunca xatırlayıblar. Bəstəkar Faiq Sücəddinov isə daha çox kövrəlib. Həm adın qaytarılmasına sevinib, həm də akademiyanı gəzərək, keçmiş illərini xatırlayıb: "Üzeyir Hacıbəylinin adının qaytarılmasına çox sevindim. Bu belə də olmalıydı. O vaxtlar Mərkəzi Komitədə Üzeyir bəyin adının akademiyaya verilməsi fikri meydana gəlmişdi. Ziyalılar məsləhətləşdikdən sonra ad akademiyaya verildi. Sonra isə xoşagəlməz hadisə baş verdi. Yəni ad akademiyadan götürülldü. Bir il əvvəl bununla bağlı sorğu aparılmışdı. Sual belə idi: "Üzeyir Hacəbəylinin adının qaytarılmasını istəyirsiniz, ya yox". Üzeyir Hacıbəyli Azərbaycan musiqisinin banisidi. Dünən akademiyanı gəzərkən keçmiş illəri xatırladım. Əvvəki illərə qayıtdım. Akademiyanın ikinci mərtəbəsində Azərbaycan musiqiçilərinin-Qara Qarayevin, Niyazi, Bülbül və başqalarının şəkillərini görüb çox sevindim". F.Sücəddinov onu da bildirdi ki, Ü.Hacıbəylinin adının qaytarılması bir çoxlarına nümunə olacaq. Sənət adamlarının adlarına qarşı humanist münasibət nəticəsində onlar tarixdə qala bilərlər: "Heç kim unudulmamalıdı. Sənət zirvəsi sayılan insanların adlarına qarşı hümanist münasibət olmasa, onlar tarixdə yaşaya bilməzlər. Biz sənətkarlarımızı yaşatmalıyıq". Müğənni Azərin isə bildirdi ki, Ü.Hacıbəylinin adının akademiyadan götürülməsini heç vaxt qəbul etməyib. Tez bir zamanda adın akademiyaya veriləcəyinə də əmin olub: "Açığı, Üzeyir bəyin adının akademiyadan götürülməsinə heç fikir vermirdik. Bizim üçün akademiya həmişə Üzeyir bəyin adına olub. Həm də ad axır-əvvəl qaytarılmalıydı. Bunun başqa yolu yoxdu. Haqq həmişə yerini tapır. Sevinirik ki, rəsmi formada ad akademiyaya verildi". Digər bəstəkar Gövhər Həsənzadə də bu sərəncama çox sevinir. F.Sücəddinov kimi onun da, Ü.Hacıbəylinin adını daşıyan akademiya ilə bağlı kövrək xatirələri çoxdu: "Çox sevinirəm, belə də olmalıydı. Mən Üzeyir Hacıbəyli adına Dövlət Konservatoriyasını bitirmişəm. Bununla da fəxr edirəm. Adın götürülməsi sözsüz ki, mənə pis təsir etmişdi. Amma indi çox məmnunam. Bu dahi insan Azərbaycanın musiqi sənətini inkişaf etdirib. Onun adı Azərbaycan incəsənətinin başında durur. Bilirsiniz ki, bizim professional musiqi sənətimiz onunla başlayıb. Onun yaradıcılığına bir nəzər salın. Görün bu insan nələr qoyub gedib. Onun adı ilə pis rəftar etməyə heç kimin haqqı da yoxdu. Hamı kimi bu xəbərə mən də çox sevindim və prezidentin sərəncamını çox yüksək qiymətləndirirəm". ("OLAYLAR"İA)