ƏRDOĞANIN “QAFQAZ PLATFORMASI” İDEYASI ABSURD SAYILIR Amerika diplomatı: “Bu təşəbbüs real deyil, ona məzmun vermək çox çətindir” Rusiya ilə Gürcüstan arasında silahlı münaqişə baş verəndə Türkiyənin Xarici İşlər Nazirliyinin Qafqaz Departamentində neçə adam Ankarada öz iş yerində idi? Bu sualı verən “Türkiş Deyli Nyuz” özü yazır: “Heç kim”. Qəzetin yazdığına görə, departamentin rəhbəri İraqın Mosul şəhərinə səfərə getmişdi. “Onun müavini vəzifəsi 6 aydır ki, boşdur. Departamentin 3-cü işçisi Naxçıvanda ezamiyyətdə idi. Yerdə qalırdı bir ən aşağı vəzifəli işçi, o da məzuniyyətdə idi”. Qəzet qeyd edir ki, Xarici İşlər Nazirliyinin Qafqaz Departamentində cari işləri görməyə bir işçi belə olmayanda baş nazir Ərdoğan birdən-birə “Qafqaz Sabitlik Paktı” adlı yeni təşəbbüs irəli sürür. Bu təşəbbüs hətta Qafqaz işləri ilə yaxından məşğul olan Metyu Brayza üçün də sürpriz olub. Dövlət katibinin köməkçisinin Avrasiya və Avropa məsələləri üzrə müavini deyib ki, bu barədə ona əvvəlcədən qısa məlumat da verilməyib. “Qafqaz sabitlik paktı” nədir? “Ərdoğan təklif edir ki, Qafqazın 3 dövləti - Gürcüstan, Ermənistan, Azərbaycan və regionun iki nüfuzlu dövləti olan Türkiyə ilə Rusiya regionda sabitlik üçün pakt imzalasınlar. Ancaq bu təşəbbüs irəli sürüləndən çox pessimist qarşılanıb. Adı çəkilməyən Amerika diplomatı 2 gün qabaq ”Türkiş Deyli Nyuz"a deyib ki, bu təşəbbüs real deyil, ona məzmun vermək çox çətindir. Rusiya ilə Gürcüstan arasında açıq düşmənçilik getdiyi vaxt bu plan işləməyəcək. Bir vaşinqtonlu təhlilçi isə deyir ki, bu pakt ideyası Suriya-İsrail münaqişəsini həll etməkdə Türkiyənin vasitəçiliyi ideyasına çox bənzəyir. Ancaq bir fərq var, Rusiya Qafqazda Qərbin dediklərinə məhəl qoymadığı bir vaxtda, hazırda Amerika da bu paktını dəstəkləməyə maraq göstərmir". Ancaq Ankaranın Bilkənt Universitetində tarix professoru Deyvid Barkard hesab eləyir ki, Qafqazda sabitlik və təhlükəsizlik paktı işlək qrupa çevrilə bilər. Onun fikrincə, regionda əməkdaşlıq üsulları var, misal üçün Qara Dəniz Əməkdaşlıq Təşkilatı. “Guardian” qəzeti də yazır ki, Türkiyə Yaxın Şərqdə və indi də Qafqazda yeni vasitəçi rolunu oynaya bilər. Bildirilir ki, Türkiyənin Ermənistandan başqa bütün qonşuları ilə çox yaxşı münasibətləri var, indi rəsmi İrəvanla da aradakı gərginlik azalsa, Ankaranın Qafqazda vasitəçiliyi çox səmərəli ola bilər. Qəzet onu da yazır ki, Türkiyənin sabitlik paktı ideyasının bədbin qarşılandığı vaxt bu ideyanı dəstəkləyənlərdən biri Ermənistan prezidenti Serj Sərkisyan olub. Sərkisyan bunu Abdullah Gülün təmsilçisi Ünal Çeviközlə görüşdən sonra xüsusi bəyanatında deyib. Region ölkələrinin münasibətinə gəldikdə, Rusiya Türkiyənin təşəbbüsünü bəyənir, Azərbaycan ənənəvi olaraq Türkiyəni dəstəkləyir, Gürcüstanın xarici işlər naziri Eka Tkelaşvili isə deyib ki, Gürcüstan Rusiya ilə bir qrupa daxil olmağı o vaxt nəzərdən keçirə bilər ki, Kreml bütün qoşunlarını Gürcüstandan çıxarsın. Amerikanın vitse-prezidenti Dik Çeyni də Tiflisdə deyib ki, ilk növbədə Gürcüstanın suveren haqlarına hörmət qoyulmalıdır. Siyasət şöbəsi musavat