Lavrov Qarabağ münaqişəsinin həllindən danışmır "Gürcüstan olaylarından sonra Rusiya rəsmilərinin heç bir bəyanatını ciddi qəbul etmək lazım deyil" Federasiya Şurasında çıxışı zamanı Rusiyanın xarici işlər naziri Sergey Lavrov Moskvanın Abxaziya və Cənubi Osetiyanın müstəqilliyini tanımasının Dağlıq Qarabağ və Dnestryanı üçün presedent yaratmadığını söyləyib. O, Rusiyanın postsovet məkanında bütün münaqişələrin BMT Nizamnaməsinin prinsiplərinə hörmətlə yanaşmaq, beynəlxalq hüquqa hörmət əsasında həllinə aktiv çalışacağını deyib: "Biz danışıqlar prosesində vasitəçilik missiyasını məsuliyyətli şəkildə reallaşdıracağıq, bu həm də Dağlıq Qarabağ və Dnestryanı münaqişələrinə aiddir. Hər münaqişənin öz xüsusiyyətləri, formatı və vasitəçilik mexanizmi var. Cənubi Osetiya böhranı həmin münaqişələr üçün heç bir presedent yaratmır". Rəvan Məmmədli Xatırladaq ki, bu, Cənubi Osetiya və Abxaziyadakı separatçı rejimlərin tanınmasından sonra Sergey Lavrovun anoloji məzmunlu üçüncü bəyanatıdır. İlk bəyanat tanınmadan bir həftə sonraya təsadüf etmişdi. Sergey Lavrov keçirilən mətbuat konfransında sualları cavablandırarkən vəd vermişdi ki, Dağlıq Qarabağ və Dnestryanı münaqişələr Cənubi Osetiya və Abxaziya ssenariləriylə inkişaf etməyəcək, çünki həmin münaqişələrin həlli üçün danışıq aparan şəxslər Mixail Saakaşvili deyil, bu ölkələrdə ağlını itirmiş, güc yolu ilə münaqişə həll edən liderlər yoxdur. Moskvada Kollektiv Təhlükəsizlik Müqaviləsi Təşkilatı Xarici İşlər Nazirləri Şurasının görüşündən sonra keçirilən mətbuat konfransında da xarici işlər naziri vurğulamışdı ki, Cənubi Osetiya və Abxaziya ətrafındakı vəziyyətlə Dağlıq Qarabağ münaqişəsinin həlli arasında heç bir paralellər yoxdur. O bunu belə əsaslandırmağa çalışmışdı ki, Mixail Saakaşvili rejimi Abxaziya və Cənubi Osetiya ilə bağlı son illər ardıcıl olaraq bütün danışıqlar formatlarını və əvvəllər razılaşdırılmış həll mexanizmlərini pozub. Dağlıq Qarabağ münaqişəsində isə tərəflərdən heç biri problemin həlli işindən qaçmır, yekun həllinin elementlərinin böyük hissəsi artıq razılaşdırılıb, yerdə qalan məsələlər üzrə iş davam etdirilir. Bütün bunlar göstərir ki, Rusiya vasitəçi kimi imicinin ciddi korlandığının fərqindədir və qısa müddət ərzində xarici işlər naziri üç dəfə açıqlama verməklə bu imicin bərpasına can atır. Məsələylə bağlı fikirlərini öyrəndiyimiz politoloq Qabil Hüseynli deyir ki, Gürcüstan olaylarından sonra Rusiya rəsmilərinin heç bir bəyanatını ciddi qəbul etmək lazım deyil. Çünki illərlə Moskva Gürcüstanın ərazi bütövlüyünü dəstəklədiyini bəyanlayıb. Amma indi rusların Gürcüstanı parçalamaq yolunu tutduğunun şahidiyik: "Müqayisə aparmaq lazımdırsa, öncə bu bəyanatlar müqayisə olunmalıdır". Politoloq bildirdi ki, Sergey Lavrovun söylədikləri sırf subyektivizimdir və Rusiya elitasının şəxsi görüşlərini əhatə edir. Bu o demək deyil ki, həmin baxışlar sabah hansısa formada başqa bir mahiyyətdə təkrarlanmayacaq: "Sergey Lavrovun söylədikləri sadəcə, bu gün üçün siyasi manevrdir". Sergey Lavrovun bundan öncə səsləndirdiyi iki bəyanatı da xatırladan Qabil Hüseynli hesab edir ki, Rusiyanın xarici işlər naziri Azərbaycan və Moldovaya dolayı xəbərdarlıq edir və onlara heç vaxt gücdən istifadə etməməyi "məsləhət görür". Politoloq onu da vurğuladı ki, Sergey Lavrov Cənubi Osetiya məsələsinin presedent yaratmayacağını söyləsə də, Dağlıq Qarabağ və Dnestryanı münaqişələrinin yekun nəticəsinin necə olacağından söz açmır: "Bizə nəticə lazımdır. Rusiyanın xarici işlər naziri birbaşa desəydi ki, bu ölkələrin ərazi bütövlüyü dəyişməyəcək, Dağlıq Qarabağ Azərbaycanın, Dnestryanı Moldovanın ayrılmaz hissəsi kimi onun tərkibində qalacaq, o halda daha aydın və birmənalı danışmış olardı. Amma indiki halda onun söylədikləri sadəcə, başaldadıcı və hazırkı dövrdə Rusiyanın nəfəs alması üçün bir diplomatik gedişdir. Məncə, Sergey Lavrov uğursuz diplomatik gedişlər edib və heç kəsi Rusiyanın vədlərinə inandıra bilmir". xalqcebhesi