Vaşinqton Rusiyanın aqressiv siyasətinin qarşısında sipər çəkmək istəyir "Rəsmi Vaşinqton Dik Çeynini bölgəyə göndərməklə göstərdi ki, ABŞ lazım olarsa, Azərbaycan və Gürcüstanın təhlükəsizliyi məsələsini öz üzərinə götürəcək" "Çeyninin istədiyi Azərbaycanın təhlükəsizliyi yox, neft, qaz kəmərləri, Mərkəzi Asiyaya yol, İrana təsirdir" Bakıda səfərdə olan ABŞ-ın vitse-prezidenti Riçard Çeyninin prezident İlham Əliyevlə görüşündən sonra rəsmi bəyanatı yayılıb. Ramiz Mikayıloğlu Bəyanatda bildirilir ki, Vaşinqton bölgədəki müttəfiqlərinin əmin-amanlığında və rifahında maraqlıdır: "Prezident Corc Buş məni Azərbaycan xalqına və bütün regiona aydın ismarıcla göndərib. ABŞ-ın dərin və möhkəm maraqları var ki, sizin rifahınız və təhlükəsizliyiniz təmin olunsun. Avropa ölkələri, Türkiyə, Qafqaz və Mərkəzi Asiya ölkələriylə birlikdə işləməliyik ki, enerji resurslarının ixracı üçün əlavə marşrutlar olsun və onlar sərbəst şəkildə nəql edilsin". Məsələylə bağlı fikirlərini öyrəndiyimiz politoloq Zəfər Quliyev deyir ki, Riçard Çeyninin regiona səfəri bir çox səbəblərlə bağlı idi. Vitse-prezidentin gəlişi ilk növbədə region ölkələrinə dəstək xarakteri daşıyır. Rəsmi Vaşinqton dövlətin ikinci şəxsi olan Riçard Çeynini bölgəyə göndərməklə həm Azərbaycan və Gürcüstana, həm də Rusiyaya göstərdi ki, ABŞ Bakı və Tiflisi dəstəkləyir, onların yanındadır. Lazım olarsa, ABŞ Azərbaycan və Gürcüstanın təhlükəsizliyi məsələsini öz üzərinə götürəcək. Rəsmi bəyanatda da bu, açıq vurğulanır. Onun sözlərinə görə, Vaşinqton bununla Rusiyanın aqressiv siyasətinin qarşısında sipər çəkmək istəyir. Digər tərəfdən, ABŞ Bakıda enerji təhlükəsizliyi məsələsini araşdırmaq istəyirdi. Çünki həm mövcud olan enerji layihələrinə, həm də "Nabucco" layihəsinə real risklər mövcuddur: "ABŞ və Avropanı bu məsələ daha çox düşündürür və səfərdə enerji müzakirələrinin də əsas yer tutacağı öncədən də proqnozlaşdırılırdı. Yayılan bəyanatda da bu məqamın xüsusi vurğulanması göz önündədir". Zəfər Quliyev nəzərə çatdırdı ki, Azərbaycana ilk dəfə ABŞ-dan belə yüksək səviyyəli rəsmi nümayəndə gəlib: "Ona görə də güman etmək olar ki, bir çox, o cümlədən İran məsələsi və Azərbaycanın bu yöndə mövqeyi, Bakının NATO-ya inteqrasiyası, inteqrasiyanın hansı formada həyata keçiriləcəyi də müzakirə obyekti olub. Ən əsası isə təhlükəsizlik məsələsiydi ki, Riçard Çeyni prezident İlham Əliyevlə görüşündə bu məqamı qabartdı. Mən az öncə bildirmişdim ki, buna qədər də rəsmi Bakının apardığı siyasətin əsas məqamlarda Vaşinqtonla razılaşdırıldığına əminəm. ABŞ vitse-prezidentinin Bakıya bu səfərində də əsas məqsəd bir daha mövqeləri yaxınlaşdırmaq və gələcək addımların uzlaşdırılmasıdan ibarət idi". Politoloq Zərdüşt Əlizadə Riçard Çeyninin səfərinin yekunlarıyla bağlı bir qədər fərqli fikirdədir. O xatırlatdı ki, hazırda Azərbaycanın təhlükəsizliyinə yeganə xətər Ermənistandan gəlir. ABŞ isə Ermənistana ötən illər ərzində 1 milyard dollardan çox təmannasız yardım göstərib, siyasi dəstək verib, ATƏT-in Minsk qrupunun həmsədri kimi işğalçını qoruyub, təcavüzkar kimi tanınmağa qoymayıb: "ABŞ Azərbaycanın təhlükəsizliyini təmin etmək üçün Ermənistana deməlidir ki, qoşunları işğal olunmuş ərazilərdən çıxart, sənə yardım verməyəcəm, təzyiq göstərəcəm. Amma Ermənistana hər cür yardım göstərir, Azərbaycana da deyir ki, güc tətbiq etmə. ABŞ Azərbaycanın ərazi bütövlüyünü tanıdığını bəyanlayır, amma işğalçı ölkəyə də yardımını dayandırmır. Bu, ikili standartlara əsaslanan siyasətdir və təəccüblü heç nə yoxdur. Rusiya bizə hücum etmək istəyir? Yox, Azərbaycan hakimiyyəti Moskvayla problemin yaranmaması üçün hər şey edir. İranın ağlına gəlmir ki, bizə hücum etsin. Bizə yeganə hücum edən Ermənistandır ki, onun da dayısı ABŞ-dır". Politoloqa görə, Riçard Çeyninin istədiyi Azərbaycanın təhlükəsizliyi yox, neft, qaz kəmərləri, Mərkəzi Asiyaya yol, İrana təsirdir: "Azərbaycanın təhlükəsizliyi onun vecinə deyil. Özümüzü aldatmayaq, heç kəs bizim qayğımıza qalmaq barədə düşünmür. Hamı bizdən neft və qaz istəyir. Diplomatiyanın qaydasıdır, ABŞ öz maraqlarını güdür, özünün qayğısına qalır". Ancaq o da bəllidir ki, Azərbaycan onsuz da neft və qazını Qərb şirkətlərinin iştirakıyla Qərbin arzuladığı marşrutla nəql edir. Bakı "Nabucco"da iştirakda da maraqlı olduğunu gizlətmir. Bəs bu halda Riçard Çeyninin yalnız neft və qaz üçün Azərbaycana təşrif buyurması ağlabatandırmı? Zərdüşt Əlizadə hesab edir ki, ABŞ Bakının birdən neft və qazı Rusiya, yaxud İran üzərindən nəql etmək niyyətinə düşməsindən ehtiyatlanır: "Birdən Azərbaycanın ağlına gələr ki, kəmərlər İrandan keçsin. Vaşinqton isə bunu arzulamır, cənub qonşumuzun təcrid olunmasını istəyir". xalqcebhesi