“ABŞ AZƏRBAYCANLA ƏN YÜKSƏK SƏVİYYƏDƏ DANIŞIQLAR APARIR” Elxan Mehdiyevə görə, Rusiyanın Azərbaycanla bağlı siyasəti ölkəmizə zərərli sonluq vəd edir Gürcüstanda baş verən avqust hadisələri Rusiyanın Qafqaz iddiasını hətta güc yolu ilə reallaşdırmaqda qərarlı olduğunu göstərdi. Son 15 ildə müxtəlif vaxtlarda şiddətlənən və ya zəifləyən Cənubi Qafqaza nəzarət uğrunda Qərb-Rusiya savaşı davam etməkdədir. Qeyd edək ki, şərti olaraq cənubi Qafqaza nəzarətdə Rusiya ilə Qərb, daha doğrusu ABŞ arasında nisbi bərabərlik var. Yəni Amerika Gürcüstanı, Rusiya isə Ermənistanı tam nəzarətə götürüb. Ancaq Cənubi Qafqazın əsas strateji ölkəsi olan Azərbaycan hələ ki, birmənalı olaraq hansı tərəfdə olduğunu büruzə verməyərək hər iki cinahla məsafəni qoruyub saxlayır. Həm Kreml, həm də Ağ Evlə normal münasibətlər qurmağa çalışan rəsmi Bakının bu siyasəti təbii ki, qarşı tərəfi qane etmir. Xüsusən də Qafqazdakı son hadisələrdən sonra hər iki qüvvə Azərbaycanı öz tərəfinə çəkməyə çalışır. Şübhə yox ki, bu günlərdə Rusiya prezidentinin İlham Əliyevi Moskvaya dəvət edərək əməkdaşlıq təklifi etməsinin arxasında strateji maraqlar durur. Eyni zamanda Amerika Azərbaycan hökumətini Rusiyanın təsirinə düşməməsi və ya ən azı indiyə qədər olan mövqeyində qalmasına çalışır. Nəzərə alsaq ki, bir qədər əvvəl ABŞ vitse-prezidenti Bakıya gələrək ölkə rəhbərliyi ilə danışıqlar aparmışdı. Ardınca Əliyevin Rusiya səfəri (hər ikisində mövzular təxminən eyni olub) belə söyləməyə əsas verir ki, yaxın zamanlarda Aərbaycanın dövlət başçısı Amerikaya dəvət ediləcək və onunla oxşar səpkili söhbətlər aparılacaq. Mövzu ilə bağlı fikrini öyrəndiyimiz politoloq Elxan Mehdiyevin sözlərinə görə, ABŞ hökuməti son vaxtlar Azərbaycanla ən yüksək səviyyədə danışıqlar aparır: “Vitse-prezident Dik Çeynin Bakıya səfəri və keçirdiyi görüşlər bu diqqətin göstəricisidir. Əslində Çeyninin səfəri İ.Əliyevin Moskva səfərini kompensasiya edir”. Azərbaycanın Rusiya və Amerika ilə əlaqələrində ağırlığın hələ də Kremlin xeyrinə olduğunu deyən politoloqun hesab edir ki, rəsmi Bakı bu istiqamətdə balans yaratmayıb: “Ötən müddətdə Azərbaycan Rusiyadan uzaqlaşmayıb, MDB-nin üzvüdür, Rusiya ilə güclü iqtisadi, ticari əlaqələr mövcuddur. O cümlədən Azərbaycan ordusu rus silahından istifadə edir və bu silahların əsas hissəsini şimaldan alır. Gurcüstandan fərqli olraq Azərbaycanla Moskvanın münasibətləri çoxistiqamətlidir. Rusiyanın yeni prezidentinin ilk səfərini Bakıya etməsi də bu yaxınlığın göstəricisidir”. Rusiya ilə müqayisədə Amerika ilə əlaqələrin yeni yaranmaqda olduğunu və əsasən də enerji sahəsini əhatə etdiyini söyləyən E.Mehdiyev Moskvanın bu əlaqələri zəiflətməyə yönəlik addımlarının milli maraqlarımıza cavab vermədiyi qənaətindədir: “Rusiyanın Azərbaycan qazını Avropa qiymətlərinə almaq planı - hazırda buna ciddi-cəhdlə çalışır - dövlət maraqlarımıza cavab vermir. Çünki bununla Azərbaycanın bir dövlət kimi bölgədə strateji əhəmiyyəti azala bilər”. KƏNAN musavat