İranda hərbi parad keçirildi Əhmədinejad ABŞ-ı hədələyib Vaşinqtona getdi İran prezidenti Mahmud Əhmədinejad sentyabrın 21-də Tehranda keçirilən hərbi parad zamanı İsrailin və ABŞ-ın ünvanına növbəti dəfə sərt çıxış edib. İran-İraq müharibəsinin başa çatmasının ildönümü münasibətilə keçirilən ənənəvi parad zamanı Əhmədinejad deyib ki, onun ölkəsinin silahlı qüvələri təcavüzkarın əlini tətiyi çəkmədən kəsməyə hazırdır. Əhmədinejadın sözlərinə görə, İran istənilən xarici təcavüzü dəf etməyə qadirdir və bu ölkəyə qarşı tətbiq edilən sanksiyaların heç bir təsiri olmayacaq. Hərbi paradda İran silahlı qüvvələrinin ən yeni silah növləri nümayiş etdirilib. Üzərinə “ABŞ-a ölüm” sözləri yazılmış qoşqular Əhmədinejadın və digər hökumət rəhbərlərinin dayandığı tribunanın qarşısından müxtəlif tipli raketləri, o cümlədən 2 min kilometr məsafə qət edə bilən “Şahab-3" ballistik raketlərini və pilotsuz kəşfiyyat təyyarələrini daşıyıblar. İran prezidenti deyib ki, onun ölkəsi dostluğa və sülhə tərəfdardır, lakin xəbərdar edir ki, İrana qarşı hər hansı hərbi təcavüzün nəticələri çox ağır olacaq. ”Əgər kimsə İran ərazisinə müdaxilə etmək istəsə və ya onun qanuni maraqlarına toxunmaq istəsə bizim silahlı qüvvələrimiz düşməni tikə-tikə edəcək"-deyə Əhmədinejad bildirib. İran prezidentinin sözlərinə görə, bəzi başkəsənlər onun ölkəsinin müstəqilliyini əlindən almaq istəyir. İran prezidentinin, ad çəkməsə də, İsrail və ABŞ-ı nəzərdə tutduğuna şübhə yoxdur. Bu çıxış Əhmədinejadın BMT Baş Assambleyasının 63-cü illik sessiyasında iştirak etmək üçün Nyu Yorka yola düşməsindən bir neçə saat əvvələ təsadüf edib. Parad zamanı çıxış edən İran müdafiə naziri Mustafa Məhəmməd Nəcar isə deyib ki, onun ölkəsinin silahlı qüvvələrinin heç kimin köməyinə ehtiyacı yoxdur: “İran öz silahlı qüvvələrini ən müasir silahlarla təchiz etməyə qadirdir. Əgər düşmən İrana hücum etsə, çox təəccüblənəcək və hücum etdiyinə görə peşman olacaq.” Nazir deyib ki, İran ordusu düşməni çəkindirmək üçün müntəzəm olaraq hərbi manevrlər keçirir. Belə manevrlərdən biri bir neçə gün əvvəl başa çatıb. Bu arada Amerikada “İkipartiyalı Araşdırma Mərkəzi” adlı qurum belə qənaətə gəlib ki, İranın nüvə obyektlərini sıradan çıxarmaq üçün bir neçə illik bombardman lazımdır. Respublikaçılar və Demokratlar Partiyasından olan ekspertlərin birgə çalışdığı mərkəzin gəldiyi nəticəyə görə, ABŞ-ın yeni seçiləcək prezidenti İranla bir neçə il davam edəcək müharibə planı hazırlamalıdır. Araşdırmanı aparanlardan respublikaçı senator Daniel Koatas və demokrat Çarlz Robb hesab edirlər ki, İranla müharibənin bir neçə il davam etməsi qaçılmazdır. “Hərbi zərbə mümkündür, lakin ona İranı nüvə silahı əldə etməkdən çəkindirmək üçün sonuncu vasitə kimi baxmaq lazımdır. Digər tərəfdən, İrana hərbi zərbə o zaman effektli ola bilər ki, yeni və bərpa edilən nüvə obyektlərinə davamlı bomba zərbələri endirilsin”-deyə rəydə bildirilir. Xatırladaq ki, son vaxtlar İsrailin və ya ABŞ-ın İrana qarşı hərbi əməliyyatlara hazırlaşdığı haqda xəbərlər yayılır. Məlumatlara görə, əməliyyatlar bu ilin sonunadək başlaya bilər. // Yeni Müsavat