Rusiya Zaqatala təxribatını təkrarlamaq istəyir "Terrorçu qrupun texniki təchizatının yüksək olması və sərhədi problemsiz keçmələri bu qruplaşmanın arxasında xüsusi xidmət orqanlarının dayanmasından xəbər verir" Daxili İşlər Nazirliyinin (DİN) mətbuat xidməti Əbu-Bəkr məscidində və Xətai rayonunda baş verən partlayışlar, Rusiya ilə sərhəddə silahlı toqquşmayla bağlı məlumat yayıb. Məlumatda şimal sərhədləri yaxınlığında dini- təxribatçı qrupa qarşı aparılan əməliyyatlar nəticəsində cinayətkarların qaçmasından sonra hadisə yerində 14 ədəd radiostansiyanın və digər hərbi sursatların aşkar edildiyi bildirilir. Mütəxəssislərin fikrincə, terrorçu qruplaşmanın belə ciddi şəkildə əməliyyatlara hazırlaşması və 14 radiostansiyanı əldə etməsi güclü dəstəyin olmasından xəbər verir. Bəzi analitiklər isə Azərbaycanın şimal sərhəddini asanlıqla keçən və meşələrdə rahat hərəkət edərək yenidən Dağıstana qayıdan təxribatçıların arxasında Rusiyanın dayandığını bildirirlər. Tural Politoloq Qabil Hüseynli Kremlin Azərbaycan üçün hazırladığı siyasi "sürprizlərin" əsas hissəsinin yaxın gələcəkdə görünməsi ehtimalının olduğunu söylədi. Ekspert Moskvanın ilginc ssenarisinin Əbu-Bəkr məscidindəki olaydan başladığını bildirdi: "Məscidə qumbaranın atılması və bu işi həyata keçirənlərin qaçıb gizlənməsi o qədər ustalıq və peşəkarlıqla həyata keçirildi ki, burada xüsusi xidmət orqanlarının izi açıq-aydın göründü. Ümumiyyətlə, həmişə şimal bölgəsində hadisələr qaynayanda bu olayların arxasında başqa dövlətlərin kəşfiyyat strukturlarının durduğu açıq şəkildə görünür. Amma bu dəfə "Meşə Qardaşları" deyilən terror qrupu göründü ki, texniki cəhətdən daha yaxşı təchiz edilib və onlar sərhəd keçib gələndə elə bir problemlə üzləşməyib". Qabil Hüseynli yerli əhalinin hərəkəti üçün belə çətinlik yaradan mürəkkəb relyefə malik ərazilərin-meşə və dağların "gəlmələr" üçün rahat hərəkət istiqamətinə çevrilməsini də təəccüb doğuran amil saydı. Ekspert terrorçuların xəritə işi ilə bağlı yaxşı təlimatlandırıldığını, yəni regionun bütün dağ, cığır məsələlərini xəritə vasitsilə gözəl tapa bildiklərini diqqət çəkən məsələ olduğunu vurğuladı. Bu səbəbdən də meşə şəraitində öz yerlərini çox asanlıqla dəyişib rahat istiqamətlər seçən qruplaşma qaçmağa nail olub. Onların təlimatlandırılması Azərbaycan hüquq-mühafizə orqanlarının cinayətkarları ələ keçirməsinə imkan verməyib: "Bütün bunlar onu göstərir ki, terrorçu dəstə xüsusi hazırlıq keçmiş, peşəkarlıq keyfiyyətləri əldə etmiş və sözsüz ki, bəlli bir mərkəzdən daim təlimat alan qrupdur. Bu qrupun da arxasında Azərbaycanda qarışıqlıq yaratmaqda maraqlı olan dövlətin durduğunu heç kim istisna edə bilməz. Çünki 14 radiostansiya az qala bütöv bir batalyonun rabitə texnikasıdır. Eyni zamanda bu qədər texniki vasitə və müəyyən səbəblərdən ictimaiyyətə açıqlanmayan digər avadanlıqlar onu göstərir ki, ortaya yeni çıxan bu insanlar xüsusi təxribatçı qrupdur. Bu dəstə əvvəlcədən hazırlanaraq yüksək təlim keçib, sonradan Azərbaycanın şimal sərhədlərinə göndəriliblər". Ekspertin fikrincə, istiqamətləndirilmədən sonra xüsusi mərkəzdən "Meşə Qardaşlarına" daima komanda verilib və onların yerdəyişməsi, hərəkəti barədə komandaları, bəlli məntəqələrə hücumu hələlik ictimaiyyətə məlum olmayan qurumlar verir: "Amma şimal sərhədləri artıq möhkəmləndirilib. Orada çox güman ki, xüsusi rejim də tətbiq edilib. Əminəm ki, əvvəlkinə nisbətən texniki cəhətdən daha yaxşı təchiz edilmiş qoşunlarımız belə qruplaşmaların öhdəsindən asanlıqla gələ bilər. Yaxın tariximizə nəzər salsaq görərik ki, indi Qusarda olduğu kimi vaxtilə Zaqatalada da qarışıqlıq və əhali arasında təşviş yaratmağa çalışan Hacımaqomed Maqomedovun təxribatçı qrupu meydana çıxmışdı. Amma uğurlu əməliyyatlar sayəsində həmin terrorçuların qarşısı alındı. İndi də sərhədləri keçən dini pərdəyə bükülmüş terrorçu dəstəyə qarşı planlaşdırılmış əməliyyatlar keçirilsə, onu məhv etmək problem olmaz. Bir sözlə, Qafqazda baş verən olaylar, terror aktları və sərhədləri keçib gələn qruplaşmaların əməlləri vahid mərkəzdən idarə olunan hadisələrdir". xalqcebhesi