Novruz Məmmədov: “Abdulla Gülün səfəri sabah unudulacaq bir şey deyil” “Bir, iki ay gözləməyə nə var ki? Hər şeyi görəcəyik. Bəlkə bu səfəri pisləyənlər hamısı peşman olacaqlar. Nəzəri cəhətdən bu da mümkündür”. “Biz Türkiyə ilə dost, qardaş və tərəfdaş dövlətik. Bizim maraqlarımız demək olar ki, bütün məsələlərdə üst-üstə düşür”. Bunu APA-ya müsahibəsində Prezident Aparatının beynəlxalq əlaqələr şöbəsinin müdiri Novruz Məmmədov Türkiyə prezidenti Abdulla Gülün Türkiyəyə səfərinə münasibət bildirərkən deyib. Onun sözlərinə görə, Azərbaycanla Türkiyə strateji müttəfiqdir. Bu müttəfiqliyin kökünün dərin olduğunu deyən şöbə müdiri hesab edir ki, əməkdaşlığın gələcəyi də uzun olacaq: “Türkiyə dövlətinin, onun rəhbərlərinin bütün məsələlərdə müstəqil qərar qəbul etmək hüquqları var. Biz bununla bağlı bu gün elə bir mövqe bildirə bilmərik. Sadəcə, müəyyən təhlil etmək lazım gələrsə, Azərbaycan və Türkiyə mətbuatında müxtəlif fikirlər söylənilir. Amma mənə belə gəlir ki, bu gün qəti, radikal və konkret mövqenin bildirilməsi o qədər də düzgün deyil. Bu həssas bir addımdır. Gözləmək lazımdır. Türkiyə prezidentinin Ermənistana səfəri sabah unudulacaq bir şey deyil. İki-üç ay ərzində bu səfərin nəticələri ilə bağlı ortada nə isə olacaq. Bu səfər zamanı Türkiyənin və Ermənistanın mövqeyi nə oldu, nədən söhbət edildi, kim hansı addımı atdı, bu addımlar geriyə doğrumu oldu, yoxsa irəliyə. Yəni bunların heç biri bilinmir, indi bizə qalan nəticəni gözləməkdir. Bu bir taktiki addımdır. Düşünürəm ki, Azərbaycanla Türkiyə arasında strateji məqsəd hədəf birliyi var, davam edir və edəcək. Şübhəsiz ki, bu səfər zamanı Türkiyə Cümhuriyyətinin başçısı Azərbaycanla bağlı məsələdə də konkret olacaq. Bunun nəticəsi nədən ibarət olacaq, bu barədə bir söz deyə bilmərəm”. Abdulla Gülün səfərinin Azərbaycan-Türkiyə münasibətlərinə təsiri ilə bağlı sualı cavablandıran N. Məmmədov bildirib ki, ölkələr arasındakı münasibətlərin bir səfərə bağlanması düzgün deyil. Onun sözlərinə görə, Azərbaycanla Türkiyə arasında münasibətlər bu dövlətlərin rəhbərləri tərəfindən müəyyənləşdirilib və bu xətt dəyişməzdir: “Sadəcə olaraq, ola bilsin ki, kimlərsə müəyyən hisslərə qapılaraq bununla bağlı fikirlər bildirir. Ümumiyyətlə, dövlət başçısının bir ölkəyə səfəri adətən diplomatik münasibətlərdə müəyyən bir mərhələnin sonu, yeni əlaqələrin başlanğıcı kimi qiymətləndirilir. Bu bir qədər qeyri-adi addım olduğu üçün ortaya belə suallar çıxır. Məni bir qədər narahat edən məsələ budur. Ermənistan rəhbərləri bu gün çətin vəziyyətdədir və çətin vəziyyətdə olanda onlar üçün heç bir əxlaqi prinsip olmur. Belə vəziyyətdə hər addımı atmağa hazır olurlar. Amma bu o demək deyil ki, bu onların daimi saxladıqları prinsip olacaq. Regionda gedən proseslər nəticəsində Ermənistan çox çətin vəziyyətdədir. Onun bu gün yaşamasının əsas təminatçısı İran sərhədidir. Çətin vəziyyətdə olduqları üçün onlar növbəti dəfə manevr, riyakarlıq edə bilərlər”. Gülün səfərinin Türkiyədən çox İrana lazım olması barədə deyilənlərə gəlincə, N. Məmmədov bildirib ki, bu bəlkə də belədir: “Amma Ermənistana lazım olanları Ermənistana vermək məsələsi var. Bu verilmir ki! Bu səfər o demək deyil ki, Türkiyə Ermənistanla sərhədləri açılır. Yəqin ki, dövlətlər arasında olan bütün problemlər bu səfərdə müzakirə olunacaq. Həmin müzakirələrin təfərrüatlarını biləndən sonra bu səfər haqqında nə isə demək olar. Bu gün hələlik mövqeyimiz budur ki, bu Türkiyənin qərarıdır, biz onu qəbul edirik”. Gülün səfərinin Azərbaycanla razılaşdırılması barədə deyilənlərə münasibət bildirən şöbə müdiri bununla bağlı heç bir şey söyləyə bilməyəcəyini deyib: “Belə bir razılaşmaya heç ehtiyac ola bilməzdi. Türkiyə müstəqil dövlətlərdir, nə olsun ki, qardaş dost ölkədir, hər müstəqil addımı ata bilər. Bu gün Azərbaycan və Türkiyə ictimaiyyəti də daha çox bu məsələnin formal tərəfinə əhəmiyyət verib məntiqi nəticələr çıxarmaq istəyir. Amma siyasətdə belə tələskən addımların atılmasına ehtiyac yoxdur. Bir, iki ay gözləməyə nə var ki? Hər şeyi görəcəyik. Bəlkə bu səfəri pisləyənlər hamısı peşman olacaqlar. Nəzəri cəhətdən bu da mümkündür”. LENT.AZ