Qarabağın azadlığını (sülh) istəyirsənsə, hər an müharibəyə hazır ol! Prezidentliyə namizəd Qüdrət Həsənquliyevin seçki platforması: "İrəvan anlamalıdır ki, Azərbaycanın hərbi potensialı işə düşərsə, nəinki Qarabağda, Ermənistanın özündə də daş üstə daş qalmayacaq" Oktyabr ayının 15-də keçiriləcək prezident seçkilərinin təbliğat-təşviqat kampaniyası get-gedə sürət götürür. Azərbaycan cəmiyyətinin bir çox problemləri var: korrupsiya, rüşvətxorluqla mübarizədən tutmuş, neft gəlirlərinin ədalətli bölüşdürülməsinədək, qeyri-neft sektorunun inkişafınadək və s. Prezidentliyə namizədlər təkcə bu problemlərin adlarını çəksələr, oktyabrın 15-dək qalan pulsuz efir vaxtı istifadə olunsa da bu məsələlərin siyahısı sadalanıb qurtarmaz. Amma bir məqamı xüsusi vurğulamaq lazımdır. Miqyasından asılı olmayaraq problemlər içində boğulan insanlarımız həmişə Qarabağ münaqişəsinin həllini ön sıraya qoyurlar. Elman Bəlkə də ən laqeyd insanımız belə prezidentliyə namizədlərin torpaqlarımızın işğaldan azad olunması haqqında prezidentliyə namizədlərin nə deyəcəyini, seçki platformasında bu məsələnin necə əks olunduğuna xüsusi diqqət yetirir. Çünki əksər problemlərin məhz Qarabağ münaqişəsindən başladığının fərqindədirlər. BAXCP-nin prezidentliyə namizədi torpaqlarımızın azad olunması üçün konkret seçki platforması irəli sürür Artıq prezidentliyə namizədlər İctimai Teleradioda bir neçə çıxış ediblər, cəmiyyətin müxtəlif problemlərinə toxunublar. Bir seçici kimi ötən həftənin şənbə günü prezidentliyə namizədlərin və onların vəkillərinin Qarabağ münaqişəsinin həlli, torpaqlarımızın işğaldan azad olunması barədə fikirləri xüsusi maraqla qarşılandı, mübahisələr yaratdı. Belə məlum oldu ki, BAXCP-nin prezidentliyə namizədi Qüdrət Həsənquliyevdən başqa digər namizədlər Qarabağ münaqişəsinin həlli ilə bağlı konkret bir fikrə, istiqamətə, seçki platformasına malik deyillər. İqtidar nümayəndəsinin vəkili ümumi sözlərlə Qarabağ münaqişəsinin həlli, torpaqlarımızın işğaldan azad olunması haqqında danışdı. Digər namizədlərlə müqayisədə bütün sahələrdə olduğu kimi BAXCP-nin prezidentliyə namizədi Qarabağın, işğal olunmuş torpaqlarımızın azad olunması üçün dəqiq seçki platforması irəli sürür. Həmin platformada işğal altındakı torpaqlarımızın azad olunması üçün nəzərdə tutulan addımlar aşağıdakı kimi sıralanır. 1.Orta məktəblərin 10-11-ci sinif şagirdlərinin hərbi biliklərə yiyələnməsi üçün onlara həftədə 2 saatdan az olmamaq şərtilə hərbi dərslərinin tədris edilməsi; Hərbçilərin minimum əmək haqlarının 1000 manata çatdırılması, onların mənzil probleminin həlli üçün xüsusi dövlət proqramının hazırlanaraq həyata keçirilməsi; Bakı şəhərində xeyli müddətdir ki, yaşayış evlərilə əhatə olunmuş, Dövlət Neft Şirkətinə məxsus neft quyularının istismarının dayandırılması, həmin ərazilərin bir hissəsinin neft qalıqlarından təmizləndikdən sonra əvəzsiz olaraq müharibə əlillərinə və veteranlarına, onların ailə üzvlərinə və hərbçilərə verilməsı; 2.Azərbaycan torpaqlarının işğaldan azad edilməsi istiqamətində diplomatik fəaliyyətin genişləndirilməsi; 3.Orduya dövlət və ictimai nəzarətin gücləndirilməsi Neft Fonduna toplanan vəsaitlərin 80 faizinin müdafiə sənayesinin inkişafına və ölkənin etibarlı müdafiə qabiliyyətinin gücləndirilməsinə yönləndirilməsi; 4.Peşəkar ordu quruculuğu prosesinin tez bir zamanda həyata keçirilməsi; 5.Hərbi xərclərin büdcənin 25-27 faizinə çatdırılması; 6.Azərbaycan Silahlı Qüvvələrinin ən müasir hərbi texnika, silah və sursatla təmin olunması istiqamətində təxirəsalınmaz addımların atılması; 7.Hərbi texnologiyanın ən son nailiyyətlərindən istifadə olunmaqla hava hücumundan müdafiə sisteminin gücləndirilməsi; 8.İşğal olunmuş ərazilərimizin BMT Təhlükəsizlik Şurasının müvafiq qətnamələrinə əsasən qeyd-şərtsiz azad olunması üçün Ermənistana bir il vaxt verilməsi; 9.Verilən vaxt ərzində işğal olunmuş ərazilər azad edilməzsə atəşkəs haqqında sazişin qüvvədən düşdüyünün bəyan edilməsi, hər an hərbi əməliyyatların başlanıla biləcəyi barədə rəsmi qərar qəbul olunması; 10.Ən geci 2011-ci ildə Dağlıq Qarabağ da daxil olmaqla Ermənistan tərəfindən işğal edilmiş bütün ərazilərimiz üzərində Azərbaycanın suveren hüquqlarının bərpa olunması, Xankəndində üçrənglı Azərbaycan bayrağının dalğalandırılması. Qarabağ probleminin Kipr münaqişəsindən fərqi Qəribədir ki, BAXCP sədrinin seçki platformasının işğal olunmuş torpaqlarımızın azad olunması haqqında kəskin və konkret təkliflərini bəzi namizədlər narahatçılıqla qarşılayıb. Şənbə günü İctimai Televiziyada namizədlərin çıxışı zamanı BQP sədri Fazil Qəzənfəroğlu dolaşıq şəkildə Qarabağ münaqişəsinin həlliylə bağlı sərt mövqe ortaya qoyulmasından narahat olduğunu büruzə verdi. Belə mövqe xeyli anlaşılmazlıq yaratdı. Ən azı uzun illər ərzində təsdiqlənib ki, Azərbaycanın sülhpərvər mövqeyi nəticəsiz qalıb. BQP-nin prezidentliyə namizədi Qarabağ münaqişəsilə Kipr münaqişəsini də bir-birinə bənzətdi. Bunu nəinki Azərbaycan siyasətçisinin və ya prezidentliyə namizədinin, hətta Qarabağ münaqişəsi haqqında geniş məlumatı olan hər bir vətəndaşın ən ciddi səhvi saymaq mümkündür. Qarabağ münaqişəsilə Kipr münaqişə həm tarixi, həm hüquqi və s. aspektlərinə görə ciddi şəkildə fərqlənir. Həmin münaqişələrə təkcə BMT səviyyəsində münasibət o qədər ziddiyyət təşkil edir ki, onları bu kiçik yazıda həmin məsələləri sadalamaq belə mümkün deyil. Bu münaqişələrlə bağlı indi aparılan danışıqların məzmunu bir-birindən o qədər ayrıdır ki, hər hansı prezidentliyə namizədin Kipr və Qarabağ münaqişələrində oxşarlıqlar axtarması təəssüf doğurur. Bu münaqişədə yalnız bir oxşar məqam var: Kiprdə yunanlar türklərə qarşı soyqırım siyasəti həyata keçirib, Qarabağda isə ermənilər rusların köməyilə azərbaycanlılara qarşı genosid törədib, etnik təmizləmə aparıblar. Qeyd edək ki, çıxışı zamanı BAXC sədri, prezidentliyə namizəd Qüdrət Həsənquliyev Qarabağ münaqişəsi ilə Kipr münaqişəsinin bir-birinə bənzəmədiyini açıqladı. Eyni zamanda xatırlatdı ki, hazırda adada Şimali Kipr Türk Cümhuriyyətinin və Cənubi Kipr Yunan Respublikasının arasında konfederasiyanın yaradılması barədə nəticəsiz danışıqlar gedir. Qüdrət Həsənquliyev dedi ki, əgər Azərbaycan sərt mövqe ortaya qoymasa, gələcəkdə bənzər "konfederasiya" danışıqları aparmaq təhlükəsilə üzləşə bilər. Əksər sülh danışıqlarının son akkordu ildırımsürətli müharibə olur BAXCP-nin prezidentliyə namizədi Azərbaycanda hərbi xərclərə büdcənin 11, Ermənistanda 12 faizinin ayrıldığını nəzərə çatdırıb: "Düzdür, Azərbaycanda hərbi xərclərin miqdarı Ermənistandan iki dəfə çoxdur, çünki işğalçı ölkənin büdcəsi azdır. Əslində büdcənin 25-27 faizi hərbi xərclərə ayrılmalıdır. Əlavə olaraq, Neft Fondunda toplanmış vəsaitin 80 faizi hərbi məqsədlərə yönəldilməlidir. Bu da 10 milyard manatdan çox vəsait edəcək. Bununla ən müasir silahlar alınmalı, hava hücumundan ən güclü müdafiə sistemi qurulmalı və İrəvana 1 il vaxt verilməlidir. Əgər Ermənistan 1 il ərzində konstruktiv mövqe sərgiləməsə, Azərbaycan Bişkek protokolundan imtina etməli və istənilən an torpaqlarımızı azad etməliyik. İrəvan anlamalıdır ki, ona kimin kömək etməsindən asılı olmayaraq, Azərbaycanın hərbi potensialı işə düşərsə, nəinki Qarabağda, Ermənistanın özündə də daş üstə daş qalmayacaq". Qüdrət Həsənquliyevin seçki platformasında işğal olunmuş torpaqlarımızın azad olunmasıyla bağlı müddəaları, çıxışları düşmənlə hazırlıqsız şəkildə müharibəyə girməyi nəzərdə tutmur. Bu seçki platformasında, siyasi xətdə cəmiyyətin, dövlətin hər an müharibəyə yüksək səviyyədə hazır olması öz əksini tapıb. Elə bir hazırlıqdan söhbət gedir ki, ermənilərə verilən bir il vaxt ərzində işğal olunmuş ərazilər azad edilməzsə atəşkəs haqqında sazişin qüvvədən düşdüyünün bəyanlanması, hər an hərbi əməliyyatların başlanıla biləcəyi barədə rəsmi qərar qəbul olunması mümkün ola bilsin. BAXCP-nin namizədi bildirir ki, Azərbaycanın hərbi potensialı Ermənistandan 10 dəfə artıq olmalıdır ki, işğalçı Ermənistanla işğala məruz qalan Azərbaycan arasında "bərabərlik" işarəsi qoyan, ikili standart yeridən vasitəçi dövlətlər də ədalətli mövqe tutmağa çalışsınlar. Digər tərəfdən, dünyada dönə-dönə təsdiqlənmiş məşhur prinsip var, "Sülh istəyirsənsə, müharibəyə hazır ol". Torpaqları işğal altında olan Azərbaycan müxtəlif səviyyələrdə, müxtəlif müstəvilərdə aparılan danışıqlara baxmayaraq hər an müharibəyə hazır olmalıdır. Ən azı ona görə ki, əksər sülh danışıqlarının son akkordu müharibə, ildırımsürətli döyüşlər olur, işğalçı, etnik təmizləmə aparan dövlət sülhə məcbur olunur. Hətta beynəlxalq təşkilatların, superdövlətlərin razılaşdırdığı sülh müqaviləsini həyata keçirmək üçün Bosniya və Herseqovinada, Xorvatiyada, Kosovada olduğu kimi ildırımsürətli müharibələrdən, hücumlardan başqa çıxış yolu qalmır. Qüdrət Həsənquliyevin seçki platformasında əks olunduğu kimi Azərbaycanın hərbi, siyasi, diplomatik potensialı o qədər güclü olmalıdır ki, torpaqlarımızın azadlığı üçün hər an ən kəskin addımlara əl atmaqda çətinlik çəkməyək. Düşmənin danışıqlar masasında "yumşaltması" üçün onu döyüş meydanında əzmək üçün bir millət, dövlət, ordu olaraq gücümüz, Qüdrətimiz olsun. xalqcebhesi