NİZAMİ QULİYEV DƏ AXCP-dən İSTEFA VERDİ Qulamhüseyn Əlibəylinin partiyasına qoşulan sabiq deputat Əli Kərimli ilə üzbəüz oturmaqdan çəkinib Prezidentliyə namizəd, AXCP Ali Məclisinin keçmiş sədri Qulamhüseyn Əlibəyli artıq partiya yaradıcılığı ilə bağlı mövqeyini qətiləşdirib və gələn həftə bu barədə konkret açıqlamalarla çıxış edəcək. Bu barədə dünən o, qəzetimizə açıqlamasında bildirdi. Qeyd etdi ki, qərarını gələn həftənin ikinci günü açıqlamağı planlaşdırır. “Həmin gün partiyanın yaradılması ilə əlaqədar Təşəbbüs Qrupu elan olunacaq. Partiyanın təsis olunması üçün rayon şöbələrini təsis etmək, konfranslar keçirmək lazımdır. Bununla bağlı proses isə ən azı seçkidən sonra bir-iki ay çəkəcək”. Q.Əlibəyli dedi ki, yaradacağı təşkilat sağ mərkəzçi, müxalifətyönümlü partiya olacaq. İsrarlarımıza baxmayaraq, Q.Əlibəyli təşəbbüs qrupuna daxil olan şəxslərin adını açıqlamadı: “Bu barədə mənə çoxlu suallar verilib. Ancaq demişəm ki, elan olunanda hər kəs biləcək. Yalnız onu deyə bilərəm ki, kifayət qədər populyar insanlar var”. Q.Əlibəyliyə tanınmış hüquqşünas Müzəffər Baxışovun da adının partiyanın təsisçiləri sırasında hallandırıldığını bildirdik. Lakin o, əvəzində “gəlin açıqlamanın veriləcəyi günü gözləyək” cavabını verməklə kifayətləndi. M.Baxışov özü isə bununla bağlı sualımızın cavabında dedi ki, Q.Əlibəyli BDU-da onun ən çox hörmət etdiyi müəllimlərdən biri olub: “Qulamhüseyn bəy öz təşəbbüsü ilə prezidentliyə namizədliyini irəli sürdükdən sonra təklif etdi ki, mən MSK-da onun səlahiyyətli nümayəndəsi olum. Həm mənim müəllimim olması, həm də tanınmış hüquqşünas olması, eyni zamanda mənə belə bir etimad göstərməsi səbəbindən bu təklif mənimçün xoş oldu. Ona görə də məmnuniyyətlə onu MSK-da səlahiyyətli nümayəndə kimi təmsil etməyə razılaşdım. İndi də bu fəaliyyətimdən qürur hissi duyuram. Seçkilər başa çatanadək onun səlahiyyətli nümayəndəsi kimi fəaliyyət göstərəcəyəm”. Partiyanın təşəbbüs qrupunda adının olub-olmamasına gəldikdə isə M.Baxışov deyilənləri təkzib etdi. Yazı çapa hazırlanarkən məlumat aldıq ki, Demokratik Seçki Mərkəzinin prezidenti Qorxmaz İbrahimli də partiyanın təsisçiləri sırasındadır. Q.İbrahimli ilə əlaqə saxladıqda, xəbəri təsdiqlədi: “Bəli, mən də partiyanın təsisçilərindən biriyəm”. Lakin o, partiyanın Demokratik Azərbaycan Xalq Cəbhəsi Partiyası adlandırılacağı barədə məlumatı təsdiqləmədi: “Ümumiyyətlə, bizim partiyanın adında Azərbaycan Xalq Cəbhəsi olmayacaq. Düzdür, biz hamımız Xalq Cəbhəsinin şinelindən çıxmışıq. Ancaq partiyamızın adı ilə bağlı tam müstəqil qərar verəcəyik”. Q.İbrahimli artıq AXCP Ali Məclisi sədrinin müavini, sabiq deputat Nizami Quliyevin də partiyadan istefa verdiyini bildirdi: “Nizami bəy də bizim yaradacağımız partiyanın Təşəbbüs Qrupuna daxil olacaq. Bundan başqa digər dostlarımız da AXCP-dən istefa verib gəlir ki, biz onlara gəlməyin deyə bilmərik”. Nizami Quliyevin isə lent.az-a müsahibəsində AXCP-dən ayrılmağı xəbərini təsdiqləyib. O, AXCP-dən istefasının səbəbini belə izah edib: “Partiyadan getməyimin strategiya ilə əlaqəsi yoxdur. Taktiki gedişlərdə fikir ayrılıqları olduğuna görə partiyadan ayrıldım. Mən həmişə partiyanın aktiv fəaliyyətini istəmişəm. Bu aktiv fəaliyyət isə yalnız seçkilərlə bağlı olub. Əgər partiya öz proqramında hədəf kimi hakimiyyəti götürübsə, amma seçkilərə qatılıb iştirak etmirsə və aktiv boykot məsələsi də yoxdursa, hakimiyyətdən narazı olan aktiv təbəqəni, yəni cəmiyyəti arxamızca apara bilmiriksə, bu siyasi fəaliyyət məni qane etmir. Mən özüm hərbidə olmuşam, belə demək mümkünsə, “müharibə partiyası”nın üzvüyəm. Həmişə təklif etmişəm ki, əgər doğrudan da bu seçkilər bizə cəmiyyətdəki prosesləri dəyişməyə imkan vermirsə, bəlkə xalqı silahlı üsyana, inqilaba çağıraq? Təbii ki, bu, bizim proqrama yazılan bir məsələ olmadığından heç vaxt qəbul edilməyib. Ancaq istənilən halda, mən fəaliyyət göstərmək istəyirəm. Əgər aktiv fəaliyyətim daha 5 il də davam edəcəksə, onda mənim demək olar ki, pensiya vaxtım çatacaq”. Sabiq deputat Q.Əlibəylinin yeni partiyasına dəvət aldığını da təsdiqləyib: “Qulamhüseyn bəylə bizim uzun müddət dostluğumuz olub. O, təbii ki, məni öz yeni partiyasına dəvət edib. Qulamhüseyn bəylə bəzi parametrləri götür-qoy edirik. Ancaq onunla razılaşmışam. AXCP-dən istefam da elə Qulamhüseyn bəylə razılığımla bağlıdır. Ancaq onu deyim ki, əgər Qulamhüseyn bəy də mənim irəli sürdüyüm məsələlərin üstünə getməsə, təbii ki, onun da yanında olmayacağam”. N.Quliyevin sözlərinə görə, AXCP-dən istefası ilə bağlı partiya sədri Əli Kərimlinin adına ərizə yazıb, amma özü ilə danışmayıb: “Yox, təəssüf ki, danışmamışam. Onun özü ilə uzun müddətdir yol gəlirəm, Əli bəyin şəxsiyyətinə böyük hörmətim var. Belə deyək də, onunla üzbəüz oturmağa bir balaca çəkindim...” Elşad PAŞASOY musavat