Vaşinqton Gürcüstan və Ukraynanın NATO-ya üzv olmasında çətinlik çəkməyəcək Viktor Yuşşenko: "Gürcüstan-Rusiya konflikti Ukraynanın təhlükəsizliyini təmin edəcək sistemin NATO olduğunu ortaya qoyub" ABŞ-ın vitse-prezidenti Riçard Çeyninin Azərbaycan, Gürcüstan və Ukraynaya gəlişi, bəyanatları Vaşiqtonun Rusiyayla mübarizədə yeni, daha ciddi bir mərhələnin başlanğıcına start verdiyini göstərir. Yeni mərhələ ilə bağlı qərarlara ABŞ-da prezident seçkilərinin nəticələrindən, respublikaçıların bu kürsüyə təzədən yiyələnəcəkləri, yaxud Ağ Evdə demokrat əyləşəcəyindən asılı olmayaraq təkrar baxılmayacaq. Əks təqdirdə bu, Vaşinqtonun bütün dünyada nüfuzunun sürətlə itirilməsinə start verilməsi anlamına gələrdi. Riçard Çeyninin bölgəyə gəlişi kifayət qədər kritik məqamda gerçəkləşib. Ramiz Mikayıloğlu Rusiya Gürcüstana hərbi müdaxilə edib, Cənubi Osetiya və Abxaziyanın "müstəqilliyini" tanıyıb, Ukraynada rusmeylli qüvvələr fəallaşıb, baş nazir Yuliya Timoşenko prezidentlik iddiasına görə "narıncı" koalisiyanı parçalayıb, Azərbaycanın isə enerji resurslarının nəqlində problemləri yoluna qoyması ərəfəsində paytaxtının mərkəzində məscidə qumbara atılıb, şimal sərhədlərini silahlı vəhhabi dəstəsi pozub və s. İzlər yenə də Azərbaycanı Qərbin alternativ enerji mənbəyi və Avropaya Mərkəzi Asiyanın enerji resurslarını ötürəcək tranzit ölkə olmasını istəməyən Moskvaya aparır. Bakıda Azərbaycanın təhlükəsizliyinin qorunmasının, alternativ enerji xətlərinin inkişafının zəruriliyindən danışan Riçard Çeyninin Tiflis və Kiyevdə bu ölkələrin NATO-ya inteqrasiyasına diqqət yönəltməsi maraqlıdır. Xatırladaq ki, o, Tiflisdə Gürcüstanı təcili Alyansa qəbul etmək lazım olduğunu söyləyib. İlk baxışda belə görünür ki, Riçard Çeyni Bakıda Azərbaycanın təhlükəsizliyinin Rusiyadan gələ biləcək təhdidlərdən qorunması üçün real vəd vermədi, ancaq danışmaqla kifayətləndi. Ancaq məsələyə daha geniş prizmadan baxılsa, fərqli mənzərə ortaya çıxır. Gürcüstanın NATO-ya tezliklə üzvlüyü dolayı Azərbaycanın təhlükəsizliyinə ciddi bir qarantın verilməsi anlamına gələcək. Çünki qonşu ölkənin Alyansa üzv olmasından sonra NATO sərhədlərimizdə, qapımızda olacaq. Düzdür, NATO-nun Buxarestdə keçirilən son sammitində Almaniya, Fransa Rusiyayla münasibətləri korlamamaq, iqtisadi əlaqələrə zərər gətirməmək üçün Gürcüstan və Ukraynaya üzvlüyə qəbulla bağlı fəaliyyət planının verilməsinə sıcaq yanaşmamışdılar. Ancaq son olaylardan sonra heç kəs şübhə etmir ki, Vaşinqton artıq Qərb müttəfiqlərini Gürcüstanı təcili, Ukraynanın mümkün qədər tez NATO-ya qəbul etməyə inandırmaqda çətinlik çəkməyəcək. Bu gün ABŞ-da prezident seçkilərinə qatılan respublikaçı və demokrat namizədlərin Rusiya ilə mübarizədə kimin daha sərt mövqe sərgiləyəcəyi yönündə yarışa girmələri, demokrat Barak Obamanın anti-rusiya mövqeyilə seçilən vitse-prezidentliyə namizəd tapması da diqqət çəkir. Yəni prezident seçkilərinin nəticələrinin ABŞ-ın indidən seçdiyi yolla hərəkətini dayandırmayacağı birmənalıdır. Qısası, bir NATO dövlətiylə tezliklə qonşu olacağımız artıq qaçılmazdır. ABŞ-ın vitse-prezidenti dünən "narıncı" hökumətin baş naziri Yuliya Timoşenko və prezident Viktor Yuşşenko ilə görüşüb. Riçard Çeyni "narıncı" koalisiyada əsas problem yaradan Yuliya Timoşenko ilə öncə görüşüb və görüşə planlaşdırıldığından 2 dəfə çox vaxt ayırıb. Bu məqamın özü də göstərir ki, Vaşinqton gələn il prezident seçkiləri keçiriləcək Ukraynada rusmeylli qüvvələrin fəallaşdığı bir dövrdə hökumət böhranının aradan qaldırılması, yaxud "narıncı"ların proseslərdən qalib çıxması üçün ciddi səy göstərir. Yəqin ki, Yuliya Timoşenkoya da hər şey "izah olunub" və Vaşinqtonun planlarını şəxsi maraqlar zəminində pozmağın hansı fəsadlar verə biləcəyi anladılıb. Görüşdən sonra onların keçirdikləri mətbuat konfransında səsləndirdikləri bəyanatlar da bu qənaəti təsdiqləyir. Yuliya Timoşenko deyib ki, demokratik hökumətin (bu hökumət Viktor Yuşşenkonun "Bizim Ukrayna-Xalq Özünü Müdafiə" blokuyla yaradılıb-red.) işi müsbət nəticə verib, 8 ay ərzində yüksək iqtisadi inkişaf göstəriciləri əldə olunub. Prezident Viktor Yuşşenko ilə görüşdən sonra keçirilən birgə mətbuat konfransında isə ABŞ-ın vitse-prezidenti NATO-nun qapılarının Ukrayna üçün açıq olduğunu söyləyib. O, Viktor Yuşşenkoya Gürcüstanda baş verənlər zamanı sərgilədiyi reaksiyaya görə minnətdarlığını bildirib: "Rusiyanın Gürcüstandakı hərəkətləri Moskvanın beynəlxalq əməkdaş kimi statusunu bütün dünyada şübhə altına alıb". Viktor Yuşşenko deyib ki, Gürcüstan-Rusiya konflikti bir daha yeganə alternativ modelin, ölkənin təhlükəsizliyini təmin edəcək sistemin NATO olduğunu ortaya qoyub. Riçard Çeyni Kiyevdə görüşlər keçirdiyi vaxt rusyönümlü Regionlar Partiyasının sədri Viktor Yanukoviç Gürcüstanı Cənubi Osetiyaya qarşı təxribat və cinayətar hərəkət keçirməkdə günahlandırıb, ancaq onu da etiraf edib ki, Moskvanın cavabı "çox sərt olub". Viktor Yanukoviç güclə Ukraynanın NATO-ya "itələnməsi"nin uğursuzluqla sonuclanacağını dilə gətirib və Alyansa qəbul məsələsinin referenduma çıxarılmasını təklif edib. O, gürcü-osetin münaqişəsi dövründə Ukrayna-Rusiya münasibətlərinin kifayət qədər "zədələndiyini" və münasibətləri düzəltmək üçün hərəkətə keçəcəklərini bildirib... xalqcebhesi